LUKAS 11

Hal bedu'o

(Mat. 6:9-13, 7:7-11)

1Waktau Yesus bedu'o neak do penan. Sesudo bedu'o, saleak suang kunei penotoa-penotoa-Ne madeak, “Tuhan, najeaba keme bedu'o awei Yohanes majea penotoa-penotoane bedu'o.”

2Jawab Yesus ngen tobo'o, “Amen udi bedu'o, nadeakba:

‘Bapa,

senucaiba gen-Nu;

tekoba Kerajaan-Nu.

3Neleiba keme setiep bilai

kembuk de secukupne.

4Ngen napunba duso keme,

sebab keme kulo mapun setiep tun

de besaleak ngen keme.

Ngen jibeakba munyau kepercayaan keme nyep, waktau keme cenubo.’ ”

5Lajau Yesus madeak ngen tobo'o, “Amen suang neak antaro udi waktau tengeak malem lalau moi umeak suang kuatne, madeak ngen si: ‘Kuat, kinoiba ngen uku telau ruti, 6sebab suang kuatku de gidong ade lem pemaneu singgeak moi umeakku ngen uku coa temuan jejano utuk nelei ngen si.’ 7Misalne kuat de penan udi teko o jemawab kunei lem umeakne awei yo, ‘Jibeak semaro uku! Bang sudo tekucai, uku ngen anok-anokku sudo tidua. Uku coa dapet klongon ngen melei jejano ngen udi.’ ”

8“Uku madeak ngen udi kunyau si coa lok klongon ngen coa dapet melei jejano, tapi kerno ko minoi terus, mako si bakea klongon kulo ngen melei jano de ko minoi. 9Kerno o, Uku madeak ngen ko: Minoiba, mako ko bakea nelei; nesoaba, mako ko bakea dapet; kentukba, mako bang bakea nukok utukko. 10Kerno tiep tun de minoi, bakea temimo ngen tiep tun de mesoa, bakea dapet ngen tiep tun de kemtuk, bakea nukok bangne. 11Coa ade tun tuai, amen anokne minoi kan, bakea nelei dung? 12Atau, amen si minoi tenoa, bakea nelei kalo? 13Jijai amen udi de jahat namen melei pelei de baik ngen anok-anoknu. Jano igai Bapanu de neak surgo! Si bakea melei Roh Sucai ngen tobo'o de minoi ngen-Si.”

Yesus ngen Beelzebul

(Mat. 12:22-30; Mrk. 3:20-27)

14Waktau Yesus musir roh kejahatan keluea kunei tun bisau. Sesudo roh kejahatan o keluea, tun o muloi miling. Mako sele ba tun dau o. 15#Mat. 9:34, 10:25 Tapi ade neak antaro tobo'o madeak, “Si musir roh kidek ngen kuaso Beelzebul, pemipin roh kidek.”

16 # Mat. 12:38, 16:1; Mrk. 8:11 Ade kulo de minoi do tando kunei surgo ngen Si, utuk cemubo Si. 17Tapi Yesus namen pekeran tobo'o lajau madeak, “Tiep kerajaan de tepecuak paset benaso, ngen tiep umeak tanggo de tepecuak, paset berantakan. 18Amen Iblis o kulo tebagiak-bagiak ngen melawen diraine suang, awei ipe kerajaanne dapet beta'en? Sebab udi madeak, bahwo Uku musir roh kidek ngen kuaso Beelzebul. 19Jijai amen Uku musir roh kidek ngen kuaso Beelzebul, ngen kuaso jano penotoa-penotoanu musirne? Sebab tobo'o ba de bakea jijai hakimnu. 20Tapi amen Uku musir roh kidek ngen kuaso Allah, mako sesungguakne Allah meriteak sebagai Rajo sudo muloi meriteak neak tengeak-tengeak udi.

21Amen suang de kuet ngen de lekep senataine jemago umeakne suang, mako amanba kute hokne. 22Tapi amen suang de lebiak kuet semrang ngen maleak si, mako tun de lebiak kuet o bakea mbut kute senatai andalan tun de temuan umeak o, lajau magiak kute barang-barangne.

23 # Mrk. 9:40 Tun de coa bepihak ngen Uku, sesungguakne melawen Uku, ngen tun de coa temulung Uku, sesungguakne musak kerjo-Ku!”

Belekne roh kidek

(Mat. 12:43-45)

24“Amen roh kidek teminggea manusia, roh o keliling moi penan-penan de ke'ing utuk mesoa penan istirahat, tapi si coa dapetne. Kerno o, si madeak: ‘Uku bakea belek moi umeak de bi uku teminggea o.’ 25Mako lalauba si ngen temau umeak o bersih ngen tatur. 26Lajau si keluea ngen majok tujuak roh luyen de lebiak kidek kunei padone, ngen tobo'o masuk seca'o dediem neak di. Mako akhirne keadaan tun o lebiak kidek kunei pado keadaanne semulo.”

Api de bahagia

27Sesudo Yesus madeak awei o, suang selawei kunei antaro tun dau o madeak ngen Yesus, “Sungguak bahagia selawei de melaher ngen melei susu ngen Ko!”

28Tapi Yesus jemawab, “Lebiak bahagia igai tun de temi'uk kecek Allah ngen maneune!”

