MARIKO 14

Lilohiza mu vwivisi ukwita Yeso

(Mat. 26:1-5; Luk. 22:1-2; Yoh. 11:45-53)

1Gaali ni gakikiri amadiku gaviri vuzwa Lisavo lie Lipasaka numugadi gutali na mamera liduuki. Avasaalisi vanene na avigizi vi Lilaga vaali ni venya inzira yu kugumilira Yeso mu vwivisu vaduuki kumwita. 2Navuzwa vavoola, “Kutamugumira ing'inga yi Lisavo mba kigira avandu valakola liyoga.”

Mukali yavaka Yeso maguta ha Bezani

(Mat. 26:6-13; Yoh. 12:1-8)

3Lwa Yeso yaali niyikaye nalizaa munyumba ya Simoni waali novogere mu lidaala lia Bezani, umukali mulala yaza ni ijuba ya maguta gu mwayu agu vuguli vonene. Yatanyia ijuba, ni yitulura amaguta yago ku mutwi gwa Yeso. 4Valala ku vandu vaali ho vakendeka ni vavoola, “Kigira ki amaguta yaga gasundulwa vuzwa kuli ndi? 5Ngano gaali gagulizwi mabese gaduukanaa zidinari mia tatu zilahevwe avadaka!” Vagondekera mukali oyo.

6Navuzwa Yeso yavavolera, “Leki ave! Kigira ki mumukubizaa ikivi? Ongoleeye ikindu ikilahi. 7Munyi muvezaa na avadaka vuli kazozo, na munyala kuvakonya ing'inga yoosi ya muyanzaa. 8Navuzwa inzi sindava ni munyi vuli kazozo mba. Umukali uyu akoli aganyala; avaki umuviri gwange amaguta imbiri wagukiri kuyavirwa. 9Muvooleraa, hoosi mu lirova ahi Ivangeri ya Nyasaye ilakilwazwe, kekolwa chu mukali uyu akoli yiki kilakavolwe ku mwizulizaa.”

Yuda yavugilira kuzaama Yeso

(Mat. 26:14-16; Luk. 22:3-6)

10Maku Yuda Esikarioti, mulala ku aviigi likomi na vaviri, yazia ku vasaalisi vanene aduuki kuzaama Yeso kuvo. 11Lwa Vasaalisi vanene vahulira amakuva yago, vayaanza ni vamulaga valamuha mabese. Maku Yuda yaatanga kwenya uvwiyangu uvulahi vwu kuhaana Yeso kuvo.

Yeso yalohiza kulia Lipasaka na aviigi veve

(Mat. 26:17-25; Luk. 22:7-14,21-23; Yoh. 13:21-30)

12Ku lidiku liu kutanga lie Lisavo liu Mugadi gutali na mamera, ing'inga ye vimeme via magondi vie Lipasaka viitwa, aviigi veve vamuteeva, “Wenyaa kuzie kokolombera hayi ichukulia chi Lipasaka?”

13Maku Yeso yatuma vaviri ku aviigi veve navavoolera, “Muzie mu lidaala na mulagaana nu mundu nagingi isiongo ya mazi, na mumulonde 14kuduuka munyumba ya yingira mu, muvoolere mwene inyumba, ‘Mwigizi avoora: Eveeye hayi inyumba ya aviigi vange harara nainzi kumanya kuliri mu ichukulia chi Lipasaka?’ 15Naye alamumanyia inyumba enene eveeye igulu imali kolombwa kandi yetegeki, mulombe havundu yaho.”

16Aviigi vaatura nivazia mu lidaala ni vanyoola ivindu viosi kuli Yeso yavavolera, ma nivalomba ichukulia chi Lipasaka.

17Lwa gwaduuka mugolova, Yeso yaza harara na aviigi veve likomi na vaviri. 18Nivaveeye komesa ni valiza, Yeso yavavolera, “Ligali muvooleraa mulala ku munyi alaanzaama, uyu uliizaa harara ninzi.”

19Hene yaho aviigi veve vataanga kovelera ni vamuteeva samulala, “Ninzi noho?”

20Yeso yavavolera, “Nimulala ku munyi likomi na vaviri odongeraa umugadi musahani harara ninzi. 21Ligali Mwana wa Adamu alakuza kuli Mang'oda Matakatifu gavoora kuye, navuzwa kilaamo keveeye ku mundu uyu uzamaa Umwana wa Adamu. Vwali vulahi umundu oyo kali alavula kwivulwa!”

