MATAYO 19
19
Amigizu ga Yeso kigira kukunga umukali
(Mar. 10:1-12)
1Lwa Yeso yamala kovora amakuva yaga, yatura Galilaya, nazia mu kivala chi Ivuyuda engereka wu Mugera gwa Jorodani kolovega lwi vugwi. 2Viduma vinene via avandu viamulonda, naye yavahonyira yo.
3Avalala ku Vafarisayo navo kandi vaza ku Yeso ni vageriza kumutega nivamuteeva, “Ni vulahi umundu kukuunga umukali weve ku kivuni choosi kolondekana ni Lilaga?”
4Yeso yavativulira, “Simwasoma Mang'oda Matakatifu agaavoola ndi, Nyasaye uwalomba avandu mu litanga, yavalomba umusaza nu mukali, 5kandi Nyasaye yavoola, ‘Kigira yaga musaza alaleka baba na mama weve, kandi ahambane nu mukali weve; navo vaviri valagwa muviri mulala’ 6Kunangwa si vaveeye vaviri kandi, navuzwa muviri mulala. Kigira yaga, cha Nyasaye yahambanyia harara, mundu atachavukanyia mba.”
7Avafarisayo vamuteeva, “Kunangwa kigira ki Musa yahaana lilago ndi mukali ahevwe ibarwa yu kumukunga?”
8Yeso yavativulira, “Musa yahaana munwa kukunga avakali vinyu kigira uvudinyu vwi mioyo jinyu. Nitali sigali ndio kutura mu litanga lie lirova mba. 9Inzi muvooleraa, ku vosi ukunga umukali weve nigataveeye ku kivuni cho voheyi, ma aleete umukali wundi, akolaa ovoheyi. Mundu oleeta umukali wakungwa, akolaa ovoheyi naye.”
10Aviigi veve vamuvolera, “Niiva amakuva gu mundu musaza nu mukali weve gaveeye kuli ndio, nivulahi kuvula koleta umukali.”
11Yeso yavavolera, “Sivali vosi avanyala kuvugilira amigizu yaga, ni vataveeye ava Nyasaye yahaana amigizu yaga. 12Kigira viveeye ho ivivuni lugano lugano viokolomba umundu avuli koleta umukali. Avalala vaveeye iviziri kigira viivulwa ndio. Avandi vaveeye iviziri kigira vakolwa kuva ndio na vandu; avandi vekola iviziri aveene kigira Uvwami vwu mwigulu. Leki oveeye ni zinguru kuvugilira amigizu yaga agavugiliri.”
Yeso yagasiza avana vakekeeke
(Mar. 10:13-16; Luk. 18:15-17)
13Hene yaho, avandu valala valeta avana vakekeeke ku Yeso aviiki makono geege kuvo. Navuzwa aviigi vavagondokera. 14Yeso yavoola, “Leki avana vakekeeke vaze ku inzi. Mutavigalira mba, kigira Uvwami vwu mwigulu voveeye vwa avandu kuli yava.”
15Yavika makono geege kuvo navagasiza, ma natura ho.
Muyaayi mutugi nu Vwami vwu mwigulu
(Mar. 10:17-31; Luk. 18:18-30)
16Mundu mulala yaza ku Yeso, namuteeva, “Mwigizi mulahi, ngola ki ikilahi nduuki konyoora livamwoyo litahera mba?”
17Yeso yamuvolera, “Kigira ki oteeva inzi kigira kindu keveeye ikilahi? Aveeye ho mulala wenyine vuzwa oveeye umulahi; naye ni Nyasaye. Navuzwa ivi ni wenyaa kwingira mu livamwoyo ugumiri amalago.”
18Umundu oyo yamuteeva, “Malago ki?”
Yeso yavoola, “Utiita mba; utaheya mba; utiva mba; utagina mba. 19Wizominyi baba woovo na mama woovo, kandi uyaanze umutende woovo kuli wiyanza umwene.”
20Musoleri oyo yamuvolera, “Agene yaga goosi ndaagumira kutura uvwana vwange; kalunu ngole ki ikindi?”
21Yeso yamuvolera, “Niwenya kuva umudukiru, zia ugulizi ivindu vivio viosi ohe avadaka, na ivi ulava nu utungi mwigulu, ma uzi ononde.”
22Lwu musoleri oyo yahulira agene yaga, yazia na aveeye no vovereri vonene ligali, kigira yaali nu vutugi vunyingi.
23Yeso yavolera aviigi veve, “Ligali muvooleraa, vulakave vudinyu ligali ku vatugi kwingira mu Vwami vwu mwigulu. 24Kandi muvooleraa, voveeye vodoto ligali ing'amia kuvitira mu muluhu gwi sindani, kuvita umutugi kwingira mu Vwami vwu mwigulu.”
25Lwa aviigi vahulira ndio, vagenya ligali, ni nivavoora, “Ku, nivwaha unyala kohonywa?”
26Navuzwa Yeso yavahenza navoora, “Ku vandu, likuva yili silinyalika mba, navuzwa ku Nyasaye, ivindu viosi vinyalikaa.”
27Petero yavoola, “Henza, kunyi kwaleka ivindu viosi, kolonda ivi, kunangwa kulinyoola ki?”
28Yeso yavavolera, “Muvooleraa agiligali ndi, lwu Umwana wa Adamu alikala ku endeve yu vwami yu vukumi vwivwe mu Likula Lihia, hene yaho, munyi avalondi vange likomi na vaviri mulikala ku zindeve ziu vwami likomi na vaviri, ukwaamiiha izihiiri likomi na ziviri zia Isiraeli. 29Navuzwa, ku yavo vosi avaleka zinyumba ziavo anoho avamwavo vaavo, anoho avavozo, anoho ava baba anoho avamama vaavo, avana, anoho milimi jaavo kigira inzi, valanyora ivindu haali mia, kandi valanyora imiandu je livamwoyo litahera mba. 30Navuzwa avanyingi avaveeye kalunu avimbiri valava avinyima; na avinyima valava avimbiri.”
Avayinziri mu mulimi gwi kizabibu
Currently Selected:
MATAYO 19: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
