LUKA 10

1Inyima wa yaga, Mwami Yeso yatovola aviigi vandi sabwini na vaviri; navatuma vaviri, sa vaviri kwimila kuzia imbiri weve mu madaala goosi kandi hoosi aha yenya kuzia mwene. 2Yavavolera, “Ligesa liveeye linene, navuzwa avayinziri vagehi, kigira yaga musaale Mwami wiligesa atumi avayinziri vazie mu mulimi gwigwe gwi ligesa. 3Muzie! Mutumaa kuli vimeme via magondi hagati hi vivwi. 4Mutavugula kebeti, anoho mabese anoho musigo, anoho vilato mba. Kandi mutachelizi mundu kali mulala kunzira mba.

5“Munyumba yoosi ya muva nimwingira muvoore kutanga, ‘Mirembe jive munyumba yiyi!’ 6Niiva mundu uyanzaa mirembe amenyi mu, licheliza lienyu lilava kuye. Navuzwa nataveeye mu, mirembe yijo jilirana ku munyi. 7Mumenye munyumba zana. Mulie kandi munwi choosi cha muhevwa; kigira muyinziri adukanaa na madanyi geege. Mutavoyavoya kutura mu zinyumba yiyi niyi mba.

8“Lwa muva ni mwingira mu lidaala liosi na vamwingirizi, mulie viukulia via valeta imbiri winyu. 9Muhonyie avalwaye vaveeye mu lidaala yilio. Muvavoolere ‘Uvwami vwa Nyasaye vuuzi ahimbi ku munyi.’ 10Navuzwa lwa mwingira mu lidaala, na nivatamwingiriza, muturi mu lidaala yilio muzie mutuzira twalio ma muvoore; 11‘Kali luguchi lwi lidaala lienyu luhandi kuvirenge vietu, kumweyera lutigale ku munyi aveene. Navuzwa mumanye yaga. Uvwami vwa Nyasaye vwisundi ahimbi ku munyi.’ 12Ligali muvooleraa, Nyasaye alamanyia livererera ku Sodoma ku Lidiku lie Likalaga yilio ukuvita ku lidaala yilio.

Amadara gatasuuvira Yeso

(Mat. 11:20-24)

13“O, vayaye, kilaamo keveeye ku ivi Korazini! O, vayaye kilaamo keveeye ku ivi Bezisaida! Miyinzi minene jivilolekizu ijakolwa mu munyi, jilava nijakolwa mumadala ga Tiro na Sidoni, ngano avandu yavo vigamira kale, ni viviiki amagunia kandi nivikaye mu ligoke. 14Navuzwa vulakave vulahi ligali ku Tiro na Sidoni ku Lidiku lie Likalaga ukuvita munyi. 15Na ivi Kaperinaumi, wenyaa kwenenehiza kuduuka mwigulu? Ulakikizwi hasi mu kihadisi.”

16“Oyo uhulira munyi, ahuliraa inzi; kandi oyo usulaa munyi asuraa inzi, kandi oyo usulaa inzi asuraa uwanduma.”

Lirana lia aviigi sabwini na vaviri

17Avaari sabwini na vaviri virana nuvusangali vonene nivavoora, “Mwami, kali amademoni gamali kukuhulira kandi gamali kugalani mu lieta liilio.”

18Yeso yavativulira, “Ndaalora Setani niyaguluka kutura mwigulu kuli oloheni. 19Henza, inzi mali kumuha uvunyali kuduvagira hasi zinzoka ni zing'e, kandi uvunyali vwosi vwu kuguutira zinguru ziosi ziu musigu oyo. Sikeveeye ho kindu ku viosi ikinyala kumusaliriza kali hakuzu mba. 20Kunangwa mutasangala kigira mademoni gaali kwegehiza ku munyi, navuzwa musangare kigira amita ginyu gang'odeywi mwigulu.”

Uvusangari vwa Yeso

(Mat. 11:25-27; 13:16-17)

21Ing'inga zana yeyo, Yeso yizula uvusangari mu Roho Mutakatifu, niyizominya Nyasaye, navoora, “Baba, Mwami wi ligulu nilirova. Ngusandizaa ligali kigira ivi umali kuvisa ivindu yivi kuvageri kandi ku avilimanya, navuzwa uvuuliyi vihanzahanza. Yee, Baba, nindio wayanza yaga gakolwi kuli vulaliri vuvwo.

