MARIKO 15

Yeso yahilwa imbiri wa Pilato

(Mat. 27:1-2,11-14; Luk. 23:1-5; Yoh. 18:28-38)

1Lwa vwaduuka mugambazuri, avasaalisi vanene harara navakulundu na avigizi vi Lilaga harara ni kiyaalo choosi, vateevana icha vanyara kokora. Kunangwa vavoha Yeso ni vaatura naye, kandi nivamuhila ku Pilato. 2Pilato yateeva Yeso, “Ivi niyie Mwami wa Vayuda?”

Yeso yamutivulira, “Ivi ovooye.”

3Vasaalisi vanene vayaala Yeso ku vindu ivinyingi,

4Pilato yateeva Yeso kandi, “Ivi oveeye ku ni kindu cha unyala kutivula? Henza kuli vavoola amakuva manyingi ku ivi gu kukuyaala!”

5Yeso yasura kovora likuva; kunangwa Pilato yaaluha nagenya.

Yeso yakalagirwa likuza

(Mat. 27:15-26; Luk. 23:13-25; Yoh. 18:39—19:16)

6Vuli ing'inga yi Lisavo lie Lipasaka Pilato yaali ni yanala kovoholora umuhambe mulala uwa vandu vaatovora. 7Ing'inga yene yeyo, umundu walangwa Baraba yaali naveeye muvuhambe harara na vandu vu kwibaala avaari ni vavofwa kigira ilihiolo liu kwita. 8Kiduma cha vandu chaza ku Pilato ni kimuteeva akole kuli yavakoleraa kazozo. 9Pilato yavateva, “Mwenya mbohololere Mwami wa Vayuda?” 10Yavoola ndio kigira yamanya vasaalisi vanene vaali nivaleeti Yeso kuye kigira embodoka.

11Navuzwa vasaalisi vanene vaazuva no kogemehiza ikiduma cha vandu vateeve Pilato avoholore Baraba. 12Pilato yavateva kandi, “Mwenya ngole ndi mundu wa Mulangaa Mwami wa Vayuda uyu?”

13Vandu vosi vahanzuka nu mwoyo munene nivavoora, “ Muvambe!”

14Pilato yavateva, “Kigira ki? Akoli vudamanu ki?” Navuzwa vameeda kuhanzuka nu mwoyo munene ligali, “Muvambe!”

15Pilato yenya kuyaanziza ikiduma, kunangwa yaavoholora Baraba kutura muvuhambe, na yahaana lilago Yeso akuywi no lokova kandi avambwe.

Vasikari vakolera Yeso kehenyahenye

(Mat. 27:27-31; Yoh. 19:2-3)

16Avasikari vaahira Yeso mu nyumba ya gavana, ma nivavungiza umuganda gwosi gwa vasikari. 17Vamuvika iganza yu muzambarao, nivanava itaji ya mafwa nivamuviika ku mutwi. 18Maku vataanga kumucheliza, “Ahindiri Umwami wa Vayuda!” 19Vamukuya ku mutwi nimbimbu, vamutuuzira amate, vaagwa ku maru gaavo, kandi nivamwinamira. 20Lwa vaali ni vakamala ku mukolera ekehenyahenye, vaamutuliza inguvu yu muzambarao ni vamuvika izinguvu zizie ma nivamuhila kuvambwa.

Yeso yavambwa

(Mat. 27:32-44; Luk. 23:26-43; Yoh. 19:17-27)

21Kunzira nivazizaa, vaagana nu mundu mulala walangwa Simoni, wilidaala lia Kurene. Yaali baba wa Alekisanda na Rufasi, lwene yilwo yaali natura mu mulimi. Vamuniga naginga umusalaba gwa Yeso. 22Kunangwa vaahira Yeso havundu halangwa Gologoza, liveeye kovora, “Havundu hi Kihanga.” 23Vamuha iwaini izugaani na manemane#15:23 Iwaini izugaani na manemane: Eveeye kovora amazi gaveeye nu vulimbu kutura ku musaala na gatumikilangwa kolomba ivifunya mwayu nitali gaveeye malulu ligali., navuzwa yasura kunwa. 24Maku vaamuvamba, kandi ni vagavulana izinguvu zizie, nivazikubira ikura valore iyavuli mundu anyoora. 25Yaali saa tatu zia mugamba lwa vamuvaamba. 26Amang'oda gi liyaalwa lilie gaali ndi: “MWAMI WA VAYUDA” 27Vamuvaamba harara na vanuuri vaviri, mulala ku mukono gwigwe umulungi nu wundi ku mukono gwigwe mumosi. [ 28Hene yaho gaduukizwa Amang'oda Matakatifu agaavoola, “Yavikwa harara na voni.”]

