MARIKO 12

Lugano lwu mulimi gwi kizabibu na valimi

(Mat. 21:33-46; Luk. 20:9-19)

1Yeso yaatanga komoloma navo mu zing'ano, navoora, “Mundu mulala yasimika mizabibu, naviika kujo ulugaga, nayava kiminilu chiwaini, ni yumbaka umunaara gwu mulindi kohenzera avasigu. Maku yahaana kizabibu ku nazia ologendo mu kivala kindi. 2Lwi ing'inga yu kuvuna mazabibu yaduuka, yatuma umutumikiri ku valimi amuvuguliri ku makuyu gimizabibu. 3Avalimi yavo va mugumira ni vamukuya, ni vamukunga vugira ikindu. 4Yatuma kandi umutumikiri wundi kuvo; umwene oyo vamwata izing'oma kandi ni va mukolera agizisoni. 5Yatuma umutumikiri wundi kandi, na mwene oyo vamwita. Avandi avanyingi vaatumwa, valala kuvo vaakuywa, na vandi ni viitwa.

6“Yaatigara umundu mulala wukutuma naye nu muyaayi weve umuyanze. Lwu kumaliriza, yatuma umwene oyo navoora, ‘Valatia, kigira nu muyaayi wange.’ 7Navuzwa avalimi yavo vavolerana aveene ku aveene, ‘Uyu niyie ulinyoola imiandu; gendi kumwiti kunangwa imiandu josi jilave ijietu!’ 8Maku vamugumira ni vamwita, kandi nivamusiuva ichova wi kizabibu.

9“Kigira yaga, umwene mulimi alakakole ki? Alakaze kwita avalimi yavo nu kuhaana ku avandi umulimi gwi mizabibu. 10Munyi mu kikiri kosooma Mang'oda Matakatifu yaga?

‘Ligina liavumbaki vasuura,

liakolwa ligina linene liu mukoona.

11Mwami niyie wakola yaga, na gaveeye gokogenyia mu zimoni zia vandu!’ ”

12Avasaalisi vanene, avigizi vi Lilaga na vakulundu vageriza kugumira Yeso kigira vamanya yaali navooye ulugano yilu kigira yavo. Navuzwa vaatia ikiduma cha vandu; ku vamanya nivatura ho.

Liteeva kigira litunga uvusuru ku Kaisari

(Mat. 22:15-22; Luk. 20:20-26)

13Valala ku Vafarisayo na valala ku valondi va Herodi vaatumwa ku Yeso vamugerizi na mateeva. 14Vazia kuye ni vamuvolera, “Mwigizi, kumanya ivi oveeye umundu wiligali vugira kodegerizwa na goosi ga vandu vavoola. Si ohenza ku vuduukiru vwu mundu mba, navuzwa wigiza agiligali ginzira ya Nyasaye. Ni vulahi kutunga uvusuru ku Kaisari#12:14 Kaisari: Liveeye kovora, “Mwami munene wa Varumi.”, anoho kuvuli kutunga?”

15Navuzwa Yeso yamanya uvugadi vwavo, navavoolera, “Kigira ki mungerizaa? Ndeteri isiringi mbenze ku.”

16Vamuleetera silingi ndala, naye yavateva, “Kifananyi yiki harara ni ling'oda yili ni via vwaha?” Vaamutivulira, “Ni via Kaisari.”

17Yeso yavavolera, “Muhaane ku Kaisari ivindu via Kaisari, na Nyasaye ivindu via Nyasaye.” Navo vaamugenyela muno.

Liteeva kigira lisimuguka

(Mat. 22:23-33; Luk. 20:27-40)

18Valala ku Avasadukayo, avavolaa sihaveeyeho ni lisimuguka lia vakuzu, vaza ku Yeso ni va muteeva, 19“Mwigizi, Musa ya kong'odera mu lilaga ndi: ‘Umundu nakuza naleke mukali weve vugira umwana, amwavo weve anyala kwilanyia umukunzakali oyo yivuliri amwavo weve wakuza avana.’ 20Ku, vaali ho avamwavo saba. Wukutanga yaleeta umukali, ma nakuza vugira koleka umwana. 21Amwavo weve wakaviri yiranyia umukunzakali oyo; naye kandi nakuza vugira koleka umwana; kandi amwavo weve wa kavaga yaali ndio. 22Ma kandi ku vosi, avamwavo vosi saba valeta mukali zana oyo, kandi vaakuza vugira koloka mwana. Lwukumaliriza umukunzakali mwene naye yakuza. 23Kalunu, lwa avakuzu vosi valisimuguka ku lidiku lie lisimuguka, mukali uyu aliva wa vwaha? Kigira avamwavo yavo saba vosi vaali naye kuli umukali wavo.”

