MATAYO 17

Yeso agirung'anaa ligondo

(Mar. 9:2-13; Luk. 9:28-36)

1Inyima wa madiku sita, Yeso yavugula Petero, Yakobo na amwavo weve Yohana, naavimilira kuzia mu kiguru ikitambi. 2Nonoho Yeso yagirung'anywa ligondo imbiri wavo. Mumoni mwimwe mwaka kuli iliuva, kandi izinguvu zizie ziahemahema kuli uvulavu. 3Musa na Elija vaaloreka nivamoromaa naye. 4Maku Petero yavolera Yeso, “Mwami, ni vulahi kunyi kove hano! Nuyanza, leka kwumbake hano ividioli vivaga, kilala ichicho, ikindi cha Musa, ni ikindi cha Elija!”

5Lwa yaali nakemoloma, ililesi lilavu liavakunika, nu umwoyo gwahulirika kutura mu lilesi zana ni govoora, “ Uyu nu Umwana wange wandayanza, mumuhuliri.”

6Lwa aviigi vaaguhulira, vaagwa hasi mam'mama ni vaatia ligali. 7Yeso yaza kuvo navadiira navoora “Singiri. Mutatia mba!” 8Kunangwa, vahenza, na sivalola ho mundu wundi natali Yeso yenyine.

9Lwa vaali ni vasulunguta kutura mu kiguru, Yeso yaviganihiza navoora, “Mutavoolera umundu kali mulala malola yaga mba, kuduuka lwu Umwana wa Adamu alisimuguka kutura mu vakuzu.”

10Aviigi veve va muteeva, “Kigira ki avigizi vi Lilaga vavoola kuduuka Elija alaaze kutanga?”

11Yeso yavativulira, “Agiligali, Elija alaza kutanga kandi alanyoola ivindu viosi nivietegeki. 12Navuzwa inzi muvooleraa, Elija yamala kuuza, na avandu sivamumanyirizaa mba, nitali vamukolera kuli vayaanza. Munzira ndala nzere, valakubiza Umwana wa Adamu ikivi.”

13Kunangwa aviigi vamanya ndi avavoolera amakuva ga Yohana Mubatizi.

Yeso yahonyia muyaayi waali ni lidemoni

(Mar. 9:14-29; Luk. 9:37-43)

14Lwa Yeso harara na aviigi veve viirana ku kiduma, mundu mulala yazia ku Yeso, nasigama, 15navoora, “Mwami, vererera umwana wange, kigira aveeye nindulumi, kandi asaliraa muno; agwizaa haali kanyingi mu muliru anoho mu mazi. 16Ndamuleeta ku aviigi vovo, navuzwa sivanyaliza kumuhonyia mba.”

17Yeso yativura, “Munyi avamuvula ilisuuvira! Ndamenya ni munyi kuduuka ng'inga ki? Ndikuzira ni munyi kuduuka ng'inga ki? Ndeteri umwana zana hano.” 18Yeso yagondokera ilidemoni, nalio liatura kuye nonoho, kandi muyayi oyo yahona ing'inga yene yeyo.

19Maku aviigi vazia ku Yeso naveeye yenyine, nivamuteeva, “Kigira ki kunyi sikwaali kunyala kukunga ilidemoni yilio?”

20Yeso yavativulira, “Yago gaali ndio kigira ilisuuvira lienyu liveeye ilikekeeke. Muvooleraa agiligali, ni muva vuzwa ni lisuuvira, kali live likekeeke vuzwa kuli luguza lwi lisaazi, munyala kovoolera kiguru yiki, ‘Tula yaaha, wisundi hala!’ Nacho kilisunda. Si keveeye ho ni kindu choosi ikitanyala kunyalika ku munyi mba. [ 21Lidemoni liu lugano yilu silinyala kukungwa nigatali ku lisaala ni lihonga lilia lieng'ine.]”

Yeso yamoloma kandi kigira likuza lilie

(Mar. 9:30-32; Luk. 9:43-45)

22Lwa aviigi vavunga harara mu Galilaya, Yeso yavavolera, “Umwana wa Adamu alazamwa mu makono ga vasigu veve. 23Valamwita, navuzwa ilidiku lia kavaga alasimugukizwa.” Aviigi vavelera ligali.

Imituungu ji Litembeli

24Lwa Yeso na vigi veve vaduuka Kaperinaumi, avasololi vuvusuuru vwi Litembeli vazia ku Petero ni vamuteeva, “Mwigizi winyu atungaa uvusuru vwi litembeli?”

25Petero yativura, “Yee, atungaa.” Lwa Petero yingira munyumba, Yeso yaatanga komoloma nateeva, “Simoni, zing'anagani zizio ziveeye ki? Avami vilirova vasolora uvusuru kutura ku vwaha? Kutura ku avana vaavo anoho kutura ku avageni?”

26Petero yativura, “Kutura ku avageni.”

Yeso yamuvolera, “Vulahi! Agaveeye kovora, avana sivatungaa mba. 27Navuzwa, kigira sikwenyaa kwikigitariza avandu yavo, zia ku inyanza ulimbiki izisuzi; uvuguli isuzi itangaa kugumirwa, ukunuli munwa gwayo, na ulanyora mu mabese gadukanaa kutunga uvusuru vwi Litembeli. Vugula agene yago uzie kutunga uvusuru vwitu.”

Currently Selected:

MATAYO 17: LOGOOLI

Highlight

Copy