LUKA 8

1Inyima wa yaga, Yeso yagendagenda kuvitira mu madaala kandi mutudaala, niyilwaza Makuva Malahi kigira Vwami vwa Nyasaye. Aviigi veve likomi na vaviri vazia harara naye, 2kandi avakali valala avaari ni vahonyiywi kulula ku roho midamanu kandi zinguzu: Maria walangwa Magadalena uwa Yeso yaatuliza kuye amademoni saba, 3na Joana mukali wa Chuza, uwaali mulindi munene wuvutugi vwi inyumba yoosi ya Herodi, Susana kandi vandi avanyingi. Avakali yava vatumikira linyola liavo okokoonya Yeso harara na aviigi veve ku viukulia.

Lugano lwu mumizi

(Mat. 13:1-9; Mar. 4:1-9)

4Kiduma kenene cha avandu vaatura mu madaala goosi ni vivungiza harara ni vazia ku Yeso. Yeso yavakuba ulugano navoora:

5“Mumizi yazia namiiza vuguza vwivwe. Lwa yaali namiiza, vulala vwagwa kunzira, ni vuduvagwa, kandi amanyonyi gigulu gavovoza. 6Vuguza vundi vwagwa ku marova gukulwanda, na lwa vwamera, nonoho vwuma kigira sivwanyoola amazi gukuvuvirukiza mba. 7Vuguza vundi vwagwa mumafwa, na amafwa gaviruka harara navwo, nigavukunika. 8Vuguza vundi vwagwa mu marova amagunamu ni vomera, nivuviruka, nivwama mia ku vuli kitinya.” Yeso yamaliriza vindu yivi navoora, “Oveeye na amatu gukuhulira, ahuliri.”

Kivuni chokomoloma mu zing'ano

(Mat. 13:10-17; Mar. 4:10-12)

9Aviigi veve vateva Yeso kivuni chuluganu yilu lovoolaa. 10Yeso yativura, “Munyi muheveywi limanya lia gaviswa gu Vwami vwa Nyasaye, navuzwa ku vandi inzi molomera mu zing'ano, kunangwa kali nivahenza vudinyu, sivanyala kolola mba kali nivahuliriza, sivanyala kumanyiriza mba.”

Yeso yiivara lugano lwu mumizi

(Mat. 13:18-23; Mar. 4:13-20)

11Yiki nicho kivuni chu lugano yilu “Uvuguza ni likuva lia Nyasaye. 12Uvuguza vwagwa kunzira ni yavo avandu avamali kuhulira, navuzwa Setani yaazaa kandi atulizaa likuva zana mu mioyo jaavo, kunangwa avakole vavuli kusuuvira kandi vavuli kohonywa. 13Uvuguza vwagwa ku marova guuku lwanda ni yavo avavuguraa likuva nuvuyanzi. Navuzwa sivaveeye nimiri mba; vasuuvira vuzwa ku ing'inga ngekeeke, navuzwa lwi ing'inga ya magerizu iduuka, vaatura ku lisuuvira. 14Uvuguza vwagwa mumafwa ni yavo vahulira, navuzwa lwa vagenda mu zinzira ziavo, vakunikwa ni lihenda mwoyo lie kivala yiki, uvutugi kandi liiva lie vindu vie kivala; makuyu gaavo sigengaa mba. 15Uvuguza vwagwa mu marova malahi na magunamu ni yavo avahulira likuva ma valigumira nu vusuuvirifu vwosi kandi numwoyo mulahi gwosi kandi vikuzira kuduuka lwa vaama amakuyu.

Itaya mu kihinda

(Mar. 4:21-25)

16“Sihaveeyeho numundu uhambizaa itaya ma agikunikira mu kihinda anoho agiviikaa mu lwaalo lwi kidali mba. Nitali agiviikaa igulu komesa, kunangwa avandu vingira vaduuki kolola uvulavu.

17“Kigira sihaveeyeho ni kindu chaviswa ikilivula kulang'aminywa havulavu mba, kandi sihaveeyeho nichaviswa ikilivula kumanyikana, anoho koleetwa havulavu mba.