22“Baba wange ombeeye vindu viosi. Sihaveeyeho numulala umanyi mwana nivwaha, natali Baba, kandi sihali nu umanyi Baba nivwaha, natali Mwana, kandi ku vosi wu Mwana atovoraa ku muvuulira.”

23Yeso yagirung'ana ku aviigi veve na avavolera makiriri, “Ziveeye nuvugasu zimoni zilolaa vindu via munyi muloraa! 24Kigira inzi muvooleraa, avaporofeti avanyingi kandi avami, venya valore vindu via munyi muloraa, navuzwa sivavilola mba, kandi kuhulira aga munyi muhulira, navuzwa sivagahulira mba.”

Lugano lwu Musamaria mulahi

25Ing'inga indala, mwigizi mulala wi Lilaga yasingira nageriza koteega Yeso navoora, “Mwigizi, gandukira ngole kinduki konyoora livamwoyo litahera mba?”

26Yeso ya mutivulira, “Gang'odwa ndi mu Mang'oda Matakatifu? Ugasoma ndi?”

27Mwigizi wi Lilaga oyo, yativura navoora, “ ‘Gakuduukiraa uyaanze Mwami Nyasaye woovo nu mwoyo gugwo gwosi, na Roho gugwo gwosi, ni zinguru zizio ziosi’; kandi, ‘Uyaanze mutende woovo kuli wiyanza.’ ”

28Yeso yamuvolera, “Utivuuyi vulahi. Kola ndio, na ulanyora livamwoyo litahera mba.”

29Navuzwa mwigizi wi Lilaga oyo, yenya kwisuuviriza ndi oveeye mulungi, yateeva Yeso, “Nivwaha oveeye mutende wange?”

30Yeso yamutivulira, “Yaali ho mundu mulala uwaali nasulungutaa kutura Jerusalemi nazizaa Jeriko, na yagwa mu makono ga vanuuri. Vamunavuula zinguvu, kandi vamukuba ligali. Viiruka nivamuleka masamba makuzu. 31Musaalisi mulala yasulungutira kunzira yeyo, na lwa yalora mundu oyo, yavitira halovega. 32Mwilwazi yaza hazana kandi, naamulora, naye yavitira halovega lundi kandi. 33Navuzwa Musamaria mulala, lwa yaali mulogendo lwilwe, yaza ahu umundu oyo yaali. Lwa yamulola, ya muvererera. 34Yazia kuye namuvohelera mu zing'oma zizie, yaamuvaka amaguta ni waini. Yamuvika ku isukiri yeeye, na muhiraa munyumba ya vageni naamulwalizira mu. 35Lidiku lialonda ku yavugula zidinari ziviri nahaana ku mulindi winyumba yavageni namuvolera, ‘Umulindi, na lwa nanzirane ndakutunga zindi ziosi zia uva nutumikiyi kuye.’ ”

36“Ni uliha ku avandu vavaga yava wa uganaganaa yaali mutende wu mundu wagwa mu makono ga vanuuri yava?”

37Mwigizi wi Lilaga yativura, “Oyo uwaali nizimbavasi kuye.” Yeso yamuvolera, “Uzie na okole kuli ndio.”

Yeso munyumba ya Marita na Maria

38Lwa Yeso na aviigi veve vaali kunzira yaavo, yaza mukadaala uwu mukali walangwa Marita ya mwingiriza hango hehe. 39Yaali na amwavo weve walangwa Maria. Maria yikala ha virenge viu Mwami Yeso naahuliriza amigizu geege. 40Marita yasinyika kigira lididikana ku miyinzi josi ja yenyeka akole ku lietegekiza viukulia. Yaza ku Yeso namuteeva, “Mwami, sioverera ku kigira amwavo wange ondekeye kokora miyinzi nzieng'ine? Muvoolere yaaze kongonya!”

41Mwami Yeso yativura namuvolera, “Marita, Marita, ohendaa mwoyo kandi nunyang'ana ku vindu vinyingi. 42Navuzwa kindu kilala vuzwa nicho chenyekaa. Maria atovooye kindu kilahi, ichalivula kunyagwa mba.”

Currently Selected:

LUKA 10: LOGOOLI

Highlight

Copy