LUKA 9

Yeso yatuma aviigi likomi na vaviri

(Mat. 10:5-15; Mar. 6:7-13)

1Yeso yalanga harara aviigi veve likomi na vaviri; yavaha zinguru nuvunyari kukunga amademoni goosi, kandi kuhonyia zinguzu, 2Yavatuma kuzia kwilwaza uvwami vwa Nyasaye kandi kuhonyia avalwaye. 3Yavavolera, “Mutavugula kindu choosi chokogenda nacho ku logendo mba. Mutavugula imbimbu, anoho musigo, kinga chukulia anoho mabese, kandi mutava namakoti gaviri mba. 4Munyumba yoosi ya mwingira mu, mumenye mu kuduuka lwa muturaa mu lidaala yilio. 5Niiva avandu sivalamwingiriza, mmweye luguchi lutuli ku virenge vienyu lwa muva ni muturaa mu lidaala yilio, keve kelolero kuvo.” 6Aviigi yavo vaatura nivazia kwilwaza Ivangeri kandi nivahonyia avandu vulwaye havundu hoosi.

Herodi yahenda mwoyo kigira Yeso

(Mat. 14:1-12; Mar. 6:14-29)

7Lwa Herodi#9:7 Herodi: Lieta lilie liali Antipa-uwamihaa Galilaya., Mwamihi wa Galilaya, yahulira vindu viosi iviekolekaa, yahenda mwoyo ligali, kigira avandu valala vavoola ndi Yohana Mubatizi usimuguki kutura mu vakuzu. 8Avandi vavoola, “Elija aloleki,” kandi avandi vavoola, “Mulala ku avaporofeti va kale usimuguki.” 9Navuzwa Herodi yavoola, “Inzi ndalaga mutwi gwa Yohana gukalagwi. Navuzwa nu musaza ki uyu wa inzi mbulira vindu yivi kuye?” Maku yaazizagilira kogeriza alole Yeso.

Yeso yalihiza vandu zielefu zitano

(Mat. 14:13-21; Mar. 6:30-44; Yoh. 6:1-14)

10Lwa avatumwa virana, vavoolera Yeso ivindu viosi via vaakora. Yeso yavavugula venyine, nazia navo kuduuka mu lidaala lialangwa Bezisaida. 11Navuzwa lwi viduma via avandu vamanya yaga, vamulondelera. Yeso yavingiriza navavoolera amakuva guvwami vwa Nyasaye, kandi yahonyia yavo avaari ni lienya vahonywe.

12Lwi iliuva liatanga koyeera, avaari likomi na vaviri vaza ku Yeso nivamuvoolera, “Ovoolere kiduma cha avandu vazie mu tudaala toveeye ahimbi nu mumilimi aha vanyoola viukulia na ahokogona, kigira hakoveeye hano, ni mukiziimi.”

13Navuzwa Yeso yavavolera, “Munyi aveene muvahe kindu chavanyala kulia.” Navo vaamutivulira, “Koveeye vuzwa nimilaango ji migadi jitano ni zisuzi ziviri. Ivi wenyaa kuzie kugulira kiduma yiki choosi viukulia?” 14Haali ho na vasaza zielefu zitano.

Yeso yavolera aviigi veve, “Muvikalize hasi mu viduma via avandu amusini sa kilala.”

15Aviigi vaakora ndio, nivavikaliza vosi hasi. 16Yeso yavugula milaango ji migadi jitano ni zisuzi ziviri, nahenza mwigulu, nasandiza Nyasaye naavigasiza, nameganyia; navihaana ku aviigi veve vagavuliri avandu. 17Vosi valia niviguta. Aviigi veve vavungiza vihinda likomi na viviri via madonye gi viukulia viatigala.

Petero Avulaa ndi Yeso aveeye Kristo Mwana wa Nyasaye

(Mat. 16:13-19; Mar. 8:27-29)

18Lwa Yeso yaali nasaalaa yenyine mu vwivisu aviigi veve vaza kuye. Yeso yavateva, “Ividuma vivoora inzi mbeeye vwaha?”

19Vaativura, “Avalala vavoola, ivi oveeye Yohana Mubatizi, navuzwa avandi vavoola Elija, na avandi, ni mulala ku Vaporofeti vakale usimuguki.”

20Yeso yavateva, “Na munyi muvooraa, inzi mbeeye vwaha?”