24Yeso yavavolera, “Munyi mugotwa ligali, kigira si mumanyi Amang'oda Matakatifu, anoho izingulu zia Nyasaye mba. 25Lwa vakuzu valisimuguka, sivaliserera, anoho koselerwa mba, navuzwa valakave kuli zingelosi mwigulu. 26Na kigira amakuva gi lisimuguka lia vakuzu: mukikiri kosoma mu kitabu cha Musa mu zimbaso zivoolaa amakuva gi kisaka ichaduka umuliru? Kuli Nyasaye yamoloma na Musa namuvolera, ‘Inzi ni Nyasaye wa Aburahamu, Nyasaye wa Isaka na Nyasaye wa Yakobo?’ 27Siaveeye Nyasaye wa vakuzu, navuzwa ni Nyasaye wa vaveeye mwoyo. Munyi simumanyi mba!”

Lilago linene

(Mat. 22:34-40; Luk. 10:25-28)

28Mulala ku vigizi vi Lilaga yaza naahulira ni nivahangalizanaa. Lwa yaamanyiriza ndi Yeso uvativuliyi vulahi, yamuteeva, “Ku malago goosi, liu kutanga ni liliha?”

29Yeso yamutivulira, “Liukutanga ni yili: ‘Muhuliri, munyi avandu va Isiraeli! Mwami Nyasaye wiitu niyie Nyasaye yeng'ine. 30Uyaanze Mwami Nyasaye woovo nu mwoyo gugwo gwosi, ni liiva liilio liosi, ni zing'anagani zizio ziosi, kandi ni zinguru zizio ziosi.’ 31Na lilago lia kaviri ni yili: ‘Uyaanze umutende woovo kuli wiyanza umwene.’ Sihaveeyeho nililago lindi iliveeye ilinene kuvita gaviri yaga mba.”

32Umwigizi wi Lilaga oyo yamuvolera, “Vulahi Mwigizi! Ovooye agiligali ndi Nyasaye aveeye mulala vuzwa; sihaveeyeho nu wundi, nataveeye oyo. 33Kuduuka umundu ayaanze Nyasaye nu mwoyo gwigwe gwosi, ni zing'anagani zizie ziosi, ni zinguru zizie ziosi; kandi kuduuka ayaanze umutende weve kuli yiyanzaa mwene. Likuva yili liveeye ilinene kuvita kuhaana visiuviliru vindi viosi ku Nyasaye.”

34Lwa Yeso yalora umundu oyo naamutivuliyi no vogeri, yamovoolera, “ Ivi si oveeye ihale nu Vwami vwa Nyasaye mba.” Inyima wa yago, sihaaliho nu mundu waluvilira kandi koteeva Yeso iliteeva lindi mba.

Liateeva kigira Kristo

(Mat. 22:41-46; Luk. 20:41-44)

35Lwa Yeso yaali ni yigiza mu Litembeli, yateeva, “Kigira ki avigizi vi Lilaga vavoola ndi Kristo nu wi kisukururwi cha Daudi? 36Daudi mwene yavoola mu zinguru zia Roho Mutakatifu:

‘Mwami yavolera Mwami wange:

Yikala hano ku mukono gwange mulungi

kuduuka lwambika avasigu vovo hasi hi virenge vivio.’

37Daudi mwene yamulanga ‘Umwami’; ku, Kristo anyala ndi kuva Mwana wa Daudi?”

Yeso yiganihiza avigizi vi Lilaga

(Mat. 23:1-36; Luk. 20:45-47)

Kiduma cha vandu cha muhulirizaa nu vuyanzi. 38Mu miigizu geege Yeso yavoola, “Mwilindi ku avigizi vi Lilaga, avayaanzaa kogendagenda niviviiki izinguvu zindambi, nu kuchelizwa nu luyali mu viitu; 39avayaanzaa kwikala ku zindeve zindahi mu masinagogi, kandi havundu hu luyali mu lilia. 40Vanuraa nukudambiza zinyumba zia vakunzakali ni vasaala masaala matambi nu vugadi! Mu lidiku lie likalaga, yavo valakanyore amaduywa manene kuvita.”

Isadaka yu mukunzakali

(Luk. 21:1-4)

41Lwa Yeso yaali niyikaye ahimbi ni livikiru lie Litembeli, yahenza kuli avandu vaviika isadaka mu livikiru. Avatugi avanyingi vahaana mabese manyingi; 42maku umukali mukunzakali uwaali mudaka, yaza nahaana amang'ondo gaviri. 43Yeso yalanga aviigi veve navavoolera, “Muvooleraa agiligali mukunzakali mudaka uyu uhaani isadaka iviti ya vandi vosi avaari kutunga mu livikiru lie Litembeli. 44Vosi vahaanangi kolondekana ku vutugi vwavo, navuzwa umukunzakali uyu, kali naava naveeye umudaka, oyo uhaani viosi viayaalinavio.”

Currently Selected:

MARIKO 12: LOGOOLI

Highlight

Copy