18“Kigira yaga, mwilindi vulahi kuli muhulira; kigira oyo oveeye nacho, alahevwa vindi, na oyo utaveeye nacho alanyagwa kali kekekeeke cha aganagana aveeye nacho.”

Mama wa Yeso na avamwavo veve

(Mat. 12:46-50; Mar. 3:31-35)

19Kunangwa mama wa Yeso na avamwavo veve vaza ku muloraa, navuzwa sivali vanyara kuduuka ahimbi kuye mba, kigirakiduma kenene cha avandu. 20Mundu mulala yazia ku Yeso na amuvoleraa, “Mama woovo na avamwavo vovo vasingiyi ichova, venya vakolole.”

21Navuzwa Yeso yavavolera, “Mama wange na avamwavo vange, ni yavo avahulira likuva lia Nyasaye nivalilonda.”

Yeso yakiring'anyia viguvuli

(Mat. 8:23-27; Mar. 4:35-41)

22Lidiku lilala Yeso yavolera aviigi veve, “Hambi kuzie engeleka, ku lovega lundi lwinyanza.” Ma vanina mu liato nivatanga kuzia. 23Lwa vaali nivambuka inyanza Yeso yagona. Nonoho imbuza yahuuza ku inyanza, ni iliato liatanga kwizura amazi nukwiyina, kandi vaali muvudinyu vonene. 24Aviigi vazia kuvukiza Yeso nivamuvoolera, “Mwami, Mwami, kudivaa!”

Yeso yavuka kandi nagondekera imbuza ni viguvuli via amazi; viakiring'ana kandi gwaali mulengera. 25Maku yateeva aviigi veve, “Lisuuvira lienyu liveeye haliha?” Navuzwa vaatia kandi vagenya ligali nivatevanaa aveene naveene, “Ivwaha uyu? Agondokeraa kali imbuza ni viguvuli via amazi, kukiring'ana ma vimuhulira?”

Yeso yahonyia mundu waali na mademoni

(Mat. 8:28-34; Mar. 5:1-20)

26Yeso harara na aviigi veve vamanya nivambuka inyanza nivaduuka ku lujinga lwi kivala cha vandu va Gerasene, lidaala liveeye ku lwangereka lwi inyanza kutura Galilaya. 27Lwa Yeso yika kuzia ku lujinga, mundu mulala uwaali na mademoni, yaza namwaganira kutura mu lidaala yilio. Mundu uyu si yiviika zinguvu ku ing'inga indambi mba kandi si yamenya munyumba mba navuzwa yamenya muvilindwa. 28Lwa yalora Yeso, yahanzuka nu mwoyo munene, naagwa havirenge, imbiri weve, navoora, “Mbeeye naki niivi, Yeso, Mwana wa Nyasaye, oveeye igulu ligali? Ngogonya, utangubiza kivi mba.” 29Yavoola yaga kigira Yeso yaali nakungi mademoni kutura muye. Mademoni gaali ni gamugumira ku madiku manyingi. Kali niiva vandu vamuvoha virenge na amakono niminyororo ji vivia kandi vamulinda vudinyu, yakalanyia iminyororo zana. Lidemoni liamukunga nukumuhira muchangalangwe.

30Yeso yamuteeva, “Lieta liilio nivwaha?”

Naye yativura, “Lieta liange ni ‘Legiona,’ ” kigira amademoni manyingi gaali ni gingira muye. 31Gamugoonya atagakunga gazie mbogo mba.

32Hazana yaho, haali ho ni chayo kenene chi zinguruvi niziaya ku kiguru. Kunangwa amademoni gagoonya Yeso agakungi gazie kwingira mu zinguruvi. Yagaha munwa. 33Amademoni gaturaa mu mundu oyo, ni gingira mu zinguruvi. Ichayo chi zinguruvi choosi chasulunguta zimbiru kuduuka munyanza; nizikuzira mu mazi.

