MATAYO 16

Avafarisayo venya kelolekizu

(Mar. 8:11-13; Luk. 12:54-56)

1Avalala ku Avafarisayo na Vasadukayo vazia ku Yeso, nivamugeriza; vamuteeva akole kelolekizu kumanyia ndi Nyasaye amuvugiliraa. 2Navuzwa Yeso yavativulira, “Lwi liuva liyeeraa, munyi muvooraa, ‘Lero kulava nu muheso: kigira ligulu liveeye iliakanyu!’ 3Mugambazuri, muvooraa, ‘Lero imbura enene ilakuba kigira ligulu ni iliakanyu na malesi mamwamu gimbula enene gaveeye ku.’ Munyala koporofeta ndi kuli kivala kizizaa kuva ulwa muheezaa mu vwerefu, navuzwa simunyala kuhaana ikivuni chi zing'inga ziene yizi mba! 4Likula lidamanu munyi, kandi ilitali lisuuvirifu ku Nyasaye, mwenya ekelolekizu kutura ku inzi! Awa! Si mulahevwa ekelolekizu kindi nikitaveeye ekelolekizu chaali cha Jona muporofeti chenyine mba.” Kunangwa, yavaleka nazia.

Amamera ga Avafarisayo na Vasadukayo

(Mar. 8:14-21)

5Lwa Aviigi veve vaali nivakambuka engereka winyanza, vanyoola ndi vaali kwivilira kuvugura milaango ji migadi. 6Yeso yavavolera, “Muhenze vulahi, mugerihi ku mamera ga Vafarisayo na Vasadukayo!”

7Navuzwa vatanga kovolerana aveene, “Avoora ndio kigira kwakuvula kuvugura milaango ji migadi.”

8Yeso yamanya iziganagani ziavo, yavateva, “Munyi avandu vi lisuuvira likekeeke, kigira ki muvooleranaa amakuva gi livula kuvugura imilaango ji migadi? 9Mukikirange kumanya? Kandi si mwizulizaa lwa ndaameganyia ijaali imilaango jitano ku vandu avaari zielefu zitano? Mwavungiza ivihiinda vianga via madonye? 10Imilaango ji migadi saba ija vandu izielefu zine vaagavulirwa, mwavungiza ivihiinda vianga via madonye? 11Gaveeye ndi munyi muvura kumanyiriza ndi ndaamoloma ku munyi amakuva gi milaango ji migadi? Mugerihi ku mamera ga Vafarisayo na Vasadukayo!”

12Aviigi vamanya ndi siyavavolera vagerihi ku mamera gi milaango ji migadi mba, navuzwa vagerihi ku amigizu ga Avafarisayo na Vasadukayo.

Petero Avulaa ndi Yeso aveeye Mesia, Umwana wa Nyasaye

(Mar. 8:27-30; Luk. 9:18-21)

13Yeso yazia muvivala viali ahimbi ni lidaala lia Kaisaria Filipi. Yateeva aviigi veve, “Avandu vavoola Umwana wa Adamu aveeye vwaha?”

14Aviigi vaamutivulira, “Valala vavoola ndi ni Yohana Mubatizi, avandi Elija, avandi vavoola Jeremia, anoho mulala ku avaporofeti vandi.”

15Yeso yavateva, “Na munyi muvooraa ki? Muvooraa inzi mbeeye vwaha?”

16Simoni Petero yativura, “Ivi oveeye Mesia Umwana wa Nyasaye oveeye mwoyo.”

17Yeso yativura, “Oveeye nuvugasu ivi Simoni umwana wa Yohana kigira siaveeye umundu ukuvuuliyi agiligali yaga, nitali ni Baba wange oveeye mwigulu. 18Nainzi ngovolera Petero; ivi oveeye ulwanda, na ku lwanda yilu ndumbaka ku ilikanisa linage, nizinguru zie likuza sizinyala kuliguuta. 19Kandi inzi ndakuha izimbungu ziu Vwami vwu mwigulu, na ku viosi vi ulivoha mu lirova, vilavofwa mwigulu kandi. Ku viosi vi ulivoholora mu lirova, vilavoholorwa mwigulu kandi.”

20Hene yaho, yiganihiza aviigi veve vatavoolera umundu woosi ndi aveeye Mesia mba.

Yeso yamoloma kigira lidambizwa, likuza ni lisimuguka lilie

(Mar. 8:31—9:1; Luk. 9:22-27)

21Kutura ing'inga yeyo, Yeso yaatanga kumanyia aviigi veve havulavu ndi, “Gandukira kuzia Jerusalemi, kandi ngubizwi kivi kenene na vakulundu vasaalisi vanene harara na avigizi vi Lilaga, kandi nzitwi, navuzwa ku lidiku lia kavaga ndakasimugukizwi.”

22Maku Petero yamuhira halovega, natanga kumugondokera, “Gatava ndio mba, Mwami! Nyasaye ataleka vindu yivi vikugwiri mba!”

23Navuzwa Yeso yikivuka navolera Petero, “Tula ku inzi Setani! Oveeye chu kwikigitariza ku inzi. Zing'anagani zizio si ziveeye zia Nyasaye, nitali ni zia avandu!”

24Hene yaho Yeso yavolera aviigi veve, “Mundu ku vosi ni yenya yanonde, gamudukira yigaye umwene, ma avuguli umusalaba gwigwe anonde. 25Ku vosi umundu uwenyaa kohonyia livamwoyo lilie, alaligotiza. Navuzwa ku vosi mundu ogotiza livamwoyo lilie kigira inzi, alalinyoola. 26Mundu alanyoola vukala ki niiva alavugula uvutugi vwosi vwi lirova, navuzwa agotizi livamwoyo lilie? Anoho, umundu alahaana ki keve mu uvwiyangu vwi livamwoyo lilie? 27Umwana wa Adamu aveeye ahimbi kuza mu vukumi vwa Baba weve harara ni zingelosi veve; kandi ahene yaho alatungaa vuli mundu kolondekana ku vikolwa vivie. 28Muvooleraa agiligali, vaveeye ho valala ku avasingiyi hano avalivula kolola ilikuza kuduuka lwu Umwana wa Adamu alakaze kuli Mwami Munene.”

Currently Selected:

MATAYO 16: LOGOOLI

Highlight

Copy