MATAYO 18

Nivwaha oveeye munene mwigulu?

(Mar. 9:33-37; Luk. 9:46-48)

1Ing'inga yeyo aviigi vaza ku Yeso, ni vamuteeva, “Ni vwaha oveeye munene mu Vwami vwu mwigulu?”

2Yeso yalanga umwana mukekeeke, na amusingiriza hagati haavo, 3navoora, “Muvooleraa agiligali ndi, ni mutagirung'ana mugwi kuli avana vakekeeke, munyi simulingira ligali mu vwami vwu mwigulu mba. 4Ku vosi uwegehizaa kuli umwana mukekeeke uyu, aveeye umunene mu Vwami vwu mwigulu. 5Ku vosi uwingirizaa umwana mukekeeke kuli uyu ku lieta liange, yingirizaa inzi.

Kwikigitariza avandi

(Mar. 9:42-48; Luk. 17:1-2)

6“Ku vosi okokora mulala ku vakekeeke yava kuvula kusuuvira mu inzi, vwakaveeye vulahi lugina lonene ni lwakasungiywi mu ligoti lilie ma asiuvwi mu luliva lwinyanza. 7O, kilaamo keveeye mukivala kigira ivindu vilombaa avandu kokora uvwoni. Amagerizu galaaza, navuzwa kilaamo keveeye ku lirova kigira viveeye mu ivindu vikola avandu kugwa muvwoni. Amagerizu kuli yaga gaaza kazozo, navuzwa kilaamo keveeye ku mundu uyu wa magerizu yaga gaaza kuvitira muye!

8“Niiva mukono gugwo anoho kerenge chicho ni kikwikigitaliza ma vikolombe okole uvwoni uvikalage ma uvisiuvi ihale. Ni vulahi ivi kwingira mu livamwoyo vugira mukono anoho kerenge, kuvita kusiuvwa mu muliru gwi mihiga ni mihiga noveeye na makono gombi anoho ivirenge viombi. 9Emoni yooyo nekolomba okole uvwoni, ugitulizi ma ugisiuvi. Ni vulahi ukwingira mu livamwoyo noveeye ne emoni ndala, kuvita kusiuvwa mu muliru gwe gehena noveeye ni zimoni zizio ziombi.

Lugano lwi ligondi liagota

(Luk. 15:3-7)

10“Mulole ndi muvuli kuchaya mulala ku vakekeeke yava inzi muvooleraa. Zingelosi ziavo mwigulu, ziveezaa imbiri wa Baba wange vuli kazozo. [ 11Mwana wa Adamu yaza kohonyia avaagota.]

12“Muganaganaa ndi? Mundu naava naveeye na magondi mia, ma agotizi lilala kugo, amanyaa akola ki? Alekaa agatigaye makomi tisa na tisa mu vigulu, kandi azia kwenya iligoti lila. 13Niiva alinyoora; muvooleraa agiligali, alisangaliraa kuvita vusangali vwa asangalira agandi tisa na tisa, agavula kogota gala. 14Kandi nindio, Baba winyu oveeye mwigulu siavugiliraa mulala ku vakekeeke yava agote mba.

Aminyu umali kukwonera

15“Amwavo woovo nakwonera, zia kuye umumanyie uvwoni vwivwe. Navuzwa gakoleke vuzwa mu vwivisu hagati hinyu. Niiva mulahuliriza umali kwilanyia amwavo woovo. 16Navuzwa navula kukuhulira, vugula mundu wundi mulala anoho vaviri, amakuva goosi gaduuki kulungika mu livoora lia avaloli vaviri anoho vavaga. 17Niiva asuraa kuvahulira, volera likanisa. Niiva asuraa kuhulira kali likanisa, ave ku ivi kuli avandu vatamanyi Nyasaye, kandi avasololi vuvusuuru.

Kovoha no kovoholora

18“Muvooleraa agiligali, kindu ku viosi, icha muvoha mu lirova kilavofa kandi mwigulu; kandi kindu ku viosi cha muvholoraa mu lirova, kilavoholorwa mwigulu kandi. 19Inzi muvooleraa, vaviri ku munyi nivavugilirzana mu lirova muno ku kindu choosi cha vasaala, Baba wange oveeye mwigulu alavakolera chazana. 20Kigira hoosi ha vavugani vaviri anoho vavaga ku lieta linage, inzi mbeeye hagati haavo.”

Ulugano lwu mutumikiri mulala utasaamiihaa

21Petero yaza ku Yeso, namuteeva, “Mwami, amwavo wange nanzonela ndamusamiiha haali kanga? Haali saba?”

22Yeso yamutivulira, “Inzi singovooleraa haali saba vuzwa mba, navuzwa kuduuka sabwini haali saba, 23kigira yaga, Uvwami vwu mwigulu voveeye kuli mwami mulala wenyaa kuvaliza amagovi ga vatumikiri veve. 24Lwi livaliza liatanga, yaleetelwa umundu mulala uwaali ni ligovi lie zitalenta#18:24 Zitalenta: Italenta iviti imituungu ju muyinziri ku mihiga komi na tano. zielefu likomi. 25Mundu oyo siyaali ni kindu chu kutunga mba. Mwami weve yaatuliza lilago agulizwi harara nu mukali weve kandi vana veve, ni vindu viosi via yaali navio, ligovi liduuki kutungwa. 26Kunangwa umutumikiri oyo yagwa hasi ku maru geege navoora, ‘Mwami, ombere zimbavasi na inzi ndakutunga iligovi liosi!’ 27Mwami wu mutumikiri oyo yamuveera izimbavasi, namusamiiha iligovi, namuleka.

28“Navuzwa mutumikiri oyo yatura, nanyoora mulala ku vatumikiri vache, uwaali ni ligovi lilie lie zidinari#18:28 Zidinari: Idinari ndala eveeye umutungu gwu muyinziri ku lidiku lilala. imia. Yaamwizumba mu madundu, navoora, ‘Ndungaa ligovi liange!’ 29Mutumikiri wache yagwa hasi ku maru geege, naamusaala, ‘Ombere na inzi ndakutunga ligovi liilio liosi.’ 30Navuzwa yasura. Mu vogono yivwo, yamukola avofi muvuhambe kuduuka lwa atungaa ligovi. 31Avatumikiri vache lwa valora agene yago, vavelera ligali, nivazia kovoolera mwami wavo agekoleka yago. 32Mwami yalanga mutumikiri oyo namuvolera, ‘Ivi oveeye mutumikiri mudamanu ligali! Ivi wangonya ma ningusamiiha iligovi liilio liosi! 33Si vwali vulahi koveera mutumikiri wacho zimbavasi, kuli inzi ndaali kokovera zimbavasi?’ 34Maku umwami yavihilirwa ligali, naamuhira muvuhambe kuduuka atungi iligovi lilie liosi.”

35Yeso yamaliriza kovora, “Baba wange wu mwigulu alakola malala meere ku munyi niiva simulasamiiha avamwavo vinyu mugati mwi mioyo jinyu.”

Currently Selected:

MATAYO 18: LOGOOLI

Highlight

Copy