MARIKO 10

Amigizu ga Yeso kigira kukunga mukali

(Mat. 19:1-12; Luk. 16:18)

1Maku Yeso yatura yo nazia mu losoma lwi Vuyuda, niyambuka engeleka wu Mugera gwa Jorodani. Ividuma via vandu viamukumberiza, naye yaviigiza kuli gwaali umwima gwigwe.

2Kunangwa valala ku Vafarisayo vazia kuye nivamugeriza na mateeva, “Gaduukanaa umundu akungi umukali weve?”

3Yeso yavativulira, “Musa yahaana malago ki?”

4Navo vavoola, “Musa yaaha umusaza umunwa kong'odera umukali ibarwa yokolekana.”

5Yeso yavativulira, “Musa ya mung'oderaa lilago yili kigira uvudinyu vwi mioyo jinyu. 6Navuzwa kutura mu litanga lie lilombwa lie lirova, Nyasaye yavalomba umusaza nu mukali. 7Kigira yaga musaza alaleka baba weve na mama weve ahambane nu mukali weve. 8Na yava vaviri valagwa umuviri mulala. Kulwayago, sivaveeye vaviri kandi, navuzwa umuviri mulala. 9Kunangwa, cha Nyasaye amali kuhambanyia harara, umundu atachavukanyia mba.”

10Lwa vingira munyumba, aviigi vateva Yeso ilikuva yili kandi. 11Yavavolera, “Ku vosi ukunga umukali weve naleta wundi akolaa ovoheyi naye. 12Na umukali olekaa umusaza weve nazia ku musaza wundi, akolaa ovoheyi.”

Yeso yagasiza avana vakekeeke

(Mat. 19:13-15; Luk. 18:15-17)

13Avandu vaali nivaleeta avana vakekeeke ku Yeso avadiri, navuzwa aviigi vavagaya. 14Lwa Yeso yalora yaga, yavihilirwa navavoolera, “ Leki avana vakekeeke vaze ku inzi. Mutavagaya mba, kigira Uvwami vwa Nyasaye voveeye vwa vandu vaveeye kuli avana yava. 15Muvooleraa agiligali, umundu woosi utavugilira Uvwami vwa Nyasaye kuli umwana mukekeeke, sialingira muvwo mba.” 16Inyima Yeso yavugula avana zana mu makono geege, naviika amakono kuvo kandi navagasiza.

Umundu umutugi

(Mat. 19:16-30; Luk. 18:18-30)

17Lwa Yeso yaatanga logendo lwilwe, umundu mulala yanyagula nasigama imbiri weve, ma na muteeva, “Mwigizi mulahi, ngola ndi nduuki konyoora livamwoyo litahera mba?”

18Yeso yamutivulira, “Kigira ki unanga umulahi? Sihaveeyeho nu mulahi kali mulala, navuzwa Nyasaye yenyine. 19Wamanya amalago: ‘Utiita mba; utaheya mba; utiva mba; utagina mba; utagaanga mba; utaveeha mba, uhuliri baba woovo na mama woovo!’ ”

20Naye yamutivulira, “Mwigizi, yaga goosi ndaagalinda kutura vwana vwange.”

21Yeso yamuhenza nu vuyanzi namuvolera, “Udaki vuzwa kindu kilala. Zia ugulizi viosi via oveeye navio na uhaane ku avadaka, na ivi ulava ni livikiru mwigulu; ma uzi ononde.” 22Lwa yahulira agene yago, mumoni mwimwe mwaverera ligali; ma nazia nadunyi kigira yaali nu vutugi uvunyingi ligali.

23Yeso yahenza zimbega ziosi navolera aviigi veve, “Vulakave uvudinyu kuvatugi kwingira mu vwami vwa Nyasaye!”

24Aviigi vagenya ku makuva yaga. Yeso yavavolera kandi, “Vana vange, voveeye vudinyu umutugi kwingira mu Vwami vwa Nyasaye!” 25Ni vodoto ligali ing'amia kwingira mu muluhu gwi sindani kuvita umutugi kwingira mu vwami vwa Nyasaye.

26Aviigi veve vagenya ligali nivamuteeva, “Nivwaha unyala kohonywa?”

27Yeso yavahenza, navavoolera, “Siganyala kunyalika ku avandu mba, navuzwa ku Nyasaye sigaveeye ndio, kigira ku Nyasaye vindu viosi vinyalikaa.”

28Petero yaatanga kumuvolera, “Henza, kunyi kooleki viosi na kokolondi.”

29Yeso yavoola, “Yee kandi muvooleraa agiligali ndi, ku vosi mundu oleka hango anoho avamwavo kinga vavoozo, anoho mama weve, anoho baba weve, anoho avana veve, anoho umulimi kigira inzi, kandi kigira Ivangeri, 30alanyoola haali kanyingi ligali mu ing'inga ya kalunu yiyi. Alakanyoole haali mia izinyumba, avamwavo, avavozo, avamama, kandi avana ni milimi kandi ni lidambizwa; ma kandi mu ing'inga yiza, alakanyoole livamwoyo litahera mba. 31Navuzwa avanyingi avaveeye avi imbiri valava avinyima, navo avaveeye avinyima valava avimbiri.”

