LUKAS 19

Yesus ngen Zakheus

1Yesus masuk moi kota Yerikho ngen paneu terus liwet kota o. 2Neak di ade suang de genne Zakheus, kepalo penagiak pajak de tun kayo. 3Si berusaho utuk kemliak tun jano Yesus o, tapi si coa berasea kerno tun dau, sebab awokne pendok. 4Si kulo melilai demno tun dau, lajau kemnek pun ara utuk kemliak Yesus de bakea liwet neak di. 5Ketiko Yesus sapei moi penan o, Si kemliak moi das ngen madeak, “Zakheus, segro ba tu'un, sebab bilai yo Uku arus singgeak neak umeaknu.”

6Lajau Zakheus segro tu'un ngen temimo Yesus ngen sukocito. 7Kemliak hal o, kute tun muloi gerunyam, nadeakne, “Si melandai neak umeak tun beduso.”

8Tapi Zakheus je ngen madeak ngen Tuhan, “Tuhan, keliakba, setengeak kunei hokku bakea uku melei ngen tun peset ngen sekirone ade sesuaktau de uku mbut kunei sesuang bakea uku melek pat kilai lipet.”

9Nadeak Yesus ngen si, “Bilai yo bi tejijai keselamatan ngen seisai umeak yo, kerno tun yo kulo anok Abraham. 10#Mat. 18:11 Sebab Anok Manusio teko utuk mesoa ngen semlamat de nyep.”

Perumpamo caci mas

(Mat. 25:14-30)

11 # Mat. 25:14-30 Sementaro tun masiak temi'uk Yesus miling, Si cemrito debuak perumpamo. Sebab pado waktau o Si berade pa'ok Yerusalem, ngen tun kemiro bahwo Allah segro bakea meriteak awei Rajo neak dunio. 12Yesus madeak, “Adeba suang bangsawan de lalau moi negrai uak utuk jijai rajo, sesudo'o belek. 13Ayok berakat Si menok depuluak hambane, lajau melei ngen tobo'o tiep tun dekeping caci mas, nadeakne, ‘Pakeiba dio utuk jagea sapei uku teko igai.’ 14Tapi tun negraine o jengik ngen si. Jijai, sesudo si berakat, tobo'o kemirim utusan utuk madeak, ‘Keme coa lok tun yo jijai rajo keme.’

15Tapi bangsawan o jijai rajo, sesudo'o belek igai moi negraine. Segro si menok pelayan-pelayanne madep, utuk namen kedau utung de bi tobo'o dapet. 16Tun de dute teko ngen madeak, ‘Tuan, do caci mas de Tuan nelei o bi uku jemijai depuluak.’ 17Nadeakne ngen tun o, ‘Baik sekilai plepnu o, hoi pelayan de baik, ko bi setia lem pekaro titik, kerno o tenimoba kuaso das depuluak kota.’ 18Tekoba pelayan de keduai ngen madeak, ‘Tuan, caci mas Tuan bi masea lemo caci mas.’ 19Nadeakne ngen tun o, ‘Ngen ko, kenuasoba lemo kota.’ 20Pelayan de luyen teko ngen madeak, ‘Tuan, dio caci Tuan; ku maikne lem stangen. 21Sebab uku saben ngen Tuan, kerno Tuan tun de kejam. Tuan mok jano de iso Tuan temuan, ngen Tuan mungut asea neak penan de coa Tuan temanem.’ 22Nadeakne ngen tun o, ‘Hoi pelayan de kidek, uku bakea makim ko temurut keceknu suang. Ko sudo namen bahwo uku adeba tun de kejam, de mok jano de coa perneak uku mpek ngen mopoa jano de coa uku temanem. 23Amen awei o getai ko coa mpek caci o moi bank supayo amen uku belek ku dapet mok caci ngen bungaine?’ 24Lajau nadeakne ngen tun-tun de je neak di, ‘Mokba caci mas de do o kunei padone ngen neleiba ngen tun de temuan caci mas depuluak o.’ 25Nadeak tobo'o ngen si, ‘Tuan, si sudo temuan depluak caci mas.’ 26#Mat. 13:12; Mrk. 4:25; Luk. 8:18 Jawabne, ‘Uku madeak ngen ko: Tiep tun de temuan, ngen si bakea nelei, tapi tun de coa temuan, kunei padone bakea nemok, kulo jano de ade padone. 27Bakea tapi kute musuakku yo, de coa senang uku jijai rajone, mbinba tobo'o moi miyo ngen nunuakba tobo'o neak adep mataiku!’ ”

