LUKA 11

Amigizu ga Yeso ku lisaala

(Mat. 6:9-13; 7:7-11)

1Lidiku lilala Yeso yaali nasaalaa havundu handi. Lwa yaali niyakamara kusaala, mulala ku aviigi veve yamuvolera, “Mwami kwigize kusaala, kuli Yohana Mubatizi yigiza aviigi veve.”

2Yeso yavavolera, “Lwa musaala, muvoore ndi:

‘Baba! Wiitu oveeye Mwigulu

Lieta liilio litakatifu lizominywi;

Uvwami vuvwo vuuzi.

3Okohe viukulia vietu via kase.

4Ukusamihi vwoni vwitu uli kusamiiha avakwoneraa.

Utakuhila mumagerizwu mba ...’ ”

5Yavavolera kandi, “Kovoole, mulala ku munyi aveeye nu mulina, naye alaza kuye vudiku hagati nukuvoolera: ‘Mulina, nuyanza, nzegobiza migadi jivaga, 6kigira mulina wange uduuki hange kutura mu logendo ninzi simbeeye nikindu chamusundira alie mba.’

7“Naye naveeye munyumba alamutivulira, ‘Utanyangiza mba! Mali kuhana kiliango. Inzi na avana vange kumali kogona. Sinyala kuvuuka nzizi kukuha kindu choosi mba!’ 8Agiligali muvooleraa, kali niiva sialavuka amuhe kindu kigira aveeye mulina weve, navuzwa, kigira ligoonya lilie liataveeye nalio esoni, alavuuka amuhe choosi icha adaki.”

9“Kulwayago inzi muvooleraa; Musaale, na munyi mulahevwa; mwenye, na mulanyola mwigulihize, na muligulirwa. 10Kigira ku vosi usaala, alahevwa, uwenyererizaa anyoora, na uwigulihizaa, yigulirwa. 11Nivwaha ku munyi avababa niiva, uwu mwana weve amusavaa uvuchima, naye amuhe ligina? Anoho naasava isuzi, amuhe enzoka, 12anoho naamusava livuyu amuhe eng'e? 13Munyi kali niiva muveeye avadamanu, mwamanya kuha avana vinyu vihaanwa vilahi, nasindi Baba winyu oveeye mwigulu, alamuha kuvita ligali. Alahaana Roho Mutakatifu kuvo avamusaala.”

Yeso na Belizebuli

(Mat. 12:22-30; Mar. 3:20-27)

14Lidiku lilala Yeso yaali natulizaa lidemoni ilialomba mundu mulala kuva idimbidi. Lwu lidemoni liatura, mundu waali idimbidi oyo yamoloma; avandu vagenya ligali. 15Navuzwa valala kuvandu yavo vavoola, “Atulizaa amademoni nizinguru zia Belizebuli, munene wa mademoni.”

16Avandi vamugeriza nivenya akole kelolekizu kutura mwigulu kumanyia Nyasaye amuvugiliraa. 17Navuzwa kigira Yeso yamanya zing'anagani ziavo, yavavolera, “Uvwami vwosi nivwavukani mu miganda ijihing'anaa ijene, vumanyaa vugwa. Avinyumba navo sa vuli mulala niyiyahula ku wundi, inyumba yeyo ligali imanyaa igwa. 18Setani niyilwaana umwene, uvwami vwivwe vulasingira ndi? Inzi muvooleraa yaga kigira munyi mumbolera ndi, inzi ndulizaa amademoni kuzinguru zia Belizebuli. 19Inzi nimba ninduliza amademoni kuzinguru zia Belizebuli, avalondi vinyu vagatulizaa kuzinguru zia vwaha? Kigira yaga, avalondi vinyu yavo nivo avalikalagira munyi. 20Navuzwa niiva inzi ngungaa amademoni kuzinguru zia Nyasaye, mumanye ndi Uvwami vwa Nyasaye vumali kuduuka ku munyi.

21“Ing'inga yu mundu wizingulu, oveeye ni viugi vivie, lwa alindaa inyumba yeeye vindu vivie viosi vivezaa mu mirembe. 22Navuzwa mundu wundi oveeye ni zinguru kumuvita niyazaa kumwigilira nukumuguuta, amunyagaa ivmgi vivie viosi via asuuvilira mu, ma agavulanyia ivilaanye vivie.

23“Oyo utahambana ninzi, ahing'anaa ninzi; kandi utavungizaa harara ninzi, asalanyia.

Lirana lia mudamanu

(Mat. 12:43-45)

24“Lwa roho mudamanu gumali kutulizwa mu mundu, gogendagenda muchangalangwe nigwenya ahagososera. Lwa guvulaa konyoora govoora ‘Ndirana munyumba yange yandaleka.’ 25Lwa gaduuka mu, gonyoolaa inyumba niyeyeywi kandi neveeye indahi kandi elombeywi vulahi. 26Kunangwa gumanyaa guzia koleta roho midamanu jindi saba, ijiveeye midamanu kuguvita; ma josi jingira mu mundu oyo kandi jimenya mu. Kunangwa liiva liu kumaliriza liu mundu oyo livezaa lidamanu ligali kuvita liukutanga.”

Vugasu vwiligali

27Lwa Yeso yaali navoora ivindu yivi mukali mulala mu kiduma yahanzuka numwoyo munene navoora, “Aveeye nuvugasu mukali wakwivula kandi naakunyunyia!”

28Yeso yamutivulira, “Yee, navuzwa vaveeye nuvugasu ligali kuvita, avahulira likuva lia Nyasaye, ma valilonda.”