Tando Yunus

(Mat. 12:38-42)

29 # Mat. 16:4; Mrk. 8:12 Ketiko tun dau gemlung Yesus, madeakba Yesus, “Tun-tun zaman yo adeba jahat. Tobo'o lok do tando, tapi ngen tobo'o coa bakea nelei tando seluyen tando Nebai Yunus. 30#Yun. 3:4 Sebab awei Nebai Yunus jijai tando utuk tun-tun Niniwe, awei o kulo Anok Manusio bakea jijai tando utuk zaman yo. 31#1Raj. 10:1-10; 2Taw. 9:1-12 Pado Bilai Kiamat, Ratu negrai Selatan bakea idup igai sesamo tun-tun zaman yo, ngen temuduak tobo'o. Sebab, utuk temi'uk de najea Salomo de bijak, Ratu o menea pemaneu de kembiak uak kunei ujung bumai. Tapi neak yo uyo ade de lebiak lai kunei Salomo! 32#Yun. 3:5 Pado Bilai Kiamat, penduduk Niniwe bakea idup igai sesamo tun-tun zaman yo, ngen temuduak tobo'o, sebab tun Niniwe o betobat kunei duso-duso tobo'o ketiko Yunus ceramah ngen tobo'o. Tapi neak yo uyo ade de lebiak lai kunei Yunus!”

Te'ang ngen kelem

33 # Mat. 5:15; Mrk. 4:21; Luk. 8:16 “Coa suang kulo de masang lapu lajau mpekne neak beak umeak atau neak beak ratang, tapi neak das kekea lapu, supayo kute tun de masuk, dapet kemliak cahayone. 34#Mat. 6:22-23 Matainu adeba lapu bagiak awoknu. Amen matainu baik, te'angba kute awoknu, tapi amen matainu kidek, kelemba awoknu. 35Kerno o, atei-ateiba, jibeak sapei te'ang de ade padonu o jijai kelem. 36Amen kute awoknu te'ang ngen coa ade de kelem, mako kutene bakea te'ang, serai awei amen lapu tem'ang udi ngen cahayone.”

Yesus semaleak tun-tun Farisi ngen gu'au-gu'au agamo

(Mat. 23:1-36; Mrk. 12:38-40; Luk. 20:45-47)

37Ketiko Yesus selsei majea, suang Farisi mundang Yesus utuk mukmei neak umeakne. Mako masukba Si moi umeak o, lajau temot mukmei. 38Tun Farisi kemliak hal o ngen si sele, kerno Yesus coa mpuk tangen-Ne ayok mukmei. 39Tapi Tuhan madeak ngen si, “Udi tun-tun Farisi, udi mersih de luea kunei makuk ngen pinggan, tapi de neak lem ateinu penuak kekerasan ngen kejahatan. 40Hoi tun-tun bodong, Si de jijai utuk luea, Si kulo de jijai utuk neak lem? 41Tapi, neleiba isaine utuk sedekeak ngen sesungguakne kutene bakea jijai bersih utuknu.

42 # Im. 27:30 Celakoba udi, hoi tun-tun Farisi, sebab udi masen perpuluhan kunei selasiak, inggau ngen kute mecem pucuk, tapi udi coa dulai de adea ngen kasih Allah. De do harus nea ngen de luyen jibeak laloi.

43Celakoba udi, hoi tun-tun Farisi, sebab udi galok temot neak penan de tehormat neak umeak semyang ngen galok temimo hormat neak peken. 44Celakoba udi, sebab udi serai awei kubua de coa makei tando nisan; tun-tun de paneu neak dasne, coa namen.”

45Saleak suang gu'au agamo madeak ngen Yesus, “Gu'au, ngen kecek-kecek o, Ko mino keme kulo!”

46Yesus jemawab, “Celakoba udi kulo, hoi gu'au-gu'au agamo! Sebab udi mpek ban de coa dapet tun mbinne, tapi udi suang coa lok meneane. 47Celako udi, sebab udi menea kubua nebai-nebai, tapi ninik puyangnu bi munuak tobo'o. 48Ngen awei yo udi makau, bahwo udi mbenea plep-plep ninik puyangnu, sebab tobo'o bi munuak nebai-nebai o ngen udi menea kubuane. 49Sebab o hikmat Allah madeak: ‘Uku bakea mbo ngen tobo'o nebai-nebai ngen rasul-rasul-Ku; pa'o kunei antaro nebai-nebai ngen rasul-rasul o bakea tobo'o nunuak ngen tobo'o senikso.’ 50Supayo kunei zaman yo tenutut daleak kute nebai de bi tupeak sejok dunio jenijai, 51#Kej. 4:8; 2Taw. 24:20-21 muloi kunei daleak Habel sapei ngen daleak Zakharia de bi nunuak neak antaro mezbah ngen Umeak Tuhan. Pecayoba: Tun-tun zaman yo paset bakea nukum kerno kutene o.

52Celako udi, hoi gu'au-gu'au agamo. Sebab udi bi mok kucai lemau; udi suang coa masuk moi lem ngen tun de berusaho utuk masuk moi lem udi temgeak!”

53Waktau Yesus teminggea penan o, gu'au-gu'au agamo ngen tun-tun Farisi ngecam Yesus ngen lek. Tobo'o muloi macing Si supayo Si lok miling tetang dau hal. 54Ngen sementaro o tobo'o kemliak Si bebaik utuk temakep sesuaktau de si saleak kecek.

Currently Selected:

LUKAS 11: REJ

Highlight

Copy