Yeso yamoloma lwa kavaga kigira ilikuza lilie

(Mat. 20:17-19; Luk. 18:31-34)

32Yeso harara na aviigi veve vaali kunzira nivazizaa Jerusalemi. Yeso yagendaa imbiri wavo. Aviigi veve vaali ni ligenya, na avandu vamulonda vaali nu vuti ligali. Yeso yavugula avaari likomi na vaviri natanga kuvavoolera ivindu vizizaa kwekoleka kuye. 33Yeso yavavolera, “Huliri! Kuziiza Jerusalemi wu Umwana wa Adamu azizaa kuzamwa ku vasaalisi vanene na avigizi vi Lilaga. Navo valamukalagira aduuki kwitwa, na valamuhaana ku avandu vi zihiiri zindi. 34Navo valamukolera kehenyahenye, valamutuzira amate, valamukuya no lokova, ma vamwiti; na inyima wa madiku gavaga, alasimuguka.”

Liteeva lia Yakobo na Yohana

(Mat. 20:20-28)

35Maku Yakobo na Yohana, avana va Zebedayo, vazia ku Yeso nivamuvoolera, “Mwigizi, kwenyaa okokolere kindu cha kwenyaa kukoteeva.”

36Yeso yavateva, “Mwenya mukolere ki?”

37Vamuvolera, “Ukuvugiliri mulala ku kunyi yikare ku mukono gugwo umulungi nu wundi ku mukono mumosi lwa ulikala ku endeve yu vwami mu vukumi vwu uvwami vuvwo.”

38Yeso yavavolera, “Si mumanyi icha muteeva mba! Munyi munyala kunwa ekekombe chu vusaliri cha gaduukanaa inzi nwi? Munyi munyala kubatizwa munzira ndala nzere ya gandukira mbatizwi muyo?”

39Va mutivulira “ Kunyala.” Yeso yavavolera, “Kekombe cha nwezaa mulanwa ligali, na mulabatizwa libatizwa liu vusaliri kuli ndibatizwa. 40Navuzwa avaliikala ku mukono gwange mulungi anoho mumosi simbeeye nuvunyari kotovola nivwaha ulikala ku mukono gwange mulungi anoho mumosi mba. Ni Nyasaye ulihaana uvwiyangu yivu ku yavo ava yamala kwetegekizira.”

41Aviigi vandi likomi lwa vahulira yaga, vaasinyikira Yakobo na Yohana. 42Kunangwa Yeso yavalanga, navavoolera, “Mumanyi vulahi avalolangwa kuva avamihi vi zihiiri vamiiha avandu vaavo ni zinguru, na vanene vaavo vamiiha nu vunyali ku avandu vaa vo. 43Navuzwa gatava ndio ku munyi; umundu woosi wenyaa kuva umunene ku munyi gamudukira ave umutumikiri winyu. 44Na uyu wenyaa kuva umwimiliri gamudukira ave umutumikiri wa vosi. 45Kigira Mwana wa Adamu si yaza kutumikirwa, navuzwa kutumikira avandu nukuhaana ilivamwoyo lilie live umutungu gwa vandu avanyingi.”

Yeso yahonyia umboku ulangwa Baritimayo

(Mat. 20:29-34; Luk. 18:35-43)

46Vaduuka Jeriko; lwa Yeso na aviigi veve, ni kiduma kenene vaali nivaturaa, umboku musavasavi walangwa, Baritimayo, muyaayi wa Timao yaali niyikaye kunyasi kwinzira. 47Lwa yahulira ndi ni Yeso wa Nazareti uwaali navitaa, yaatanga kuhanzuka vwangu navoora, “Yeso Mwana wa Daudi, ombere zimbavasi!”

48Avandu vanyingi vamugondokera ni vamuvolera akiling'ane, navuzwa yameda kuhanzuka vudinyu ligali, “Mwana wa Daudi, ombere zimbavasi!”

49Yeso yasingira navoora, “Mulangi.” Na valanga umboku oyo ni vamuvolera, “Lema umwoyo! Singira, Yeso akulangaa.”

50Naye yaatuliza inguvu yeeye nasiuuva, nasingira, nazia vwangu wa Yeso yaali.

51Yeso yamuteeva, “Wenyaa ngokolere ki?” Umboku oyo yamuvolera, “Mwigizi, nyenya ndore ka ndi.”

52Yeso yamuvolera, “Zia, Ilisuuvira liilio limali kokohonyia.” Nonoho umboku oyo yalora, ma nalonda Yeso mu logendo lwilwe.

Currently Selected:

MARIKO 10: LOGOOLI

Highlight

Copy