Ukwenya kelolekizu

(Mat. 12:38-42)

29Lwi viduma viameedeka kuvuunga ahimbi naye, Yeso yavavolera, “Avandu vi likula lia madiku yaga navadamanu Avandu venya kelolekizu, navuzwa sivalahevwa kelolekizu choosi mba nikitaveeye kelolekizu cha Jona. 30Kuli Jona yaali kelolekizu ku avandu va Nineve, kandi ndio Mwana wa Adamu alava kelolekizu ku avandu vi likula yili. 31Mwami wikikali kutura Sheba, lovcga lwi isavaalu, alakasingiri ing'inga yilikula yili lilakalagirwi harara na vandu vi likula yili kandi alakavakalagiri. Oyo yatura ihale ligali niyazaa kuhulira amakuva govogeri vwa Solomoni, kalunu, aveeyeho mundu munene ligali kuvita Solomoni aveeye hano. 32Avandu va Nineve valasingira ing'inga yi likalagirwa, navo valakakalagiri avandu vilikula kigira viganira ku amilwazo ga Jona; kandi henza, mulala oveeye munene kuvita Jona aveeye hano!

Vulavu vwu muviri

(Mat. 5:15; 6:22-23)

33“Sihaveeye ho numundu uhambizaa itaya ma agiviikaa ahivisu, anoho ma agikunikira mu kihinda kenene mba, navuzwa agiviikaa komesa vosi avingiraa munyumba valore uvulavu. 34Emoni yooyo eveeye itaya eveeye kuli itaya yu muviri gugwo. Emoni yooyo neveeye inamu muviri gugwo gwosi gulava nuvulavu. Navuzwa emoni neveeye indamanu, muviri gugwo gwosi gulava mukisundi. 35Kigira yaga, ohenze vulahi gase uvulavu voveeye mu ivi vulagwa kisundi. 36Kunangwa, niiva muviri gugwo gwosi gulava nuvulavu, vugira kuva na havundu hoosi ahaveeye nikisundi, muviri yigwo gulaaka gwosi kuli itaya ikumulikaa nuvulavu vonene vwayo.”

Yeso yiganihiza Avafarisayo na avigizi vi Lilaga

(Mat. 23:1-36; Mar. 12:38-40)

37Lwa Yeso yamala komoloma, Mufarisayo mulala yamugenihiza vazie kulia harara naye munyumba yeeye. Kunangwa yazia, niyikara kulia viukulia.

38Mufarisayo oyo yaagenya kolola ndi Yeso alizaa chukulia nakikiri kwisaava. 39Kunangwa, Mwami yamuvolera, “Munyi Avafarisayo, mwogizaa igulu we kekombe ni sahani. Navuzwa mugati mwinyu, mwayizula uvunuuri nu vudamanu. 40Munyi avandu avasiru! Uyu uwalomba yigulu, si yalomba mugati kandi? 41Navuzwa, muhaane vindu eveeye mugati mwi vikombe kandi mu zisahani ku ni ivindi viosi vilava vilahi ku munyi.

42“Navuzwa O, vayaye, kilaamo kenene keveeye ku munyi Avafarisayo, kigira muhaanaa ku Nyasaye Kidieli chi likomi kali vindu vilombaa viukulia kuva nu mwayu kuli izubira ni bilabili, umutere ni zinguza zindi ziosi ziu mu mulimi, navuzwa mwivilira kokora amakuva guvulungi naguvuyaanzi vwa Nyasaye. Vindu yivi gaduukanaa mukore vugira kwivilira kokora agandi.

43“O, vayaye, kilaamo keveeye ku munyi Avafarisayo! Kigira muyanzaa kwikala mu zindeve zie imbiri ziu luyali mumasinagogi, nu kuchelizwa nuluyali havulavu mu viitu. 44O, vayaye, kilaamo keveeye ku munyi! Kigira muveeye kuli vilindwa viaviswa via avandu vagenda ku vugira kumanya.”

45Mulala ku avigizi vi Lilaga yamuvolera, “Mwigizi, lwa ovola yaga onyegaa kunyi kandi.”

46Yeso yamutivulira, “O, vayaye, kilaamo keveeye ku munyi vigizi vi Lilaga, kigira mudwikaa avandu misigo jivamina jiveeye miliduhu kuginga, navuzwa simunyala kunyiira kali kedete kilala kuvakonya misigo zana mba. 47O, vayaye, kilaamo keveeye ku munyi! Kigira mwumbaka vilindwa vilahi via avaporofeti avavaguuga vinyu vita. 48Kulwaga mumanyia kandi muvugiliraa vikolwa via vaguuga vinyu vaakora; kigira vita avaporofeti, namunyi nimwumbaka ivilindwa viavo. 49Kigira yaga, ovogeri vwa Nyasaye vovoola ndi, ‘Ndakavatumiri avaporofeti na avatumwa, valala kuvo valakitwi, na avandi valakasaliri.’ 50Kunangwa likula yili lilakanyoole mageri kigira masahi gavaporofeti agasunduka kutura mulitanga lie lirova, 51kutura ku liitwa lia Habili kuduuka ku likuza lia Zakaria wa viitira hagati huvwaali na havundu ahatakatifu. Yee ligali muvooleraa, likula yili lilakanyoole mageri ku vikolwa yivi.

52“O, vayaye kilaamo keveeye ku munyi avigizi vi Lilaga! Kigira muvuguyi nukuvisa ulufungu lwu muliango gwi inyumba yo vogeri vwi limanya. Navuzwa munyi aveene simwingiraa mu mba, kandi mwigalira avaari nivingira vavuli kwingira.”

53Lwa Yeso yaali naatuliho, Avigizi vi Lilaga kandi Avafarisayo vatanga kumugeriza nukumuteeveleriza mateeva kigira vindu vinyingi, 54Vageriza kumutega vada ki kumunyoola navoora makuva madamanu.

Currently Selected:

LUKA 11: LOGOOLI

Highlight

Copy