LUKA 13

1Ing'inga yeyo, avandu valala vaza nivavolera Yeso amakuva ga avandu va Galilaya ava Pilato yita lwa vaali nivahaanaa visiuviliru viavo ku Nyasaye na masahi gaavo gazugana na masahi gi visiuviliru viavo. 2Yeso yavativulira, “Muganaganaa Avagalilaya yava vaali avoni kuvita Avagalilaya vandi, kigira viitwa munzira ya ndio? 3Muvooleraa sigaveeye ndio mba; navuzwa munyi nimutiganira mulakuza mwosi kuli ndio kandi. 4Anoho avandu vaali likomi na munane avu munara gwagwira mu Siloamu nivakuza; muganaganaa vaali avoni kuvita avandi vosi avamenyaa mu Jerusalemi? 5Muvooleraa, sigali ndio mba; navuzwa munyi nimutiganira, mulakuza kuli ndio kandi!”

Lugano lwu musaala ugwavula kwama makuyu

6Maku, Yeso yavavolera lugano yilu: “Mundu mulala yaali numusaala gwu muzabibu mu mulimi gwigwe mundu oyo yazia niyenyaa kwagula amakuyu ku musaala yigwo, navuzwa siyanyoola likuyu kugwo mba. 7Kunangwa, yavolera mulindi wu mulimi gwigwe, ‘Henza! Ku mihiga jivaga ndayizangi hano mbula nzaguli amakuyu gu musaala yigu, na sindanyoola ku kindu mba. Goteme! Kigira ki kuzizagiliri kutumikira vonoru vwu mulimi vuzwa?’ 8Navuzwa mulindi oyo yamutivulira, ‘Mwami, leka gove kandi muhiga gunu. Ndagusemberera vulahi nukuviika ku isiina. 9Niiva gulama amakuyu muhiga guzaa, vulahi; navuzwa nigutama, unyala kugotema.’ ”

Yeso ahonyia mukali mulema ku lidiku lie Lisabato

10Yeso yaali niyigiza mu lisinagogi lilala lidiku lie Lisabato. 11Yaali ho mukali mulala uwaali ni lidemoni lia mudekeranyia ku mihiga likomi na munane. Yaali niyinama na siyaali anyala kusingira vulungi mba; 12Lwa Yeso yamulola, yamulanga, namuvolera, “Mukali, ohonyiywi kutura mu vulwaye vuvwo.” 13Yavika makono geege kuye, nonoho muviri gwigwe gwadiguluka kandi yizominya Nyasaye.

14Navuzwa munene wilisinagogi yavihilirwa ligali kigira Yeso yamuhonyia ku lidiku lie Lisabato. Kunangwa yavolera avandu vaali nivavugani ho, “Muveeye na madiku sita gokokolera mu miyinzi. Munyala kuuza mu madiku gene yago muhonywi vulwaye vwinyu, navuzwa mutaazi ku lidiku lie Lisabato mba.”

15Mwami yamutivulira, “Avagaadi munyi aveeye ho nu mundu ku vosi hagati hinyu uvula kovoholora eng'ombe anoho isukiri yeeye kutura mu kego agihiri kunwa amazi ku lidiku lie Lisabato? 16Sivoveeye vulahi mukali uyu, kisukururwi cha Aburahamu, wa Setani yaali niyavoha ku mihiga likomi na munane, avohololwe kutura mu livofa liu vulwaye vwivwe ku lidiku lie Lisabato?”

17Lwa yamala kovora yaga, vosi avahing'anaa naye vaali soni, kandi avandu vosi vaali nuvusangali kigira vindu viosi viekoleka.

Lugano lwu luguza lwi lisaazi

(Mat. 13:31-32; Mar. 4:30-32)

18Yeso yateeva, “Uvwami vwa Nyasaye voveeye kuli ndi? Kandi ndavufananyia naki? 19Voveeye kuli luguza lwi lisaazi lwu mundu mulala yavugula nataga mu mulimi gwigwe. Lwaviruka kuduuka nilugwa musaala. Manyonyi gigulu gumbakaa zinyumba ziago kuziisia ziagwo.”