Lipasaka liu Mwami

(Mat. 26:26-30; Luk. 22:14-20; 1 Vakor. 11:23-25)

22Lwa vaali nivalizaa, Yeso yavugula umugadi nasandiza, nameganyia, nahaana ku aviigi veve navoora “Vuguli; yigu nu muviri gwange.”

23Yavugula kandi ekekombe, nasandiza Nyasaye, na avaha; navo vaanwera mu kekombe yicho. 24Yeso yavavolera, “Yaga na masahi gange gi lilagana, agasunduliywi kigira avandu vanyingi. 25Ligali muvooleraa, sindanwa kandi iwaini yi mizabibu kuduuka lidiku yilio lwa ndakanwi iwaini imbia mu Vwami vwa Nyasaye.”

26Lwa vamala kwimba ulwimbu, vaatura nivazia mu Kiguru cha Mizeituni.

Yeso yaporofeta ndi Petero alakamwambakane

(Mat. 26:31-35; Luk. 22:31-34; Yoh. 13:36-38)

27Yeso yavolera aviigi veve, “Munyi mwosi muliluka mundeke kigira Mang'oda Matakatifu gavoora, ‘Ndakuya umwayi na amagondi galasalanywa.’ 28Navuzwa nindakamara kusimugukizwa kutura mu vakuzu, nditangilira kuzia Galilaya.”

29Petero yamuvolera, “Kali niiva avandi vosi valakakwiluki no kokoleke, inzi sindakakoleka mba!”

30Yeso yamuvolera, “Ligali ngovolera, uvudiku vwa lero, idaywa ni kikiri kulagula haali kaviri, ivi ulanyambakana haali kavaga.”

31Navuzwa Petero yavoola ni zinguru, “Kali niiva gandukira kukuza harara na ivi, sindakwambakana kali hakuzu.”

Kandi aviigi vosi vavoola malala mere.

Yeso yasaala mu Gezisemane

(Mat. 26:36-46; Luk. 22:39-46)

32Yeso harara na aviigi veve vaduuka mu mulimi gwalangwa Gezisemane. Yeso yavolera aviigi veve, “Yikali hano ningizia kusaala.” 33Yavugula Petero, Yakobo na Yohana harara naye; natanga kohenda umwoyo no kovelera ligali. 34Navavoolera, “Mbeeye no vovereri ovonene ligali mu mwoyo, kali kuduuka ku likuza. Mwikale hano mulindi.”

35Yisunda hambiri hakekeke, naagwa hasi, nasaara. 36Yavoola, “Baba wange, ivindu viosi vinyalikaa kigira ivi Tuliza ekekombe chu vusaliri yiki ku inzi. Gatava kuli inzi nyenya, navuzwa gave kuli ivi umwene wenyaa.”

37Maku, Yeso yirana ku aviigi vaali vavaga yavo nanyoora ni vagona. Yavolera Petero, “Simoni, okegonaa? Siwaali unyala kulinda kali isa ndala yenyine mba?” 38Yavavolera kandi, “Mulindi, musaale ku muvuli kugwa mumagerizu. Ligali umwoyo guvugiliraa, navuzwa umuviri goveeye umudedekere.”

39Yazia nasaara amakuva malala mere. 40Lwa yirana, yanyoora aviigi yavo nivagonaa kigira izimoni ziavo ziali ni zindoolo. Si vaali ni chavamutivulira mba.

41Lwa yirana lwa kavaga yavavolera, “Mukegonaa, kandi mukesosaa? Gaduuki! Ing'inga iduuki! Henza Mwana wu Mundu azizaa kuhaanwa mu makono ga avoni. 42Musingiri kuzie! Heenzi! Uyu unzamaa aveeye ahimbi.”

Ligumirwa lia Yeso

(Mat. 26:47-56; Luk. 22:47-53; Yoh. 18:3-12)

43Nonoho lwa Yeso yaali nakemoloma, Yuda, mulala ku avaari likomi na vaviri yaduuka harara ni kiduma cha vandu nivagingi ivivavi ni vigurumi. Avandu yavo vaali nivatumiywi na vasaalisi vanene, avigizi vi Lilaga, na vakulundu. 44Umuzaami Yuda yaali navaheeye ikimanyiru kovora: “Umundu wa inzi naambusi, umwene oyo naave niyie Yeso. Mumugumiri, ma mumuhili naveeye mu vulindi uvudinyu.”

45Lwa Yuda yaduuka, yazia ku Yeso vwangu na namuvolera, “Mwigizi!” Ma naamuvusa. 46Avandu yavo vagumira Yeso nivamuvoha. 47Navuzwa mulala ku avaari nivasingiyi ahimbi na Yeso yasomola ikivavi chiche naatema ugutu gwu umutumikiri wu Musaalisi Munene.