34Lwa avayi valora vindu viali ni viekoleki viiruka zimbiru nivazia kulandiza amakuva yaga mu lidaala kandi mu kivala choosi. 35Avandu vazia kolola agaali ni gekoleki. Lwa vaduuka ku Yeso, vanyoola mundu wa mademoni gaali nigatuliziywi muye niyikaye ha virenge via Yeso; niyiviiki zinguvu, kandi niyituliyi. Vaatia ligali. 36Avandu avaari nivaloli ichekolekaa, vavavolera kuli uwaali na mademoni yahonywa. 37Maku avandu vosi, avivivala viali ahimbi via Gerasene vagoonya Yeso atuli kuvo; kigira vaali nu vuti vonene ligali. Yeso yingira mu liato nazia. 38Mundu wa mademoni gaali nigatuli kuye, yagoonya Yeso ayaanze aleke vazie naye. Navuzwa Yeso namuvolera, 39“Wirane yengo woovo kandi ulandizi aga Nyasaye akokoleeye.” Kunangwa mundu oyo yazia yengo nalandiza agokogenyia ga Yeso yaali naamukoleye.

Mukaana wa Yairo nu mukali wadira kunguvu ya Yeso

(Mat. 9:18-26; Mar. 5:21-43)

40Lwa Yeso yirana kolovega lundi lwinyanza, kiduma cha avandu chamwaganira nuvuyanzi, kigira vosi vaali nivamulindiliraa. 41Maku mundu mulala, munene wi lisinagogi uwalangwa Yairo, yaza naagwa ha virenge via Yeso, namugoonya ayaanze yingiri munyumba yeeye, 42kigira mukaana weve muderwa, uwaali ahimbi ni mihiga likomi nagiviri yaali nakinda.

Lwa Yeso yaali nazizaa, viduma via avandu viamukumberiza zimbega ziosi, ahimbi vamuduvage. 43Mukali waali niyalwala vulwaye vwukutaza masahi ku mihiga likomi na mbiri yaali mu kiduma. Mukali oyo yamala ivindu vivie viosi ku avaahi vi zinyasi; navuzwa kali mulala siyaali anyala kumuhonyia mba. 44Yaza inyima wa Yeso, nadiira ku lukigiti lwi inguvu yeeye; nonoho litaza lilie liakalizira.

45Yeso yateeva, “Nivwaha undiiyi?”

Lwa avandu vosi vambakana, Petero yavoola, “Mwami, avandu vakukumbirizi kandi vakumina.”

46Navuzwa Yeso yavoola, “Mundu yaali kundira, ndakumanya kigira nzihulira zinguru ni ziituli ku inzi.” 47Kigira mukali yalora ndi sianyala kwivisa, yaza nadegeraa, naagwa hasi ha virenge via Yeso. Ahene yaho, imbiri wa avandu vosi, yavoola kivuni kigiri nadiira Yeso kandi kuli yaali nahonyiywi. 48Yeso yamuvolera, “Mukaana wange, lisuuvira liilio likohonyi; zia ni mirembe.”

49Lwa Yeso yaali nakevoola yaga, mundu mulala yatumwa kutura munyumba ya Yairo, Munene wi lisinagogi, navoora, “Mukaana woovo ukuzi. Utanyangiza mwigizi mba.”

50Navuzwa lwa Yeso yahulira ndio, yavolera Jairo, “Utatia mba. Usuuviri vuzwa, na alahona.”

51Lwa yaduuka hanyumba, siyavugilira mundu wundi kwingira harara naye, navuzwa Petero, Yohana na Yakobo, kandi baba na mama wu mukaana. 52Avandu vosi valira nivasioma. Navuzwa yavavolera, “Mutalira mba. Siakuzi mba, agonaa.”

53Vosi vamuseka kigira vamanya ukuzi. 54Navuzwa Yeso yamugumira mukono nalanga navoora, “Mwana wange, vuka.” 55Mwoyo gwigwe gwirana vwangu, nasingira. Yeso yavolera aviivuli veve vamuhe chukulia alie. 56Aviivuli veve vagenya ligali, navuzwa Yeso yavalaga vatavoolera mundu kali mulala, agekoleki mba.

Currently Selected:

LUKA 8: LOGOOLI

Highlight

Copy