Lugano lwa mamera

(Mat. 13:33)

20Yateeva kandi, “Ndafananyia Uvwami vwa Nyasaye naki? 21Voveeye kuli amamera gu mukali mulala yavugula nazuganyia harara nuvusie zikilo sirini na tano, kuduuka lwa vwosi vwavimba.”

Kiliango keng'erere

(Mat. 7:13-14,21-23)

22Yeso yaazizagilira nologendo lwilwe kuzia Jerusalemi. Yavitira mumadala numutudaala, niyigiza avandu. 23Mundu mulala yamuteeva, “Mwami vaveeye avandu vakekeeke vuzwa avalihonywa ku lidiku lielikalaga?”

Yeso yavavolera, 24“Mukore zinguru kwingira mukiliango keng'erere; kigira avandu vanyingi valageriza kwingira mu Vwami vwa Nyasaye navuzwa sivalinyala mba. 25Mwene inyumba alasingira kandi ahane kiliango; maku lwa munyi musingiraa ichova nukwigulihiza kukiliango nimuvoora, ‘Mwami, kwiguliri!’ Alamutivulira, ‘Inzi simanyi wa muturaa mba.’ 26Maku mulataga kumuvolera, ‘Kunyi nivo avalizaa kandi ni kunwa harara niivi; ivi wigiza mu madaala giitu.’ 27Navuzwa Mwami alakavoole, kandi ‘Muvooleraa agiligali, simanyi munyi muturaa hayi mba. Tuli imbiri wange, munyi vosi avaakoraa uvudamanu!’ 28Kunangwa kulava ho nukulira kandi nukudiedieyiza amiinu, lwa mulilora Aburahamu, Isaka na Yakobo, na avaporofeti vosi nivaveeye mu Vwami vwa Nyasaye, navuzwa munyi aveene nimuteveywi ichova. 29Avandu valaza kutura ivugwi na madioli, kutura ivaale ni isavaalu kandi valikala mu lilia mu Vwami vwa Nyasaye. 30Maku, yavo avaveeye vukumaliriza kalunu, valava vukutanga; na yavo avaveeye vukutanga kalunu valava vukumaliriza.”

Vuyanzi vwa Yeso ku Jerusalemi

(Mat. 23:37-39)

31Ing'inga zana yeyo, Avafarisayo harara vazia ku Yeso nivamuvoolera, “Tula hano uzie havundu handi, kigira Herodi Antipa yenya kukwita.”

32Yeso yavativulira, “Zi muvoolere Kivwi yicho ndi, ‘Kalunu na mugamba, ndakunga amademoni nokohonyia vulwaye, ni lidiku lia kavaga ndamala miyinzi jange.’ 33Kali ndio, kalunu, mugamba na mugamba guzaa, gaduukanaa nzizagiliri nologendo lwange, kigira sivuveeye vulahi muporofeti yitirwi ichova wa Jerusalemi mba.

34“O, vayaye munyi avandu va Jerusalemi! Ivi Jerusalemi, wita avaporofeti, nulasa amagina avatumwa va Nyasaye atumaa ku ivi! Ndayeenyaa kuvungiza harara avana vovo kuli engoko ivungizaa viminyu viayo muzimbaha ziayo haali kanga, navuzwa munyi simwa mbugilira! 35Kunangwa, litembeli lienyu lilakave mang'anye! Agiligali muvooleraa, simulandola kandi kuduuka ing'inga yamulivoola, ‘Agasizwi oyo uzaa kulieta liu Mwami.’ ”

Yeso yahonyia mundu mulwaye

Currently Selected:

LUKA 13: LOGOOLI

Highlight

Copy