Petero yativura, “Oveeye Kristo Mwana wa Nyasaye.”

Yeso yamoloma kigira lidambizwa, likuza ni lisimuguka lilie

(Mat. 16:20-28; Mar. 8:30—9:1)

21Yeso yaviganihiza vudinyu ligali ndi vatavoolera mundu kali mulala amakuva yaga mba. 22Yavavolera “Mwana wa Adamu kuduuka asalirizwi ku vindu vinyingi kandi yambakanwe navakulundu, avasaalisi vanene, na avigizi vi Lilaga, kandi yiitwi. Navuzwa ku lidiku lia kavaga alasimugukizwa.”

23Yavolera avandu vosi, “Niiva mundu woosi yenya kononda, gamudukira yigaye, kandi avuguli musalaba gwigwe yanonde kazozo. 24Mundu woosi wenyaa kohonyia livamwoyo lilie, alaligotiza; navuzwa woosi ogotiza livamwoyo lilie kigira inzi, alalihonyia. 25Ni vulahi ki mundu anyoore kivala yiki choosi, navuzwa yidivizi? 26Mundu woosi ulivera inzi zisoni kandi amigizu gange, Mwana wa Adamu alakamuvere zisoni lwa aliiza mu vukumi vwivwe mwene nu mu vukumi vwa Baba nu vwi zingelosi vatakatifu. 27Inzi muvooleraa agiligali, valala ku avasingiyi hano sivalikuza nivakikiri kolola Vwami vwa Nyasaye mba.”

Yeso agirung'anaa ligondo

(Mat. 17:1-8; Mar. 9:2-8)

28Madiku munane inyima wokovoola makuva yaga, Yeso yavugula Petero, Yohana na Yakobo niyaanigiraa navo mu kiguru kusaala. 29Lwa yaali nasaara, ligondo liu mumoni mwimwe liagirung'ana, kandi zinguvu zizie ziagwa zing'ereng'anu kuli loheni. 30Kandi henza, avandu vaviri vamoloma naye, navo vaali Musa, na Elija. 31Valoreka mu vukumi vonene ligali vamoloma na Yeso. Vavolerana naye ku likuza lilie lia gamudukira atwekize mu Jerusalemi. 32Zindoolo ziavuha Petero harara na avayaali navo. Navuzwa lwa vavuuka, valora uvukumi vwivwe, harara na avandu vaviri avaari nivasingiyi naye. 33Lwa avandu vaviri yavo vaali nivenya kwavukana na Yeso, Petero yamuvolera, “Mwami, nivulahi kunyi komenye hano. Leka kwumbake vidioli vivaga, kilala chicho, ikindi cha Musa ni ikindi cha Elija” Mugiligali, Petero siyamanya icha yavoola mba.

34Lwa Petero yaali nakevoola ndio, lilesi liaza nilivakinga, kandi vaatia ligali lwa vingira mu lilesi. 35Mwoyo gwatura mu lilesi nigovoora, “Uyu nu Mwana wange, uwa inzi mali kotovola, mumuhuliri!”

36Lwu mwoyo gwaali nigwakamoloma, Yeso yaloleka naveeye yenyine. Aviigi vakiring'ana kandi si vavoolera ku mundu kali mulala ivindu via valora mba.

Yeso yahonyia muyaayi waali nilidemoni

(Mat. 17:14-18; Mar. 9:14-27)

37Lidiku lialonda ku, lwa vasulunguta kutura mu kiguru, kiduma kenene cha avandu chaza kumwaganira. 38Nonoho, mundu mulala kutura mu kiduma yahanzuka nu mwoyo munene navoora, “Mwigizi, ngogonya ohenze ku mwana wange, kigira aveeye mwana wange muderwa. 39Lidemoni limugumiraa, ma ahene yaho akubaa zikwiri kandi limutuula hasi kuli windulumi matanga litula lufulu mumunwa; Lidemoni yili silimulekaa kali hadi mba; limudivizaa ligali. 40Ndagoonya aviigi vovo valitulize, navuzwa sivanyala mba.”

41Yeso yativura navoora “O, munyi avandu vilikula litasuuvira na liu vwoni yili, ndava ni munyi na ukwikuzira ni munyi kuduuka ng'inga ki? Leeta muyaayi woovo hano.”

