LUKAS 12

Peringatan utuk tun-tun munafik

(Mat. 10:26-33, 19-20)

1 # Mat. 16:6; Mrk. 8:15 Beribau tun dedesok sapei ade de tekelat kekeane. Sementaro tun-tun o belungguk, Yesus madeak ngen penotoa-penotoa-Ne, “Atei-ateiba te'adep agai tun Farisi, maksud-Ku, tobo'o munafik. 2#Mrk. 4:22; Luk. 8:17 Coa ade de coa keten, ngen coa ade de resio de coa bakea nukea. 3Kerno o jano de udi nadeak lem kelem bakea teti'uk lem te'ang, ngen jano de udi misik moi ti'uk neak lem kamar bakea nelei namen kunei das atep umeak.”

Sabenba ngen Tuhan

(Mat. 10:28-31)

4“Uku madeak ngen udi, hoi kekuat-Ku, jibeakba udi saben te'adep tobo'o de dapet munuak awok ngen sesudo'o coa dapet menea jejano igai. 5Uku bakea temunjuk ngen udi api de harus udi saben. Sabenba Si, de sesudo munuak, temuan kuaso utuk mbin tun moi lem nerako. Sesungguakne Uku madeak ngen udi, sabenba Si!

6Lemo likup burung pipit jenuoa, go duai matai caci de kembiak titik. Kunyau awei o coa dikup kulo de coa tinget Allah. 7Buk neak ulau nu sudo nitung kutene, sebab o jibeakba saben; udi uak lebiak bego kunei burung-burung pipit!”

Makau Kristus neak muko umum

(Mat. 10:32-33, 12:32, 10:19-20)

8“Uku madeak ngen udi: Tetiep tun de makau Uku neak muko manusio, Anok Manusio kulo bakea makau si neak adep malaikat-malaikat Allah. 9Tapi api muker Uku neak adep manusio, si bakea mukerne neak adep malaikat-malaikat Allah.

10 # Mat. 12:32; Mrk. 3:29 Tetiep tun de miling melawen Anok Manusio, si bakea napun; tapi barang api mino Roh Allah, si coa bakea napun.

11 # Mat. 10:19-20; Mrk. 13:11; Luk. 21:14-15 Amen udi nembin moi umeak-umeak semyang utuk nadea neak adep pemeriteak atau penguaso, jibeakba kuatir tetang awei ipe udi harus mbela dirai atau tetang jano de harus udi madeak. 12Sebab waktau'o kulo Roh Allah bakea majea udi jano de harus udi madeak.”

Perumpamo tun kayo de bodong

13Suang kunei tun dau o madeak ngen Yesus, “Gu'au, nadeakba ngen pasuakku supayo si magiak warisan ngen uku.”

14Tapi Yesus madeak ngen si, “Hoi udi, api de bi maket Uku jijai hakim atau tukang magiak warisan antaro udi beduai?” 15Sesudo'o, ngen kute tun de ade neak di Yesus madeak, “Atei-ateiba ngen waspadaba, jibeak sapei udi tamak. Sebab idup manusio coa tegatung kunei hokne, kunyau hokne kembiak dau.”

16Sesudo'o Yesus madeak ngen tobo'o do perumpamo, Si madeak, “Ade suang kayo, taneakne kembiak dau asea ne. 17Si temnai lem ateine: ‘Jano de harus uku menea, sebab uku coa temuan penan neak ipe uku dapet ma'ik asea taneakku.’ 18Lajau nadeakne: ‘Uku bakea melu'at tuoa-tuoaku ngen uku bakea temje de lebiak lai ngen uku bakea ma'ik neak lemne kute gelpung ngen barang-barangku. 19Sesudo'o uku bakea madeak ngen diraiku suang, ko ade dau barang, tetimbun utuk beta'un-ta'un anne; istirahatba, mukmeiba, menemba ngen beriang-riangba!’ 20Tapi firman Allah ngen si: ‘Hoi udi tun bodong, pado kelmen yo kulo jiwonu bakea nemok kunei ko, ngen jano de bi ko seniap, utuk api?’

21Awei o kulo jijaine ngen tun de kemopoa hok bagiak diraine suang, amen si coa kayo neak adep Allah.”

Pecayoba ngen Allah

(Mat. 6:25-34)

22Yesus madeak ngen penotoa-penotoa-Ne, “Kerno o Uku madeak ngen ko, ‘Jibeakba kuatir ngen idupnu, bakea jano de lok udi mbuk, ngen jibeakba kuatir kulo ngen awoknu, bakea jano de lok udi makei.’ 23Sebab idup o lebiak peting kunei pado kembuk ngen awok o lebiak peting kunei pado bajau. 24Kenliakba burung-burung gagak! Tobo'o coa temanem, coa panen, coa kulo temuan gudang atau tuoa. Tapi Allah semido tobo'o! Ko uak lebiak bego kunei burung-burung! 25Api neak antaro udi de kerno kuatirne dapet temambeak omor panjang lem idupne? 26Jijai, amen udi coa sanggup menea barang de kembiak titik, getai udi kuatir ngen hal-hal luyen? 27#1Raj. 10:4-7; 2Taw. 9:3-6 Kenliakba bungai-bungai bakung idup; bungai-bungai o coa bekerjo, coa kulo menea kain. Tapi Rajo Salomo de kembiak kayo kulo coa makei bajau de ba'esne serai ngen bungai-bungai o. 28Jijai, amen dukut, de bilai yo ade ngen men nuang moi lem opoi awei o kulo nerias Allah, jano igai udi, hoi tun de ku'ang pecayo! 29Jijai, jibeakba udi semoal jano de bakea udi mbuk ngen menem ngen jibeakba ateinu temes. 30Kute o nesoa bangso-bangso neak dunio de coa kemnal Allah. Tapi Bapanu namen, bahwo udi memang perlu kutene o. 31Tapi nesoa ba Kerajaan-Ne, mako kutene o bakea tenambeak kulo ngen udi.”

