LUKA 12

Lieganihizwa ku vugadi

(Mat. 10:26-27)

1Lwi kiduma kenene cha avandu chavunga harara nivaduvagana, Yeso yavolera aviigi veve kutanga, “Mugerihi ku mamera ga Avafarisayo, agaveeye uvugadi. 2Kigira choosi ichakunikwa kilakavuulwi, kandi choosi ichaaviswa kilakamanyikane. 3Kulwa yaga, goosi agamwavoolera mu kisundi, avandu valagahulira mu mbasu, na goosi agamwamonyera mu vwivisu, viliango nivihaniywi, galakalandizirwi ku visegese vie zinyumba.”

Mutatia avandu, mutie Nyasaye

(Mat. 10:28-31)

4“Inzi muvooleraa avalina vange, mutatia yavo avenyaa ukwiti muviri; navuzwa lwi nyima, sivanyala kokora kindu kindi kidamanu ligali mba. 5Navuzwa, ndamumanyia uyu uwa muduukana kutia. Mutie Nyasaye, kigira niyakamara kwita, aveeye ni zinguru kusiuva mundu mu gehena. Yee, muvooleraa mutie umwene oyo.

6“Amatondolizi gatano siganyala kugulizwa ku zisiringi ziviri? Navuzwa Nyasaye siyivilira kali lilala mba. 7Kali liisu liveeye ku mutwi gugwo liavalizwa liosi. Kunangwa, mutatia mba, munyi muveeye avuvukala kuvita matondolizi manyingi!

Kwiyama nukusuula Kristo

(Mat. 10:32-33; 12:32; 10:19-20)

8“Agiligali muvooleraa, mundu woosi ulinziyama havulavu imbiri wa avandu, inzi nu Mwana wa Adamu, ndakamwiyame imbiri wizingelosi va Nyasaye. 9Navuzwa, mundu woosi ulikanyambakane imbiri wa avandu, oyo alakambakanwe imbiri wizingelosi va Nyasaye.

10“Ku vosi ovola likuva lio konyega, Mwana wa Adamu, alasaamifwa; navuzwa uyu onyegaa Roho Mutakatifu sialasamiifwa mba.

11“Lwa valimuhila imbiri wamasinagogi ni imbiri wa avami vanene, mutava nilihenda mwoyo kuganagana icha mulitivula, anoho icha mulivoola mba. 12Ing'inga yeyo, Roho Mutakatifu alakamwigizi gaduukanaa muvoore.”

Lugano lwu mutugi musiru

13Mundu mulala mu kiduma yavolera Yeso, “Mwigizi, volera amwavo wange angavuliri ku miandu ja baba wiitu yakolekera.”

14Yeso yamutivulira, “Mundu ivi, nivwaha wambika mbe mukalagi anoho mugavuli hagati hinyu vaviri?”

15Kunangwa, yavavolera vosi, “Mwilindi kandi mugerihi ku likayirwa liu vuviti liosi; kigira livamwoyo liu mundu silivezaa kigira vunyingi vwi vindu via aveeye navio mba.”

16Kunangwa, Yeso yavavolera lugano yilu, “Yaali ho nu mundu mulala mutugi uwaali numulimi gwigwe, ugwama viukulia vinyingi ligali. 17Mundu oyo yaatanga liganagana mu mwoyo mwimwe navoora: ‘Ngola ndi kigira simbeeye nahavundu ahambika viamo viange mba? 18Ndakora ndi; ndasambura viage viange; manyumbake ivinene kuvita, mwene yimwo; ndateera mu vuswage ni viamo viange viosi. 19Maku ndakevolere inzi mwene, Kalunu mbeeye ni vindu vinyingi vilahi, vianyenyaa ni vitereywi ku mihiga minyingi. Ndavugura liiva linage kuva lilahi, lio kolemeliza. Ndasosa, ndalia, ndanwa kandi sangale!’ 20Navuzwa Nyasaye yamuvolera, ‘Musiru ivi vudiku vwa kalunu ndatuliza livamwoyo liilio. Kunangwa vindu via wavika vilava via vwaha?’ ”

21Yeso yamaliriza kovora, “Nindio gaveeye ku mundu wivikiraa uvutugi mwene, navuzwa siaveeye mutugi imbiri wa Nyasaye mba.”

