LUKAS 21

Sedekeak suang jando peset

(Mrk. 12:41-44)

1Neak Umeak Tuhan, Yesus kemliak tun-tun kayo misai caci moi lem kutak sedekeak. 2Si kulo kemliak suang jando de kembiak peset, misai duai keping caci tembaga. 3Lajau Yesus madeak, “Ti'uk: jando yo misai lebiak dau caci kunei kute de luyen. 4Sebab tobo'o kute melei sedekeakne kunei kelebiakne, tapi jando yo melei kunei kekuangne, kerno si melei kute de ade padone.”

Yesus miling tetang ubuakne Umeak Tuhan

(Mat. 24:1-2; Mrk. 13:1-2)

5Ade tun-tun de miling tetang awei ipe ba'esne Umeak Tuhan de nirias ngen butau de ba'es-ba'es ngen barang-barang de nelei ngen Allah. Mako Yesus madeak ngen tobo'o, 6“Konyo ade waktaune, kute de udi keliak yo bakea nubuak; coa ade do butau kulo neak yo de bakea tinggea te'susun pado penanne!”

Saro ngen sikso

(Mat. 24:3-14; Mrk. 13:3-13)

7Penotoa-penotoa temnai ngen Yesus, nadeakne, “Gu'au, tengen do'o bakea tejijai? Ngen jano tandone, amen do'o bakea tejijai?”

8Yesus madeak, “Waspadaba, supayo udi jibeak limau. Sebab dau tun bakea teko ngen makei gen-Ku ngen madeak, ‘Ukuba Si.’ Ngen: ‘Saatne sudo pa'ok.’ Jibeakba udi temotoa tobo'o. 9Jibeakba kulo saben amen udi temi'uk bito tetang peperangan ngen pembrontakan. Kutene o harus tejijai kileak. Tapi do'o coa be'artai bahwo sudo waktaune kiamat.”

10Si madeak ngen tobo'o, “Bangso de do bakea melawen bangso luyen ngen kerajaan melawen kerajaan. 11Ngen bakea tejijai gepo de lai ngen memecem penan bakea ade olon ngen kenyemen, ngen bakea tejijai kulo hal-hal de kemjut ngen tando-tando de luea biaso kunei lenget. 12Tapi ayok kutene o udi bakea tenakep ngen senikso; udi bakea senreak moi umeak-umeak semyang ngen penjara-penjara, ngen udi bakea nadep ngen rajo-rajo ngen penguaso-penguaso kerno gen-Ku. 13Hal o bakea jijai kesempatan bagiaknu utuk semapei Bito Baik kunei Allah. 14#Luk. 12:11-12 Sebab o tentepba neak lem ateinu, supayo udi jibeak muker lebiak denno tetang belaannu. 15Sebab Uku suang bakea melei ngen udi kecek-kecek bijaksana, sehinggo udi coa dapet nelawen ngen nebantah lawen-lawennu. 16Tun tuainu, pasuak-pasuaknu, pasuak keluargonu, kekuatnu, bakea semreak udi. Pa'ok kunei udi bakea nunuak. 17Udi bakea jenngik kute tun ngen kerno gen-Ku. 18Tapi coa delambea kulo kunei buk ulau nu bakea nyep. 19Amen udi tep betaen, udi bakea dapet idupnu.”

Tetang ubuakne Yerusalem

(Mat. 24:15-21; Mrk. 13:14-19)

20“Amen udi kemliak Yerusalem kenpung tentra-tentra, namenba, bahwo ubuakne kota'o bi pa'ok. 21Pado waktau o tun-tun de ade neak Yudea arus melilai moi tebo, ngen tun-tun de ade neak lem kota arus nyikir, ngen tun-tun de ade neak sadei jibeak masuk igai moi lem kota. 22#Hos. 9:7 Sebab do'oba maso pembalasan neak ipe bakea genep kute de ade tetulis. 23Celakoba indok-indok de gidong tenei lai ngen de masiak gep cupik! Negrai yo bakea meding kesaro de lai, ngen Tuhan bakea mukum bangso yo. 24Ade de bakea nunuak ngen pedang, ade kulo de bakea nembin awei tahanan moi negrai-negrai tun, ngen tun-tun de coa kemnal Allah bakea melat Yerusalem sapei abis waktau de sudo tentau Tuhan utuk tobo'o.”

Tekone Anok Manusio

(Mat. 24:29-31; Mrk. 13:24-27)

25 # Yes. 13:10; Yeh. 32:7; Yl. 2:31; Why. 6:12-13 “Ngen bakea ade tando-tando pado matai bilai ngen bulen ngen bitang-bitang, ngen neak bumai bangso-bangso bakea saben ngen bingung madep sa'ei umbok laut. 26Manusio bakea saben setengeak matei madep jano de bakea tejijai neak kute dunio yo, sebab tobo penguaso angkasa rayo bakea jijai kacau. 27#Dan. 7:13; Why. 1:7 Pado waktau o ba Anok Manusio bakea teko neak lem mbun ngen kuaso ngen kemuliaan de lai. 28Amen hal-hal o muloi tejijai, klongonba ngen naketba ulaunu, sebab tegoa igai udi bakea selamat.”

Pelajaran kunei pun ara

(Mat. 24:32-35; Mrk. 13:28-31)

29Lajau Yesus cemrito ngen tobo'o perumpamo awei yo, “Kenliakba pun ara ngen kute pun de luyen. 30Amen pucuk-pucukne muloi keten, udi namen bahwo sudo gesea musim panes. 31Awei o kulo amen udi kemliak hal-hal o tejijai, udi bakea namen bahwo Allah segro bakea meriteak awei Rajo.

32Namenba! Hal-hal o bakea tejijai ayok tun-tun de idup uyo yo matei kutene. 33Lenget ngen bumai bakea nyep, tapi kecek-Ku tep seke'an-ke'anne.”

Nasihat supayo bejago-jago

34“Jagoba dirainu, jibeak sapei udi kembiak sibuk bepesta ngen mabuk menem, atau kembiak meker soal-soal idupnu, sehinggo udi coa siap ketiko bilai o teko ngen tetibo. 35Sebab Bilai o bakea teko awei tinjo pado kute tun neak muko bumai yo. 36Bejago-jagoba, ngen bedu'oba bogoa supayo udi kuet matasi kute hal de bakea tejijai ngen udi dapet madep Anok Manusio.”

37 # Luk. 19:47 Yesus ngajea neak Umeak Tuhan pado kebilai, ngen kelmen billaine Si lalau moi Tebo Zaitun ngen tinggea neak di. 38Tetiep pueng kute tun teko moi Umeak Tuhan utuk temi'uk Yesus ngajea.

Currently Selected:

LUKAS 21: REJ

Highlight

Copy