MARIKO 13

Yeso yamoloma kigira lidiviza lie Litembeli

(Mat. 24:1-2; Luk. 21:5-6)

1Lwa Yeso yaali naturaa mu Litembeli, mulala ku aviigi veve yamuvolera, “Henza! Amagina ne zinyumba ziokogenyia!”

2Yeso yamuvolera, “Olola izinyumba zinene yizi? Iligina kali lilala sililatigala mu vwiyangu vwaliveeye mu yivu mba; vuli ligina lilakalaswi hasi.”

Ikivi ni lidambizwa

(Mat. 24:3-14; Luk. 13:3-13)

3Yeso yaali niyikaye mu Kiguru cha Mizeituni imbiri wi Litembeli, lwa Petero, Yakobo, Yohana na Andereya vamuteeva naveeye yenyine. 4“Kovolere yaga ganyala kokoleka ing'inga ki? Kelolekizu ki ikilimanyia ivindu yivi viveeye ahimbi kokoleka?”

5Yeso yavavolera, “Mugerihi, umundu atamugada mba. 6Avandu avanyingi valaza mu lieta liange nivavoora, ‘Inzi niye,’ na valagotiza vandu vanyingi. 7Lwa muhulira amahi nu lusuma lwa amahi, mutahenda imioyo jinyu mba. Ivindu yivi kuduuka vikoleke; navuzwa ekeheri kikikiri kuduuka. 8Ihiiri ilavukira ihiiri; uvwami vulavukira uvwami kuvulwaana. Halava ni lidegera lie lirova hoosi na hoosi mu vivala ivinyingi, kandi halava ninzara mu lirova. Ivindu yivi viveeye vuzwa ilitanga liu vusaliri.

9“Munyi aveene muve avageri. Avandu valakamuzaame, nukumugumira nukumuhira mu viyaalo. Kandi valakamukuyiri mu masinagogi. Mulakasingiri imbiri wa vamiihi na avami vanene vikivala kigira inzi, muduuki kuva avalolekizi vange kuvo. 10Navuzwa Ivangeri kuduuka yilwazwe kutanga ku zihiiri ziosi. 11Lwa vamugumira nu kumuhila mu viyaalo, mutahenda mioyo kigira agamuduukanaa kovora mba. Navuzwa muvoore amakuva goosi agamulihevwa ing'inga yeyo kigira simuveeye ni munyi avalivoola, navuzwa Roho Mutakatifu. 12Mundu alazaama amwavo weve ukwitwa, kandi baba alazaama umwana weve; na avana valingilira aviivuli vaavo nu kuviita. 13Avandu vosi valakamusuuli kigira ilieta liage. Navuzwa uyu uliekuzira kuduuka kukeheri alakahonywi.

Vusaliri vonene

(Mat. 24:15-28; Luk. 21:20-24)

14“Mulalora ‘Kindu kidamanu ligali keleetaa lidiviza’ nikisingiyi ahataduukana kisingiri.” Ivi osoma; Ove na agiligali kumanyiriza icha yaga gavoora! Hene yaho avandu yavo avaveeye Ivuyuda kuduuka vilukiri mu vigulu. 15Umundu oveeye ku kesegese chi inyumba atiika hasi yingiri munyumba kuvugura ikindu choosi mba. 16Na uyu oveeye mu mulimi atiirana kuvugura inguvu yeeye mba. 17O, vayaye vulakave vudinyu ku vakali avaliva ni zinda, kandi yavo avaliva nivanyunyia avana avadoto mu madiku yago! 18Musaale amakuva yago galavuli kwekoleka ing'inga yu vukindu! 19Kigira mu madiku yago, kulakave nikivi ekenene kikikiri kuva ho kutura Nyasaye nalomba ilirova kuduuka lero, na ikivi kuli yiki sikilakaveho kandi mba. 20Navuzwa Umwami yayimbihiza amadiku gene yago; alavula kwimbihiza amadiku, avandu vosi vaali vakadivi. Navuzwa kigira avandu veve avatovole, Umwami yayimbihiza amadiku yago.

21“Niiva umundu alakovolera, ‘Henza! Mesia nguyu aveeye hano!’ Anoho, ‘Henza! Ngula aveeye hala!’ Mutasuuvira mba. 22Kigira avamesia na vaporofeti vovovehi valatura nokokola ivilolekizu harara na agokogenyia, vaduuki kogotiza avatovole va Nyasaye, niiva ganyalika. 23Navuzwa mugerihi! Inzi mali kumuvolera ivindu viosi nivikikiri kuduuka.

Iliiza liu Mwana wa Adamu

(Mat. 24:29-31; Luk. 21:25-28)

24“Navuzwa mu madiku yago, inyima yi kivi yicho, iliuva lilakamwame, nu umweli si gulakake mba. 25Zing'ereng'ani zilaaguluka kutura mwigulu, zinguru ziu mwigulu zilakadengeyizwi. 26Hene yaho valalola Mwana wa Adamu niyazaa mu malesi ni zinguru zinene nu vukumi. 27Maku Kristo alatuma zingelosi veve kuvungiza avatovole veve kutura mu zimbega ziosi zine zie lirova kutura ku keheri chi lirova kuduuka ku kindi.

Amigizu kigira musaala gwu mukuyu

(Mat. 24:32-35; Luk. 21:29-33)

28“Kalunu gaduukanaa mwigi kutura ku lugano yilu lwu musaala gwu mukuyu. Lwi zisia ziagwo zitanga kusivuka, nu kutuliza amatu amadoto, mumanye ing'inga yu kutaga eveeye ahimbi. 29Lwa muloraa ivindu yivi nivikolekaa kandi, mumanye Mwana wa Adamu aveeye ahimbi kuuza. 30Mwizurizi ndi ivindu yivi viosi vilakakolekane avandu avaveeye mwoyo nivakili kukuza. 31Ligulu ni lirova vilavita navuzwa amakuva gange sigalavita mba.

Sihaveeyeho numanyi ing'inga

(Mat. 24:36-44)

32“Navuzwa sihaveeyeho nu mundu umanyi lwi lidiku yilio anoho ing'inga yeyo iliduuka mba kali zingelosi vu mwigulu, anoho Mwana, natali Baba yenyine niyie umanyi. 33Muhenze, mulindi kigira simumanyi lwi ing'inga yeyo iliduuka mba. 34Gaiakave kuli umundu utura hango hehe azia mu logendo ma alekera avatumikiri veve uvunyali, sa mulala numuyinzi gwigwe, kandi avooreraa umulindi wi kiliango alindi vulahi. 35Kulwayago munyi kandi mulindi kigira simumanyi lwu mwene winyumba alirana mba. Niiva alirana hamugorova, anoho mu vudiku hagati, anoho muzidaywa, anoho mugambazuri. 36Mulindi gase alaza vwangu ma amunyoole ni mugonaa. 37Agambooraa ku munyi, mbolera vosi kandi: Mulindi!”

Currently Selected:

MARIKO 13: LOGOOLI

Highlight

Copy