42Lwu muyayi oyo yaali niyazaa ku Yeso, lidemoni liamutuula nilimugalagalizira hasi kuli mundu wi indulumi. Navuzwa Yeso yagondokera lidemoni yilio, nahonyia muyaayi oyo ma namuhaana ku baba weve.

Yeso amolomaa kandi ku likuza lilie

(Mat. 17:22-23; Mar. 9:30-32)

43Avandu vosi vagenya ligali Zinguru nu Vunyali vwa Nyasaye. Navuzwa lwa avandu vosi vaali nivakihuga ku vindu viosi via Yeso yakola, yavolera aviigi veve, 44“ Mutegize amatu ginyu vulahi, muhuliri amakuva ga nyenya kumuvolera! Mwana wa Adamu azizaa kuzamwa kandi kuvikwa mu makono ga avandu.” 45Navuzwa aviigi yavo sivamanyiriza kivuni chi livoora yili mba. Likuva yili liaviswa kuvo vavuli kulimanya; kandi vaatia ligali kumuteeva kivuni chi livoora yili.

Nivwaha oveeye munene mwigulu

(Mat. 18:1-5; Mar. 9:33-37)

46Lihangalizana liatanga hagati haavo nivateevana; ni vwaha kuvo oveeye munene kuvita avandi vosi. 47Navuzwa Yeso yamanya zing'anagani ziali mu mioyo jaavo. Yavugula mwana mukekeeke naamusingiriza ahimbi naye. 48Yavavolera; “Ku vosi ulingiriza mwana mukekeeke uyu kigira lieta liange, yingirizaa inzi. Ku vosi ulingiriza inzi kandi, yingirizaa uyu uwanduma. Oveeye mukekeeke ku munyi vosi, uyu niyie oveeye munene.”

Mundu utahing'anaa ni munyi aveeye ku lovega lwinyu

(Mar. 9:38-40)

49Yohana yativura navoora; “Mwami, koololi mundu mulala nakungaa mademoni natumikira lieta liilio; kumanyi nikumugaya kigira siaveeye mulala ku kunyi mba.”

50Yeso yavoola, “Mutamugayi mba, Kigira ku vosi utahing'anaa ni munyi aveeye kolovega lwinyu.”

Lidaala lia vandu va Samaria vasuura kwingiriza Yeso

51Lwi lng'inga ya kuduuka ya Yeso avugulwa kwirana mwigulu, mwene yaatanga logendo kuzia Jerusalemi. 52Yatuma avatumwa viimili imbiri weve. Vazia mu lidaala lia vandu va Samaria kumwetegekizira vindu viosi. 53Navuzwa avandu vi lidaala yilio sivamwingiriza mba, kigira gamanyikanaa ndi yaali naveeye kologendo kuzia Jerusalemi. 54Lwa aviigi veve, Yakobo na Yohana, valora ndio vavoola, “Mwami wenyaa kulange muliru gwiki kutura mwigulu guvasambe?”

55Navuzwa Yeso yagirung'ana navagondokera. 56Maku Yeso harara na aviigi veve vazia mu lidaala lindi.

Avandu avenyaa kolonda Yeso

(Mat. 8:19-22)

57Lwa vaali ni vagenda kunzira, mundu mulala yamuvolera, “Ndakolonda hoosi aha uzia.” 58Yeso yamutivulira, “Vivwi viveeye ni zimbangaywa, namanyonyi gigulu gaveeye ni zinyumba ziago, navuzwa Mwana wa Adamu siaveeye na hokososera mba.”

59Yeso yavolera mundu wundi, “Nonda.” Navuzwa mundu oyo yavoola, “Mwami mbe munwa ndange kuzia kuta baba wange.” 60Yeso yamuvolera, “Oleke vakuzu vate avakuzu vaavo aveene. Navuzwa ivi uzie kwilwaza uvwami vwa Nyasaye.”

61Mundu wundi yamuvolera, “Mwami, inzi ndakolonda, navuzwa oleke ndange kuzia kusiivula avinyumba yange kutanga.”

62Yeso yamutivulira, “Sihaveeyeho nu mundu uviikaa mukono ku ligembe ma ahenza inyima, siaduukanaa kutumika mu Vwami vwa Nyasaye mba.”

Yeso yatumaa Aviigi sabwini na vaviri

Currently Selected:

LUKA 9: LOGOOLI

Highlight

Copy