LUKAS 13
13
Amen coa betobat kunei duso, udi benaso
1Pado waktau o tekoba ngen Yesus kekedau tun mbin bito tetang tun-tun Galilea, de daleakne cenapua Pilatus ngen daleak kurban de tobo'o sembeak. 2Yesus jemawab tobo'o, “Kerno tun-tun Galilea'o nunuak awei'o, udi sako do'o buktine tobo'o lebiak beduso kunei pado duso kute tun Galilea de luyen? 3Coa! Nadeak-Ku ngen udi. Tapi amen udi coa betobat, udi kute bakea benaso kulo, awei'o. 4Atauk delapen belas tun, de matei teninggang menara pa'ok Siloam, lebiak lai saleakne kunei saleak kute tun luyen de ade neak Yerusalem? 5Coa! Nadeak-Ku ngen udi. Tapi amen udi coa betobat, udi kute bakea benaso awei tobo'o.”
Perumpamo tetang pun ara de coa bebuak
6Lajau Yesus madeak perumpamo yo, “Suang temuan pun ara de idup neak kebun anggurne, ngen si teko utuk mesoa bueak pun o, tapi si coa temau. 7Lajau si madeak ngen tukang kebun anggur o: ‘Sudo telau taun uku teko mesoa bueak pun ara yo ngen uku coa temau. Tembangba pun yo! Utuk jano si idup neak taneak yo ngen sesio!’ 8Jawab tun o: ‘Tuan, kunyauba si idup taun yo igai, uku bakea makua taneak rogok yo ngen melei pupukne, 9mukin taun muko si bebuak; amen coa, tembangba pun o!’ ”
Yesus Kema'en tun bolon pado bilai Sabat
10Pado bilai Sabat Yesus ngajea lem saleak do umeak semyang. 11Neak di ade suang selawei de bi lapen belas taun pasuk roh sehinggo si bolon sapei bukuk baune ngen coa dapet je igai ngen tegok. 12Ketiko Yesus kemliak selawei o, Yesus menok si, madeak ngen si, “Hoi indok, olonnu bi ka'en.” 13Lajau Si mpek tangen-Ne das selawei o, ngen ketiko o kulo je ba selawei o, ngen mujai Allah.
14 #
Kel. 20:9-10; Ul. 5:13-14 Tapi pemipin umeak semyang mengiak ngen Yesus kerno kema'en tun pado bilai Sabat, lajau si madeak ngen tun dau, “Ade num bilai utuk kerjo. Kerno o teko pado saleak do bilai o utuk kena'en ngen jibeak pado bilai Sabat.”
15Tapi Tuhan jemawab si, nadeak-Ne, “Hoi tun-tun munafik, iso tiep tun neak antaronu mpas sapaine atau keledaine pado bilai Sabat kunei kandangne ngen mbinne moi penan menem? 16Iso selawei yo, de sudo lapen belas taun neket Iblis, harus nelpas kunei peketne o, kerno si adeba royot Abraham?” 17Ngen waktau Si madeak awei yo, kute lawen-Ne meding selek ngen kute tun dau senang kerno kute pekaro mulio, de bi Si menea.
Perumpamo tetang soa sawi
(Mat. 13:31-33; Mrk. 4:30-32)
18Mako nadeak Yesus, “Umpamo jano hal Allah meriteak sebagai Rajo ngen jano Uku bakea mbandingne? 19Si umpamo soa sawi, de nemok ngen tembea tun neak kebunne; soa o idup ngen jijai pun ngen burung-burung neak lenget besa'ang pado dan-danne.”
Perumpamo tetang agai
(Mat. 13:33)
20Yesus madeak igai, “Ngen jano Uku bakea mbanding Allah meriteak sebagai Rajo? 21Si umpamo agai de nemok suang selawei lajau nulek moi lem pat puluak cupok gelpung, sapei kembang kutene.”
Bang de sepit
22Sesudo'o Yesus paneu keliling kunei kota moi kota ngen kunei sadei moi sadei samo ngajea ngen temrus pemaneu-Ne moi Yerusalem. 23Lajau ade tun temnai ngen Si, “Tuhan, jano tun de bakea senlamat didik?”
24 #
Mat. 7:13-14
Yesus jemawab ngen tun-tun neak di, “Berusahoba utuk masuk liwet bang de sepit. Sebab, inget! Dau tun berusaho masuk tapi coa dapet. 25Amen tuan umeak bi klongon ngen bi kematup bang, udi bakea je neak luea ngen gemtuk bang samo madeak: ‘Tuan, nukokba keme bang!’ Ngen Si bakea jemawab ngen madeak ngen udi, ‘Uku coa namen kunei ipe udi teko.’ 26#Mat. 7:22-23 Mako udi bakea madeak: ‘Keme bi mukmei ngen menem neak adep-Nu ngen Ko bi majea neak dalen-dalen kota keme.’ 27#Mzm. 6:9 Tapi Si bakea madeak ngen udi, ‘Uku coa namen kunei ipe udi teko. Lalauba kunei adep-Ku, hoi udi kutene de menea kejahatan!’ 28#Mat. 22:13, 25:30 #Mat. 8:11-12 Pado waktau udi kemliak Abraham, Ishak ngen Yakub serto kute nebai beriang neak lem Dunio blau Allah, udi bakea ngindoi ngen saro kerno udi suang nusir moi luea! 29Tun-tun bakea teko kunei Timur ngen Barat, kunei Utara ngen Selatan, ngen bakea beriang neak lem Dunio Blau Allah. 30#Mat. 19:30, 20:16; Mrk. 10:31 Sesungguakne, ade tun de kedong de bakea jijai tun dedute, ngen ade tun de dute de bakea jijai de kedong.”
Keluhan te'adep Yerusalem
(Mat. 23:37-39)
31Pado waktau o teko kekedau tun Farisi ngen madeak ngen Yesus, “Lalauba, teninggeaba penan yo, kerno Herodes lok munuak Ko.”
32Jawab Yesus ngen tobo'o, “Lalauba ngen nadeakba ngen tun de coa beguno o: Uku musir semat ngen kema'en tun, pado bilai yo ngen men, ngen pado bilai de ketelau Uku bakea selsei. 33Tapi bilai yo ngen men ngen telang kedo Uku harus temrus pemaneu-Ku, sebab coa seharusne suang nebai nunuak amen coa neak Yerusalem.
34Yerusalem, Yerusalem, udi de munuak nebai-nebai ngen meluk ngen butau tun-tun de nutus ngen udi! Belulang Uku indau kemopoa anok-anoknu, serai awei indok monok kemopoa anok-anokne neak beak sayepne, tapi udi coa lok. 35#Mzm. 118:26 Sesungguakne umeaknu yo bakea teninggea ngen jijai sunyai. Tapi Uku madeak ngen udi: Ko coa bakea kemliak Uku igai sapei pado saat udi madeak,
‘Diberkatiba Si de teko lem gen Tuhan!’ ”
Currently Selected:
LUKAS 13: REJ
Highlight
Share
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