Musuuviri Nyasaye

(Mat. 6:25-34)

22Yeso yavolera aviigi veve, “Kigira gene yaga muvooleraa, Mutahenda mwoyo kigira livamwoyo lienyu, ku icha mulilia, anoho zinguvu zia mwenya kwivika. 23Livamwoyo liviti chukulia, kandi muviri guviti zinguvu. 24Heenzi amajikoro, sigatagaa vuguza, anoho sigaveeye nichage choosi mba. Kali ndio Nyasaye agalihizaa. Nasindi munyi, si muveeye avuvuguli kuvita amanyonyi mba!

25“Nivwaha ku munyi ku lihenda mwoyo, unyala komeeda isa ku livamwoyo lilie?

26“Kunangwa, niiva si munyala kokora kindu kikuzuzu kuli yiki, kigira ki muve nilihenda mwoyo ku vindu vindi?

27“Heenzi kuli amadanya gameraa kandi gaviruka, sigakolaa miyinzi anoho kunava zinguvu mba. Navuzwa muvooleraa agiligali, kali Solomoni mwene mu vukumi vwu vutugi vwivwe vwosi siyaali anyala kwivika vulahi kuli lilala kulidanya yili mba. 28Niiva Nyasaye vulahi vunyasi vwumu mulimi oveeye mwoyo mu mulimi, kalunu na mugamba vulaswamumuliru, sialakola vulahi ligali ku munyi? Munyi avandu vaveeye nilisuvira likekeeke!

29“Kunangwa, mutenyeleriza muziganagani zienyu icha mulilia anoho icha mulinwa mba. 30Yago goosi nigo aganyangizaa avandu vosi avatamanyi Nyasaye. Baba winyu amanyi ndi mwenya vindu yivi. 31Navuzwa mwenye kutanga uvwami vwa Nyasaye, na vindu yivi viosi mulahevwa.

Uvutugi mwigulu

(Mat. 6:19-21)

32“Mutatia, munyi ichayo change kekekeeke! Baba winyu uyanziziywi kumuha Uvwami yivwo. 33Mugulize vindu vienyu viosi, muhaane ku avadaka. Mwelombere zimuya zitakunguhaa mba, muve nilivikiru mwigulu ahu mwivi ataduuka, anoho ahizisere zitononyia mba. 34Ahi livikiru liilio liveeye, niho hu mwoyo gugwo goveeyeho.

Avatumikiri avageri

35“Mwetegeke ku choosi kinyala kutulira mu vutumiki, kandi mulombe zitaya zienyu ziake. 36Muve kuli avatugwa valinda Mwami wavo kutura mu kiselero, kunangwa lwa yirana ma yigulizi, valamwigulira vwangu. 37Vaveeye nuvugasu avatumikiri yavo avu Mwami alinyoora nivahenza kandi nivetegeki lwa aliiza. Agiligali muvooleraa, Mwami oyo aliviika vulahi, na alavikaliza ku viukulia komesa nukuvatumikira. 38Niyazaa kali vudiku hagati, anoho zisa tisa zia vudiku navanyoole nivakiri ndio, vaveeye nuvugasu avatumikiri yavo. 39Muve na agiligali ndi, niiva mwene inyumba yakamanyi ing'inga yumwivi yaazaa, ngano siyakaleki inyumba yeeye ivunagwi mba. 40Na munyi kandi kuduuka mwetegeke ndio, mwetegeke, kigira Mwana wa Adamu alaza ing'inga yamutamanyi na yamutaganaganyia.”