48Yeso yavateva, “Muturi ni vivavi ni vigurumi kung'umira kuli avazizaa kugumira umunuuri? 49Lidiku liandaaveyange ni munyi mu Litembeli, ni nzigiza, si mwang'umira mba. Navuzwa kalunu gaduukanaa Mang'oda Matakatifu gatwekizwi.”

50Hene yaho, aviigi veve vosi vamuleka niviruka.

51Muyaayi mulala yalonda Yeso ni yiviiki inguvu yu luvaala. Vageriza kumugumira, 52navuzwa, yazonoka naavalekela uluvaala zana ni yiruka chahonyo.

Yeso imbiri wi kiyaalo

(Mat. 26:57-68; Luk. 22:54-55,63-71; Yoh. 18:13-14,19-24)

53Maku vaahira Yeso ku Musaalisi Munene munyumba yeeye; avasaalisi vandi vosi, avakulundu na avigizi vi Lilaga vavuganira mu. 54Petero yalondelera Yeso ihale kuduuka ni yingira ha mujizi hu Musaalisi Munene, ni yikala harara na avasikari ni yotaa umuliru. 55Vasaalisi vanene harara ni kiyaalo choosi venyeleriza amakuva gukuyalira ku Yeso vaduuki kumwita, navuzwa si vaganyoola mba. 56Avandu vanyingi vaamugina amakuva, navuzwa gaazana si sigavugilizana mba.

57Avandi vasingira ni vaamugina nokovoora ovovehi kuye ni vavoola, 58“Kwahulira umundu uyu navoora, ‘Ndasambura Litembeli liumbakwa na amakono ga vandu, ninzi ndumbaka ilindi mu madiku gavaga iliavula kwumbakwa na avandu.’ ” 59Kali ndio gavavoola sigavugilizana mba.

60Musaalisi Munene yasingira imbiri wavo vosi nateeva Yeso, “Ivi sioveeye unyala kutivula kindu mba? Avandu yava vavoola ki ku ivi?”

61Navuzwa Yeso yakiring'ana kandi siyaativula likuva liosi kali lilala mba. Musaalisi Munene yamuteeva, “Ivi niyie Mesia, Mwana wa Nyasaye Wuvugasu?”

62Yeso yativura, “Inzi niyie. Mulalora Mwana wu Mundu niyikaye ku mukono mulungi gwa Nyasaye Wuvunyali, kandi niyazaa mu malesi gigulu.”

63Ilene yaho Musaalisi Munene yatandula izinguvu zizie muvutima, navoora, “Kwenyera ki avalolekizi vandi? 64Munyi mumali kuhulira linyega lilie. Muloraa ndi?” Vosi vamukalagira kuli adukanaa yiitwi.

65Valala kuvo vataanga kumutuuzira amate. Vamufuma mu zimoni nu kumuduya nivamuvoolera, “Porofeta, nivwaha ukuduyi!” Avasikari vaamuvugura nivamukuya.

Petero yambakana Yeso

(Mat. 26:69-75; Luk. 22:56-62; Yoh. 18:15-18,25-27)

66Lwa Petero yaali indangu hamugizi, umukana mulala mutumikiri wu Musaalisi Munene yaza. 67Lwa yalora Petero niyotaa umuliru, yamuhenza namuvolera, “Kali ivi waali harara na Yeso Munazareti.”

68Navuzwa Petero yambakana navoora, “Inzi simumanyi kandi simbulira aga ivi ovola mba!” Petero yatura ichova nazia mu kirivwa. Idaywa yalagula ing'inga yene yeyo.

69Umukana oyo yalora Petero, na yaatanga kovoolera kandi avandu vaali ni vasingiyi ho, “Umundu uyu ni mulala kuvo.” 70Navuzwa Petero yambakana kandi.

Lwinyima hakekeke, avandu vaali ni vasingiyi ho vavoolera Petero, “Agiligali oveeye mulala kuvo kigira uturaa Galilaya.”

71Navuzwa Petero yaatanga kwisuuha navoora, “Inzi simanyi umundu wa vuvoolaa uyu mba.”

72Nonoho, idaywa yalagula lwa kaviri. Hene yaho Petero yizuliza kuli Yeso yaali namuvooleye, “Idaywa nikikiri kulagula haali kaviri, ivi ulanyambakana haali kavaga.” Lwa Petero yizuliza amakuva yago, yavelera kandi natiguka maliga.

Currently Selected:

MARIKO 14: LOGOOLI

Highlight

Copy