LUKA 7

Yeso yahonyiaa mutumikiri wu munene wa avasikari wa Rumi

(Mat. 8:5-13)

1Lwa Yeso yaali ni yakamala kovora vindu yivi viosi ku vandu, yingira mu lidaala lia Kaperinaumi. 2Uwene yeyo, Munene wa vasikari va Varumi mia yaali nu mutumikiri uwu Mwami weve yaali niyayaanza kukila. Mutugwa oyo yaali mulwaye ligali kandi yaali ahimbi kukuza. 3Lwu munene wa vasikari mia oyo yahulira ndi Yeso aveeye mu Kaperinaumi, yatuma avakulundu vi dini ya Vayuda vazie kuye, vamugoonye yaaze kohonyia mutumikiri weve. 4Lwa vaduuka ku Yeso, vamugoonya ligali nivavoora, “Mundu mulahi uyu adukanaa ligali umukoonye, 5kigira yayanza avandu viitu, kandi umwene yakwumbakira lisinagogi.”

6Ku Yeso yazia harara navo. Lwa yaali ahimbi kuduuka hango, munene wa vasikari mia oyo yatuma avalina veve ku Yeso vamuvolere, “Mwami, utanyang'ana mba. Kigira inzi sindukana ivi kuuza kwingira munyumba yange mba. 7Yiki nicho kigiri nindora ndi sinduukani kali kuuza ku ivi mba. Navuzwa ovole vuzwa likuva, na mutumikiri wange alahona. 8Inzi mwene mbeeye hasi hu vunyali vwa vanene vange, kandi mbeeye na vasikari mia hasi hange ava inzi nindanga. Nimbolera uyu, ‘Zia,’ ma azia kandi wundi, ‘Hamba,’ ma yaza kandi mbolera mutugwa wange, ‘Kola ndi’ maakora ndio.”

9Lwa Yeso yahulira vindu yivi, yaagenya ligali. Yagirung'ana navolera kiduma cha avandu vamulonda, “Inzi muvooleraa; ngikiri konyoora mundu kali mulala oveeye ni lisuuvira linene kuli yili kali mu Isiraeli mba.” 10Lwa vatumwa avaari nivatumiiywi ku Yeso viirana yengo, vanyoola mutumikiri naahoni.

Yeso yasimugukiza muyaayi wu mukali mukunzakali

11Lwinyima, Yeso yazia mu lidaala lia Naini. Aviigi veve ni kiduma kenene cha avandu vamulonda. 12Lwa yaali niyakaduuka ha kirivwa chi lidaala, henza, mukuzu yaali naleetwa ichova. Mukuzu oyo yaaha muyaayi muderwa ku mama weve, uwaali mukunzakali. Avandu vanyingi vi lidaala yilio vaali harara naye. 13Lwu Mwami Yeso yamulola yamuvererera, namuvolera, “Utalira mba.” 14Kunangwa Yeso yisunda ahimbi, nadiira ku lisandugu, yavo avaari nivagingi muviri vasingira. Yeso yamuvolera, “Musoleri, ngovolera, Vuka!” 15Uyu mukuzu yavuka, niyikara, natanga komoloma. Yeso yamuhaana ku mama weve.

16Avandu vosi vaali nuvuti, nivakuminya Nyasaye. Nivavoora, “Umuporofeti munene yanyooleki mu kunyi. Nyasaye yaazi kohonyia avandu veve.”

17Amakuva mageni ga Yeso yaga, galanda mu kivala choosi chi Vuyuda nivivala viali ahimbi ni Vuyuda.

Avatumwa kutura ku Yohana Mubatizi kuzia ku Yeso

(Mat. 11:2-19)

18Aviigi va Yohana vamuvolera vindu yivi viosi.

19Yohana yalanga vaviri ku aviigi veve, naavatuma ku Mwami Yeso, vamuteeve; “Ivi niyie wa Yohana yavoola alaza, anoho kulindi wundi?”

20Lwa aviigi va Yohana vazia ku Yeso, vavoola, “Yohana Mubatizi akutumi ku ivi kokoteve, niiva ivi niyie uwa yavoola ulaaza, anoho kulindi wundi?”

21Ing'inga yene yeyo, Yeso yahonyia avandu vanyingi avaari nu vulwaye, ni zinguzu na roho midamanu nahaana lilola ku avandu vanyingi avaari nivaavakula. 22Maku yativura navolera avatumwa yavo, “Muzie kovoolera Yohana aga mumali kolola kandi aga mumali kuhulira: avavoku valora, avalema vagenda, avaveeye no vogere vatakasangwa, avahana amatu vahulira, avakuzu vasimugukizwa, na Makuva Malahi ga Nyasaye gilwazwa ku avadaka. 23Vaveeye nu vugasu yavo vatahayahayaa kigira inzi.”

