LUKAS 14

Yesus kema'en tun bolon pado bilai Sabat

1Pado bilai Sabat Yesus teko moi umeak saleak suang pemipin kunei tun-tun Farisi utuk mukmei neak di. Kute de ade kemliak Si ngen teliti. 2Tetibo tekoba suang de bolon busung de kekea ngen tangenne bekok. 3Lajau Yesus madeak ngen gu'au-gu'au agamo ngen tun-tun Farisi de ade neak di, “Temurut ukum agamo ite, buliak ite kema'en tun bolon pado bilai Sabat atau coa?”

4Gu'au-gu'au agamo ngen tun-tun Farisi o diem bae ngen kema'en si, sesudo'o meluak si lalau. 5#Mat. 12:11 Sesudo'o Yesus madeak ngen tun-tun, “Misalne suang kunei udi temuan suang anok atau dikup sapai de us moi lem sumua pado bilai Sabat, jano si coa bakea segro temarik moi luea anok o atau sapai o pado bilai o kulo?”

6Tapi coa suang kulo dapet jemawab Yesus tetang hal o.

Rendeak atei ngen galok melei

7Yesus kemliak ade tetamu de milaik penan-penan de lebiak baik. Sebab o Si melei ajaran yo ngen tobo'o kute. 8#Ams. 25:6-7 “Amen udi nundang moi pesta ngikeak, jibeakba lalau temot neak kersai kehormatan. Sebab jibeak-jibeak suang luyen de lebiak peting kunei padonu bi nundang kulo, 9supayo tun o, de mundang udi ngen si, jibeak teko ngen madeak ngen udi, ‘Neleiba penan yo ngen tun o.’ Lajau udi ngen selek harus lalau temot neak penan de lebiak tembeak. 10Tapi, amen udi nundang, lalauba temot neak penan de lebiak tembeak. Mukin tuan umeak bakea teko ngen madeak ngen udi, ‘Kuat, silakan temot neak muko.’ Ngen awei yo udi bakea temimo hormat neak muko matai kute tamu de luyen. 11#Mat. 23:12; Luk. 18:14 Sebab tiep tun de melekat dirai bakea tembeak, tapi de tembeak dirai bakea nelkat.”

12Lajau nadeak Yesus ngen tuan umeak, “Amen udi mundang tun utuk pesta mukmei kebilai atau mukmei kelmen, jibeakba mundang kuat atau pasuak, atau keluargo atau kulo tetanggonu de kayo. Sebab pasuak yo tobo'o bakea mundang udi kulo, ngen awei yo udi temimo bales das plepnu. 13Jijai, amen udi made pesta, nundangba tun peset, tun cacet, tun pakuak, ngen tun sutai. 14Ko bakea temimo berkat, sebab tun-tun o coa bakea dapet males kebaiknu. Kebaiknu bakea nales Allah pado waktau tun-tun de baik nidup igai kunei mateine.”

Perumpamo pesta de lai

(Mat. 22:1-10)

15Pado waktau saleak suang de mukmei sesamo neak di temi'uk padeak Yesus, si madeak, “Utung sekilai tun de bakea mukmei sesamo ngen Allah amen Si teko awei Rajo!”

16Tapi Yesus madeak ngen tun o, “Pado do waktau ade suang tun made pesta de lai ngen mundang dau tun. 17Ketiko sudo waktaune utuk muloi pesta, tun o meluak pelayanne lalau ngen tobo undangan ngen madeak, ‘Silakan teko, kutene sudo siap.’ 18Tapi tobo'o sesamo minoi maaf. De dute madeak ngen si, ‘Uku bi temukua kebun ngen uku harus lalau kemliakne, uku minoi maaf.’ 19De luyen madea, ‘Uku bi temukua lemo pasang sapai, ngen lok cemubo sapai-sapai o. Maafba uku.’ 20De luyen igai madeak, ‘Uku tembei nikeak, kerno o uku coa dapet teko.’

21Mako belekba pelayan o ngen semapei kutene o ngen tuanne. Lajau mengiakba tuan umeak o ngen madeak ngen pelayanne, ‘Lalauba ngen segro moi kute dalen ngen gang kota ngen mbinba moi miyo tun-tun cacet ngen tun-tun sutai ngen tun-tun pakuak.’ 22Sesudo'o pelayan madeak, ‘Tuan, periteak Tuan sudo naneu, tapi penan masiak dau.’ 23Lajau tuan o madeak, ‘Lalauba moi dalen-dalen lai ngen gang-gang neak luea kota, ngen densokba tun-tun teko, supayo umeakku penuak.’ 24Sebab Uku madeak ngen udi, ‘Coa ade suang kulo kunei tun-tun de bi nundang o bakea menikmat kembuk pesta uku yo!’ ”

Kute sesuaktau harus nelpas utuk temotoa Yesus

(Mat. 10:37-38)

25Dau tun milem paneu sesamo Yesus. Yesus jemling ngen madeak ngen tobo'o, 26#Mat. 10:37-38 “Amen tun teko ngen-Ku, tapi lebiak kemasiak indokne, bapokne, ngenyanne, anok-anokne, pasuak-pasuakne, ngen diraine suang, si coa nam jijai penotoa-Ku. 27#Mat. 16:24; Mrk. 8:34; Luk. 9:23 Tun de coa lok musung salibne ngen temotoa Uku, coa dapet jijai penotoa-Ku. 28Amen suang kunei udi lok temje do menara, paset si bakea temot mitung kileak biayane supayo si namen jano genep cacine utuk semelsei menara o atau coa. 29Sebab amen tenyato si coa dapet semelseine, pado hal pondasine sudo nea, mako kute tun de kemliak bakea temawai. 30Tobo'o bakea madeak, ‘Tun o muloi temje, tapi si coa sanggup semelseine.’ 31Amen suang rajo de temuan puluak ribau tentra lok beperang ngen rajo luyen de temuan duai puluak ribau tentra, paset rajo o bakea temot temimbang kileak jano si cukup kuet utuk melawen musuakne o. 32Amen si namen bahwo si coa kuet, paset sewaktau musuakne o masiak uak, si bakea mbo utusanne utuk minoi damoi. 33Awei yo kuloba tetiep tun neak antaro udi, de coa melpas diraine kunei kute hokne, coa dapet jijai penotoa-Ku!”

Silai de ambea

(Mat. 5:13; Mrk. 9:50)

34“Silai memang baik, tapi amen silai kulo jijai ambea. Ngen jano si mesin igai? 35Coa ade gunone igai, baik utuk kebun kulo utuk pupuk. Jijai nuang bae. Amen temuan ti'uk, teni'uk!”

Currently Selected:

LUKAS 14: REJ

Highlight

Copy