Yesus masuk moi Yerusalem ngen jayo

(Mat. 21:1-11; Mrk. 11:1-11; Yoh. 12:12-19)

28Sesudo madeak kutene o Yesus demno tobo'o ngen temrus paneu-Ne moi Yerusalem. 29Waktau sapei pa'ok Betfage ngen Betania neak Tebo Zaitun, Si meluak duai tun penotoa-Ne lalau lebiak dute. 30Nadeak Yesus ngen tobo'o, “Lalauba moi sadei mukok'o, amen ko sudo masuk neak di, ko bakea kemliak dikup keledai uai tenambang, de ati perneak tun kemnekne. Nepasba keledai o ngen mbinba moi miyo. 31Amen ade tun temnai ngen ko: ‘Getai ko melepasne?’ Jawabba awei yo: ‘Tuhan perlu ngen si.’ ”

32Lajau lalauba tobo'o de neluak o, ngen tobo'o dapet kute sesuaktau awei de bi Yesus madeak. 33Ketiko tobo'o melepas keledai o, nadeak tun de temuan keledai o, “Getai udi mpas keledai'o?”

34Nadeak tobo'o, “Tuhan perlu ngen si.” 35Tobo'o mbin keledai o ngen Yesus. Lajau mpek lepekne ngen keracok tobo'o ngen temulung Yesus kenek moi dasne. 36Sementaro Yesus kenek moi das keledai o tobo'o metang keracokne neak dalen.

37Ketiko Yesus pa'ok Yerusalem, neak penan dalen menu'un kunei Tebo Zaitun, muloiba kute penotoa-Ne de mi'ing si beriang ngen mujai Allah ngen sa'ei nya'ing kerno kute mujizat de bi tobo'o keten. 38#Mzm. 118:26 Nadeak tobo'o, “Berkatba Si de teko awei Rajo lem gen Tuhan! Damoi sejahtera neak surgo, ngen kemulio Allah neak penan De Kembiak Lekat!”

39Kekedau tun Farisi kunei antaro tun dau o madeak ngen Yesus, “Gu'au, neluakba penotoa-penotoa Bapok diem.”

40Jawab Yesus, “Uku madeak ngen ko! Amen tobo'o yo diem, mako butau yo bakea menggang.”

Yesus selen ngen Yerusalem

41Waktau Yesus bi pa'ok ngen kemliak kota o, Si ngindoi. 42Nadeak-Ne, “Wahai, padeak baikne amen pado bilai yo kulo ko ngertai jano de perlu utuk damoi sejahteranu! Tapi uyo hal o tebunyin bagiak matainu. 43Sebab bakea teko bilaine, bahwo musuaknu bakea gemlung ko, lajau kempung ngen mipit ko kunei kute jurusan. 44Tobo'o bakea majua ko beserto penduduk de ade padonu. Ngen tobo'o coa bakea munyau do butau kulo tinggea teletok neak das butau de luyen, kerno ko coa ngertai waktau ketiko Allah teko utuk semlamat ko.”

Yesus masuk moi lem Umeak Tuhan

(Mat. 21:12-17; Mrk. 11:15-19; Yoh. 2:13-22)

45Yesus masuk moi Umeak Tuhan ngen muloi ba Si musir kute tun jagea neak di. 46#Yes. 56:7; Yer. 7:11 Nadeak-Ne ngen tobo'o, “Ade tetulis: ‘Umeak-Ku adeba umeak du'o.’ Tapi ko jemijaine sa'ang perapok!”

47 # Luk. 21:37 Tetiep bilai Si ngajea neak lem Umeak Tuhan. Imem-imem kepalo ngen gu'au-gu'au agamo serto pemipin-pemipin Yahudi lok munuak Si, 48tapi tobo'o coa namen, arus menea awei ipe sebab kute rakyat tujau ngen Si ngen lok temi'uk Si.

Currently Selected:

LUKAS 19: REJ

Highlight

Copy