24Lwa avatumwa va Yohana vaali nivakazia, Yeso yaatanga kuvolera kiduma cha avandu kigira Yohana: “Mwazia mwigendanyama kolola ki? Kidundu chi imbuza yaiung'usaa? 25Nigatali, Mwazia kolola ki? Umundu wiviika zinguvu zindahi kandi nivalia viukulia vilahi viu vuguli vamenya mu zinyumba ziu vwami! 26Navuzwa mwazia yo kolola ki? Umuporofeti? Yee, inzi muvooleraa, mwalora mulala uviti muporofeti ligali. 27Yohana niyie wa Mang'oda Matakatifu yaga gavoora, ‘Henza, inzi Nyasaye, nduma mutumwa wange kwimila imbiri woovo; ulilomba inzira yooyo imbiri woovo.’ ” 28Yeso yameda kovora, “Muvooleraa, ku avandu vosi va vakali viivula, si haali ho nu munene kuvita Yohana; navuzwa oveeye mukekeeke mu Vwami vwa Nyasaye, aviti Yohana.”

29Lwa avandu vosi, kali avasololi vuvusuuru vahulira amakuva ga Yeso; vavugilira ndi zinzira zia Nyasaye ziveeye zinungi, kigira vaali ni vabatiziywi na Yohana. 30Navuzwa Avafarisayo na avigizi vi Lilaga vahangaliza uvulariri vwa Nyasaye kandi vasuura kubatizwa na Yohana.

31Yeso yaazizagilira kovora “Ndafananyia naki avandu vi likula yili? 32Avandu yava vaveeye kuli avana aviikalaa mu chiitu. Muganda mulala guhanzukiraa ugundi, ‘Kwa mu kubira lilere, mukeselero navuzwa simwavina mba. Kwimba zinyimbu ziu lwikuulu navuzwa simwalira mba!’ 33Yohana Mubatizi yaza naahonga lilia kandi natanwezaa iwaini navuzwa mwavoora ‘Aveeye ni lidemoni!’ 34Mwana wa Adamu yaza nalizaa kandi nanwezaa, na munyi mwavoora, ‘Henza, aveeye muhuvaali kandi muhambiki wi iwaini, mulina wa vasololi vuvusuuru, kandi wa avoni!’ 35Navuzwa ovogeri vwa Nyasaye vumanyikana kuva uvulungi ku yavo vosi avavuvugiliraa.”

Mukali mwoni yavaka Yeso maguta

36Mulala ku Avafarisayo yagenihiza Yeso kuzia kulia harara naye munyumba yeeye. Yeso yazia niyikara kulia viukulia. 37Lwu mukali mulala, uwamenyaa mu liiva liu vwoni mu lidaala yilio, yahulira ndi Yeso alizaa munyumba yu Mufarisayo, yaleeta ijuba ya maguta guvuguli agafunyaa umwayu. 38Yasingira inyima havirenge via Yeso nalira. Yaatanga kusama virenge via Yeso na maliga geege. Maku yavieya niliisu liu ku mutwi gwigwe, navivuusa, kandi yaavivaka maguta gafunyaa mwayu.

39Lwu Mufarisayo wamugenihiza yalora yaga, yaganagana mwene, navoora, “Niiva mundu uyu yakaveeye muporofeti, ngano yakamanyi mukali uyu nivwaha, umudiraa; yakamanyi ni liiva liu vwoni lia lugano ki liu mukali uyu amenyi mu!”

40Yeso yativura namuvolera, “ Simoni, mbeeye nilikuva liu kokovoolera.”

Naye ya muvooleraa, “Mwigizi, mbolera.” 41Yeso yaatanga kovora, “Avandu vaviri vegoba mabese ku mundu wegobizaa mabese. Mulala yegoba zidinari mia tano, nu wundi amusini. 42Kunangwa avandu vaviri yavo, siyaali ku ho uwaali na mabese giukwilanyira mwene gio mba. Mwegobizi oyo yavasamiha vosi. Ku yava vaviri ni uliha ulimuyaanza kuvita?”

43Simoni yativura namuvolera, “Ng'anagana uyu wasamiifa ligovi linene.”

Yeso yamuvolera, “Utivuuyi vulahi.” 44Yeso yagirung'ana nahenza mukali na avooreraa Simoni, “Olola mukali uyu? Nyingiyi munyumba yooyo, na ivi siombeeye amazi gu kwisaava virenge viange mba. Navuzwa mukali uyu usavizi virenge viange na maliga geege, kandi weeyi maliga zana ni liisu liu ku mutwi gwigwe. 45Ivi Si unyingiriizi ni livuusa, navuzwa mukali uyu, kutura ing'inga ya nyingiyi, siyali kolekera kuvuusa virenge viange mba. 46Ivi siumbaki amaguta ga muzeituni ku mutwi gwange mba, navuzwa uyu umbaki virenge viange na maguta guvuguli agafunyaa umwayu. 47Kunangwa, ngovolera, vuyanzi vonene vwa amali kumanyia vudinyirizaa ndi, uvwoni vwivwe vunyingi vumali kusamiifa. Navuzwa ku vosi umali kusamiifa hakekeke amanyia vuyanzi vokekeeke vuzwa.”

48Maku Yeso yavolera mukali oyo, “Uvwoni vuvwo vumali kusamiifa.”

49Avageni vandi aviikalaa na Yeso ku viukulia, vatanga kuganagana mu mioyo jaavo aveene nivateevana, “Nivwaha uyu, usamiihaa kali uvwoni?”

50Yeso yavolera mukali oyo, “Lisuuvira liilio likohonyi, uzie mu mirembe.”

Avakali avalondaa Yeso

Currently Selected:

LUKA 7: LOGOOLI

Highlight

Copy