29Avandu vavita ahene yaho vaamunyega, vasung'usa imitwi jaavo nivavoora, “Ehe! Ivi waali niwenya usambuli Litembeli kandi uliumbaka ku madiku gavaga! 30Wehonyie ivi umwene kandi wiki kutura ku musalaba!” 31Avasaalisi vanene harara na avigizi vi Lilaga vamukolera ekehenyahenye kandi nivavoora, “Yahonyia avandi, navuzwa sianyala kwehonyia umwene mba! 32Leki kolole Kristo, Mwami wa Isiraeli yiki kutura ku musalaba kalunu kunangwa kuduuki kumulora nukumusuuvira!” Kali avandi avavambwa harara naye vaamunyega.

Likuza lia Yeso

(Mat. 27:45-56; Luk. 23:44-49; Yoh. 19:28-30)

33Kutura saa sita zia mbasu kuduuka saa tisa, ikisundi chakunika ikivala choosi. 34Lwa yaduuka zisa tisa Yeso yalira nu mwoyo umunene navoora, “Eloi, Eloi, lama sabakatani?” Liveeye kovora, “Nyasaye wange, Nyasaye wange, kigira ki ondeki?”

35Valala ku vandu vaali nivasingiyi ho, lwa vahulira agene yago vavoola, “Huliri! Alaangaa Elija.” 36Mundu mulala yanyagura ni yiina isiponji mu isiki#15:36 Isiki: Yiyi ni iwaini eveeye induru ligali. naviika kisala naamuha anwi navoora, “Lindi kolole niiva Elija alaza kumwikiza kutura ku musalaba!”

37Yeso yahanzuka ma nakuza.

38Inguvu yaali mu Litembeli yatanduka hagati kutura yigulu kuduuka hasi. 39Munene wa vasikari uwaali nasingiyi imbiri weve yalora kuli Yeso yalira ma nakuza, yavoola, “Agiligali umundu uyu yaali Mwana wa Nyasaye!”

40Avakali valala avahenzeraa ihale, navo vaali Maria Magadalena, na Maria mama wa Yakobo mukekeeke kandi wa Josefu na Solome. 41Aveene yava valonda Yeso lwa yaali Galilaya ni vamutumikira. Vaali ho kandi avakali vandi avanyingi avaazia naye Jerusalemi.

Liyavirwa lia Yeso

(Mat. 27:57-61; Luk. 23:50-56; Yoh. 19:38-42)

42Lwu mugolova gwaduuka, lidiku liu kwetegekera Lisabato, 43Josefu wa Arimazia, mukulundu wu luyali, mulala ku vakalagi, uwalindiliraa liza liu Uvwami vwa Nyasaye, yaluvirira nazia ku Pilato nateeva umuviri gwa Yeso. 44Pilato yaagenya kuhulira ndi Yeso umali kukuza. Yalanga munene wa vasikari namuteeva niiva Yeso yaali nakuzi kale. 45Lwu Munene wa vasikari yavolera Pilato Yeso umali kukuza, yaavugilira Josefu kuvugura umuviri gwigwe. 46Josefu yaagula inguvu yi katani, ni yikiza umuviri kutura ku musalaba, nagulingira mu inguvu, namuviika mu kilindwa ichaali ni chavazwa mu lwanda. Maku yagomagominya ligina linene, nu kuhana ikilindwa. 47Maria Magadalena na Maria mama wa Josefu valora ha yavikwa.

Currently Selected:

MARIKO 15: LOGOOLI

Highlight

Copy