Hok neak surgo

(Mat. 6:9-21)

32“Jibeakba saben, hoi udi jumlahnu titik! Kerno Bapanu bi senang melei udi Kerajaan o. 33Jenuoba kute hoknu ngen neleiba sedekeak! Meneaba bagiaknu dupet de coa dapet jijai tuai, do hok neak surgo de coa bakea abis, de coa dapet risau mokne ngen coa usak nembuk get. 34Kerno neak ipe hoknu ade, neak di kulo ateinu ade.”

Pelayan de bogoa siap

(Mat. 24:43-51)

35 # Mat. 25:1-13 “Bejago-jagoba madep tiep hal. Ko harus bogoa siap makei bajau ngen lapu nidup. 36#Mrk. 13:34-36 Lokba udi serai awei tun-tun de mbot tuanne de belek kunei pesta nikeak, supayo amen si belek ngen kemtuk bang, segro nukokba bang bagiakne. 37Bahagiaba pelayan-pelayan de tuanne kemliak bejago-jago waktau si teko. Uku madeak ngen udi: sesungguakne si bakea meket pinggangne ngen meluak tobo'o temot mukmei, ngen si bakea teko mlayan tobo'o. 38Sungguak butungne pelayan-pelayan o amen tuan tobo'o kemliak tobo'o gidong siap mbot, kunyau si teko tengeak malem atau lebiak cendok kunei o! 39#Mat. 24:43-44 Tapi namenba dio: Amen tuan umeak namen jam kedau risau bakea teko, si coa bakea munyau umeakne nukok. 40Lokba udi kulo siap sedio, kerno Anok Manusio teko pado saat de coa udi sako.”

Pelayan de setia ngen de coa setia

(Mat. 24:45-51)

41Petrus madeak, “Tuhan, keme de Ko maksud ngen perumpamo o atau kute tun?”

42Jawab Tuhan, “Jijai, api pelayan umeak de setia ngen bijaksana de bakea naket tuanne jijai pemipin das kute pelayanne utuk melei kembuk ngen tobo'o pado waktaune? 43Bahagiaba pelayan, de tuanne kemliak gidong maneu tugasne o, ketiko tuanne o teko. 44Uku madeak ngen udi: Sesungguakne tuanne o bakea maket si jijai pengawas kute hokne. 45Tapi, amen pelayan o kidek ngen madeak neak lem ateine: Tuanku coa teko, lajau si muloi mokoa pelayan-pelayan semanei ngen selawei, ngen mbuk menem sapei mabuk, 46mako tuan pelayan o bakea teko pado bilai de coa ite sako, ngen pado saat de coa ite namen, ngen bakea munuak si ngen menea si senasib ngen tun-tun de coa setia.

47Pelayan de namen kelok tuanne, tapi coa sesiap ngen coa menea kelok tuanne o, bakea nimbet ngen yes. 48Tapi pelayan de coa namen kelok tuanne, sesudo'o menea sesuaktau de saleak sehinggo harus nimbet, bakea nimbet ngen didik bae. Sebab tun de sudo nelei dau, kunei padone bakea tenuntut dau kulo. Ngen tun de sudo pecayo, kunei padone bakea tenuntut dau kulo.”

Iso damoi tapi belawen

(Mat. 10:34-36)

49“Uku teko utuk meluk opoi moi bumai ngen Uku kembiak ma'ep, opoi o bi idup! 50#Mrk. 10:38 Uku harus temimo saro ngen atei-Ku kembiak ragau ayok o tejijai. 51Jano udi sako Uku teko moi dunio mbin damoi? Coa, iso damoi, tapi belawen. 52Kerno muloi kunei uyo bakea ade selisiak antaro lemo tun neak lem do umeak, telau lawen duai ngen duai lawen telau. 53#Mi. 7:6 Bapok bakea mlawen anokne de semanei ngen anok semanei bakea mlawen bapokne. Indok mlawen anokne de selawei ngen anok selawei mlawen indokne. Indok setuang bakea mlawen setamangne de selawei ngen setamang selawei bakea mlawen indok setuangne.”

Kemnal tando zaman

(Mat. 16:2-3)

54 # Mat. 16:2-3 Yesus madeak kulo ngen tun dau, “Amen udi kemliak mbun kenek neak depeak barat, segro udi madeak: ‘Bakea teko ujen,’ ngen hal o memang tejijai. 55Amen udi meding ibut teko kunei Selatan, udi madeak, ‘Bakea panes,’ ngen benea-benea panes. 56Hoi tun-tun munafik, rupo bumai ngen lenget udi namen menilaine, getai udi coa dapet menilai zaman yo?”

Bedamoiba ngen musuak

(Mat. 5:25-26)

57 # Mat. 5:25-26 “Getai udi suang kulo coa temtep jano de benea? 58Sebab, amen udi ngen lawennu lalau madep pemeriteak, berusahoba bedamoi ngen si selamo neak tengeak dalen, supayo jibeak udi sene'etne ngen hakim lajau semreak udi ngen pembantune ngen pembantu o meting ngen moi lem penjara. 59Uku madeak ngen udi: Ko coa bakea keluea kunei di, ayok udi masen utangnu sapei lunas.”

Currently Selected:

LUKAS 12: REJ

Highlight

Copy