MATAYO 15

Miima ja avaguuga

(Mar. 7:1-13)

1Avafarisayo na avigizi vi Lilaga kutura Jerusalemi, vaza ku Yeso, ni vamuteeva; 2“Kigira ki aviigi vovo vononyia miima ja avaguuga viitu? Si viisaavanga amakono gaavo kuli gadukanaa ni vakikiri kulia!”

3Yeso yavativulira, “Kigira ki na munyi mulonda amigizu ginyu aveene, na nimwononyia Lilaga lia Nyasaye? 4Nyasaye yalaga navoora, ‘Wizominye baba woovo na mama woovo’ kandi, ‘Ku vosi, onyegaa baba anoho mama weve, gamudukira yiitwi ligali.’ 5Navuzwa munyi mwigizaa kovora ndi, niiva umundu avooreraa baba weve anoho mama weve, ‘Viosi via ndukanaa kuha munyi kuli ovokonyi, yivi mali ku vihaana ku Nyasaye,’ 6uyu atahaana uluyali ku baba weve anoho mama weve, navio mba. Na ndio mwononyia Lilaga lia Nyasaye ku lilonda amigizu ginyu aveene. 7Avagaadi munyi! Isaya yaporofeta vulahi ku munyi lwa yavoola:

8‘Avandu yava, Nyasaye avoora,

vanzizominya vuzwa ni minwa jaavo,

navuzwa mu mioyo jaavo, vaveeye ihale ninzi.

9Lisigamira liavo liveeye lia vuzwa.

Amigizu gaavo gaveeye amalago ga vandu vuzwa!’ ”

Vindu vilombaa mundu kuva mudamanu

(Mar. 7:14-23)

10Kunangwa Yeso yalanga kiduma cha vandu vaze kuye navavoolera, “Muhuliri kandi mumanye! 11Kindu kekolaa umundu kuva mudamanu, si keveeye ikindu kingiraa mu munwa gwigwe mba, navuzwa ikitulaa muye nicho kimukolaa kuva mudamanu.”

12Kunangwa aviigi veve vaza kuye, nivamuteeva, “Umanyi ku Avafarisayo vaali kwikigitalizwa lwa vaahuliyi amakuva yaga?”

13Navuzwa Yeso yativura navoora, “Kitagwa choosi cha Baba wange wu mwigulu atasimika kiliifwa.”

14“Mutavahendera mwoyo mba. Vaveeye aviimiliri vavoku. Umboku niyimilira umboku, vombi valagwa mu vogo.”

15Petero yamuvolera, “Ukwivaliri lugano yilu.”

16Yeso yavavolera, “Munyi simulumanyi kandi mba? 17Si mumanyi ndi ikindu choosi ichingiraa mu munwa kizizaa munda ma inyima kitulaa ichova? 18Navuzwa ivitulaa mu munwa vituraa mu mwoyo, na iviene yivi nivio ivikolaa umundu kuva mudamanu. 19Kigira mu mwoyo gwigwe zing'anagani zindamanu zitulaa mu, izimwimiliraa ukwita, okoheya, kandi okokora ikifwavi chi zing'ano ziosi; kunuura, koveha nu kugina avandi vandi. 20Yivi nivio ivikolaa mundu kuva mudamanu. Navuzwa kulia chukulia na mamisu ku makono, sikokolaa mundu kuva mudamanu mba.”

Lisuuvira liu mukali Mukanani

(Mar. 7:24-30)

21Yeso yatura ahene yaho nazia komenya muvivala via Tiro na Sidoni 22Kunangwa, mukali mulala Mukanani wi ikivala yicho yaza kuye, ni yanira navoora, “Mwami, Umwana wa Daudi, ombere zimbavasi! Mukaana wange aveeye ni lidemoni, na limukubiza ikivi ligali.”

23Navuzwa Yeso si yamutivulira kindu mba. Aviigi veve vaza kuye ni vamuvolera, “Umukungi azie! Akolondaa kandi akolaa liyoga inyima wiitu!”

24Navuzwa Yeso yativura, “Inzi ndaatumwa vuzwa ku amagondi gagota aga vandu va Isiraeli.”

25Navuzwa mukali oyo yaza nasigama imbiri weve, navoora, “Mwami, ongonye!”

26Yeso yamutivulira, “Sivoveeye vulahi kuvugura chukulia cha avana nu kusigisira zimbwa mba.”

27Mukali oyo yativura, “Yee, yago gaveeye agiligali Mwami; navuzwa kali zimbwa ziliizaa madonye gatigalaa kutura komesa yu Mwami wazio.”

28Ma Yeso yamutivulira, “ Mukali, lisuuvira lii lio ni linene. Aga ivi wenyaa galekoleka.” Kandi mukaana weve yahona ku ing'inga yene yeyo.

Yeso yahonyia avandu avanyingi

29Yeso yatura ahene yaho naavitira ku lujinga lwinyanza ya Galilaya. Yanigira mu kiguru, ni yikala mu.

30Viduma vinene via avandu vaza kuye, nivagingi avalema, avavoku, zidimbidi, avafogoya na vandi avanyingi avaari avalwaye, nivavaviika imbiri wi virenge via Yeso naye yavahonyia. 31Avandu vagenya ligali lwa valora izidimbidi nizimolomaa, na avalema nivagenda, avafogoya nivahoni kandi avavoku nivalora; na vaakuminya Nyasaye wa Isiraeli.

Yeso yalihiza vandu zielefu zine

(Mar. 8:1-10)

32Yeso yalanga aviigi veve vaze kuye navoora, “Mbererera avandu yava kigira vakava ninzi ku madiku gavaga na kalunu sivaveeye ni chavalia mba. Sinyenyaa vazie nivataalia mba, gase ihuyuki ilavatuula kunzira.”

33Avatumwa veve vamuvolera, “Hano koveeye muchangalangwe. Nakonyoole hayi ichukulia kiduukaa kulihiza ikiduma yiki choosi?”

34Yeso yavateva, “Muveeye ni milaango ji migadi janga?” Navo vaamutivulira, “Koveeye ni milaango saba nu tusuzi tokekeeke ututali tunyingi.”

35Kunangwa, Yeso yalaga ikiduma kwikala hasi. 36Ma yavugula imilaango ji migadi saba, nasandiza Nyasaye, nameganyia. Yaaha aviigi navo vagavulira avandu. 37Vosi valia kandi niviguta. Aviigi vavungiza amadonye nigizula ivihinda saba. 38Avandu avaalia vaali avasaza izielefu zine, nivatavaliziywi mu na avakali kandi avana.

39Maku Yeso yaasiivula avandu kandi, yanina mu liato nazia mu kivala cha Magadani.

Currently Selected:

MATAYO 15: LOGOOLI

Highlight

Copy