MARIKO 11

Yeso yingiraa mu Jerusalemi nisango enene yiliguuta

(Mat. 21:1-11; Luk. 19:28-40; Yoh. 12:12-19)

1Lwa Yeso harara na aviigi veve vaali ni vakaduuka ahimbi na Jerusalemi, vaduuka Bezifage na Bezani, ahimbi ni kiguru cha Mizeituni. Yatuma vaviri ku aviigi veve navoora, 2“Muzie mu lidaala liveeye imbiri winyu. Nonoho lwa mwingira mu, mulanyola ekemoli chisukiri ne kevoheywi, ichu mundu akikiri kwikala ku. Mu kevoholore, ma mu keleete. 3Umundu namuteeva, ikigiraki nimukora ndio, mumuvolere ndi ‘Mwami achenyaa, na alamanya achilanyie hano vwangu.’ ”

4Kunangwa vazia, ni vanyoola kemoli chi sukiri ni kevoheywi ha kiliango havulavu kunzira, ni vakevoholora. 5Valala ku avandu vaali ni vasingiyi ho vavateeva, “Kigira ki mu voholoraa ekemoli yicho?”

6Aviigi navo vavativulira kuli Yeso yaali na avavoo leye. Maku vavaleka nivakivugura; 7Valetera Yeso ekemoli zana. Vaala ku izinguvu ziavo, naye yikala kucho. 8Avandu avanyingi vaala izinguvu ziavo kunzira; avandi vaala iziisia zie misaala zia vatema mu milimi. 9Avandu vosi aviimira imbiri na avamulonda inyima, vahanzuka ni vavoola, “Nyasaye yizominywi! Agasizwi uyu uza mu lieta liu Mwami! 10Nyasaye agaasizi uvwami vwa Baba wiitu Daudi uvuzaa. Yizominywi Nyasaye, igulu mwigulu!”

11Yeso yingira mu lidaala lia Jerusalemi, nazia kali mu Litembeli, nahenza ku vindu viosi. Navuzwa kigira isi yaali ni yakamwama, yazia Bezani harara na avaari aviigi likomi na vaviri.

Yeso yalaama musaala gwu mukuyu

(Mat. 21:18-19)

12Lidiku lialonda ku, lwa vaali ni vaatura Bezani, Yeso yaali ninzara. 13Maku yalora umukuyu na aveeye ihale, ugwali na matu amanyingi. Yazia nahenza ku mbula anyoore ku kindu. Lwa yaduuka kugwo si yanyoora ku ikindu cha alia mba, navuzwa amatu geng'ine kigira si yaali ing'inga ya makuyu kwama mba. 14Yavolera umukuyu zana “Mundu atalia kandi amakuyu googo imihiga josi mba.” Aviigi veve vahulira amakuva yago.

Yeso yingira mu Litembeli

(Mat. 21:12-17; Luk. 19:45-48; Yoh. 2:13-22)

15Lwa Yeso harara na aviigi veve vaduuka Jerusalemi, Yeso yingira mu Litembeli, natanga kukunga avandu vaali ni vagulanyia ivindu mu Litembeli. Yaatung'aminya izimesa zia yavo avaari nivakiranyira ku mabese, ni zindeve zia yavo avaari ni vaguliza amakuulu, 16siyavugilira umundu woosi kuvita mu mugizi gwi Litembeli nagingi ikindu mba. 17Lwinyima yaviigiza navoora,

“Gang'odwa, ‘Litembeli liange lilalangwa inyumba yu kusaala ku zihiiri ziosi!’

Navuzwa munyi mugekoli kuva luhangaywa lwa vanuuri.”

18Lwa avasaalisi vanene na avigizi vi Lilaga va gahulira, vatanga kwenya inzira yu kumwita, navuzwa, vaamutia kigira ikiduma cha vandu vosi chagenya ku amingizu geege.

19Lwa mugolova gwaduukaa, Yeso na aviigi veve vaturaa mu lidaala linene lia Jerusalemi.

Amigizu ku mukuyu gwuma

(Mat. 21:20-22)

20Mugambazuri ku lidiku lialonda ku, lwa vaali ni vavitaa, valora umukuyu ni guniaye gwosi, kali ni miri jagwo ndio. 21Petero yagwizuliza, navolera Yeso, “Mwigizi, henza! Umukuyu gwa walaama gula guniaye!”

22Yeso yavavolera, “Muve ni lisuuvira mu Nyasaye. 23Muvooleraa agiligali niiva mundu woosi alavolera ikigulu yiki chigingi ichene kigwi munyanza vugira kuhayahayiza mu mwoyo gwigwe, navuzwa asuuviri ndi agaavoola galakolwa, alakolerwa agene yago. 24Kulwayago muvooleraa, ku kindu choosi cha muteeva mu lisaala, musuuviri ligali mukenyooye, na mulahevwa. 25Lwa musaala, musamiihi umundu woosi uva niyaamukolera uvudamanu, kunangwa Baba winyu oveeye mwigulu aduuki kumusamiiha uvwoni vwinyu.”

[ 26Navuzwa munyi ni mutasamiiha avandu, Baba winyu oveeye mwigulu, si alasamiiha uvwoni vwinyu mba.]

Liteeva kigira vunyali vwa Yeso

(Mat. 21:23-27; Luk. 20:1-8)

27Vaduuka Jerusalemi kandi. Lwa Yeso yaali nagenda mu Litembeli, avasaalisi vanene, avigizi vi Lilaga navakulundu vaza kuye 28ni vamuteeva “Ivi okolaa ivindu yivi ku vunyali vwa vwaha? Nivwaha wakuha uvunyali vwokokola ivindu yivi?”

29Yeso yavavolera, “Inzi ndamuteva iliteeva lilala; ni mundivulira, inzi kandi ndamuvolera uvunyali vwa ngolera mu vindu yivi. 30Libatiza lia Yohana liatura ku Nyasaye anoho ku avandu? Mu ndivuliri.”

31Vatanga kuhangalizana aveene kuvene ni vavoola, “Ni kovora, ‘Vwatula ku Nyasaye,’ alakoteeva, ‘Kigira ki si mwamusuuvira?’ 32Navuzwa niiva kulavoola ‘Vwatula ku vandu...’ ” Vaatia ikiduma cha vandu, kigira vosi vasuuvira ndi Yohana yaali muporofeti. 33Kunangwa, vativulira Yeso ni vavoola, “Kunyi kumanyi mba.” Yeso naye ya vavoolera, “Inzi si ndamuvolera ni vunyali ki vwa ngolera mu ivindu yivi.”

Currently Selected:

MARIKO 11: LOGOOLI

Highlight

Copy