Mutumikiri musuuvirifu nu wundi utaveeye musuuvirifu

(Mat. 24:45-51)

41Petero yamuvolera, “Mwami, lugano yilu nikunyi venyine avovoolera, anoho ovolera kandi vandu vosi?”

42Mwami yamutivulira, “Nivwaha oveeye mutumikiri musuuvirifu na wovogeri uwu mwami weve aviikaa ave munene ku avatumikiri vinyumba yeeye, avahe viukulia viavo mu ing'inga yenyeka? 43Aveeye nuvugasu mutumikiri oyo uwu Mwami weve, lwa yirana alamunyoole nakora ndio. 44Ligali alamuviika alindi vindu vivie viosi. 45Navuzwa, niiva mutumikiri oyo alaganagana mu mwoyo gwigwe nokovoora, ‘Mwami wange alindagiyi kwirana,’ ma atange kukubaga avatumikiri vandi avikisaza na avikikali, atange kulia nu kunwa nukuhambika. 46Mwami weve alirana ku lidiku lia ataganagana, kandi ing'inga yatamanyi. Ligali Mwami weve alamuha amageri nukumuviika mu muganda mulala na avatasuuvira.

47“Navuzwa mutumikiri oyo umanyi uvulariri vwu Mwami weve, navuzwa siyetegeka anoho akole kuli Mwami yenya, oyo alanyoola likuywa linene ligali. 48Navuzwa uyu uwavula kumanya aga yenyeka akole, ma akola agadukanaa lihevwa amageri, alakuywa hakekeke. Ku vosi uwahevwa vinyingi, alateevwa kuhaana vinyingi ligali. Na ku vosi uwa avandu vaheza kulinda vinyingi, kandi ndio alateevwa kuhaana vinyingi.

Si jiveeye mirembe navuzwa Liavukana

(Mat. 10:34-36)

49“Ndaaza koleta mageri ga Nyasaye ku vandu galiva kuli muliru, kandi gulivasamba, ngano gwatanga kwaka. 50Mbeeye nilibatiza lia ndibatizwa ilidukanaa mbatizwi. Navuzwa mbeeye novovereri kuduuka ing'inga lwa yagalitwekiza. 51Muganaganaa ndaaza koleta mirembe mu lirova? Awa, inzi muvooleraa; sijiveeye mirembe, navuzwa iliavukana. 52Kigira kutura kalunu valava avandu vatano munyumba ndala. Valavukana mulala nu wache. Vavaga ku vaviri, na vaviri ku vavaga. 53Baba alavukana numwana muyaayi weve; na muyaayi na baba; mama numukaana weve; mukaana alavukana namama weve; navizara na navizara navo valavukana kandi.”

Kumanyiriza zing'inga

(Mat. 16:2-3)

54Yeso yavolera avandu kandi, “Lwa muloraa malesi nigaturaa imadioli, ahene yaho muvooraa, ‘Imbura ilakuba,’ ma ikubaa ligali. 55Lwa muloraa imbuza isavaalu nihuzaa, muvooraa kulava numulengera magava ndio. 56Avagaadi munyi! Mwamanya kogera imbuza ku lihenza lirova nu muvwerefu; kunangwa, kigira ki, simunyala kumanya kivuni chi zing'inga yizi?

Muvugilirizane nu musigu woovo

(Mat. 5:25-26)

57“Kigira ki simunyala kukalaga aveene agaveeye amalungi kokora? 58Kigira umusigu naakuhila mukiyaro vwakaveeye vulahi muhulirizane naye kunzira imbiri wa mukiri kuduuka ku mukalagi; nutakola ndio alakuhila imbiri wu mukalagi nu mukalagi alakuhaana ku avasikari, navo valakuviika muvuhambe. 59Agiligali muvooleraa, siulatula mu mba kuduuka lwa umala kutunga mabese gukumaliriza.”

Mwiganiri anoho mukuzi

Currently Selected:

LUKA 12: LOGOOLI

Highlight

Copy