YOHANA 14

1Yeso yavolera aviigi veve, “Mutahenda mioyo jinyu. Musuuviri Nyasaye, musuuviri inzi kandi. 2Munyumba mwa Baba wange, muveeye novomenyo vunyingi. Nigataveeye ndio, ngano sindamuvolera, nziza kumulombera ovogono mba. 3Kandi lwa mba ninzia kumulombera ovogono, ndirana kandi. Ndamuvugura inzi mwene, kunangwa aha inzi mbeeye munyi kandi muve ho. 4Kandi munyi mwamanya inzira yukuzia wa nziza.”

5Tomasi ulangwa Malongo yamuteeva, “Mwami, sikumanyi wuzizaa mba, kunyala kumanya ndi inzira yeyo?”

6Yeso yamutivulira, “Inzi niyio inzira, agiligali kandi livamwoyo. Sihaveeyeho nu mundu unyala kuzia ku Baba natavitiyi ku inzi. 7Mulava mwamanya inzi, ngano mwamanyia Baba wange kandi. Kutura kalunu mumumanyi, kandi mumali kumulora.”

8Filipo yamuvolera, “Mwami, ukumanyie Baba; yago nigo ga kwenyaa ma gakuduuki.”

9Yeso yamuvolera, “Filipo, menyi nimunyi zing'inga yizi ziosi, na ivi ukikiri kumanya? Uyu umali kolola inzi, aloli Baba. Kigira ki ovola ndi: ‘Kumanyie Baba?’ 10Ivi si usuviraa inzi mbeeye mu Baba na Baba aveeye mu inzi? Amakuva goosi aga mali kumuvolera sigaveeye gange mwene mba; navuzwa Baba aveeye mu inzi akolaa miyinzi jije mwene. 11Musuuviri ndi, inzi mbeeye mu Baba, naye Baba aveeye mu inzi. Nigataveeye ndio, usuuviri inzi kigira miyinzi ja ngolaa. 12Muvooleraa agiligali, uyu usuviraa mu inzi alakola miyinzi ja inzi ngolaa. Yee, alakola kali minene ligali kuvita kigira inzi nziza wa Baba. 13Na ku choosi cha muteeva ku lieta liange, yiki ndakora, Baba aduuki kukuminyirwa mu Mwana. 14Ni musaala kindu choosi ku lieta liange, inzi nda mukolera.

Yeso Yavasuuviriza Roho Mutakatifu

15“Ni muva ni munyanza, mulagumira amalago gange. 16Nainzi ndateeva Baba, naye alamuha umukonyi wundi, ulimenya nimunyi kazozo. 17Oyo ni Roho ovolaa agiligali ga Nyasaye. Avumukivala sivanyala kumuvugilira kigira sivanyala kumulora anoho kumumanya mba. Navuzwa munyi mumumanya kigira amenyaa ni munyi kandi alakave mu munyi.

18“Lwa mba ninzia sindamuleka kuli avavisandu mba; ndirana ku munyi kandi. 19Mu ing'inga engekeeke, avumukivala si valandola kandi mba navuzwa munyi mulandola; na kigira inzi mbeeye mwoyo, munyi kandi mulava mwoyo. 20Lwi lidiku yilio liliduuka mulakamanye ndi inzi mbeeye mu Baba wange, kandi munyi muveeye mu inzi, kuli inzi mbeeye mu munyi.

21“Uyu uvugilira amalago gange nukugagumira, uyu niyie uyanzaa, na uyu unyaanzaa Baba wange alamuyaanza nainzi kandi ndamuyaanza kandi ndivuura inzi mwene kuye.”

22Yuda utali Yuda wa Esikarioti yamuvolera, “Mwami, galava ndi ivi ulivuula ku kunyi, navuzwa uvuli kwivuula ku avumukivala?”

23Yeso yamutivulira, “Mundu nanyaanza, alagumira amigizu gange. Baba wange alamuyaanza, kandi Baba wange harara nainzi kulaaza kuye, na kulamenya naye. 24Ku vosi utanyaanzaa siagumira amigizu gange mba. Na amigizu ga mumali kuhulira sigaveeye agange mba, navuzwa gaveeye aga Baba wanduma.

25“Mali kumuvolera vindu yivi lwa ngikiri ni munyi, 26Navuzwa, uyu Mukonyi, Roho Mutakatifu, wa Baba alituma mu lieta liange, alakamwigizi vindu viosi kandi kumwizuliza goosi aga ndamuvolera.

27“Mirembe nijo ja inzi mulekeraa. Mirembe jange inzi mwene muheezaa. Simuhezaa kuli avumukivala vahaana mba. Mutahenda mioyo jinyu anoho kuhayahaya, kandi mutava nuvuti mba. 28Munyi mwahulira lwa ndaamuvolera, ‘Nziza, navuzwa ndirana ku munyi kandi.’ Mulava nimwanyaanza, ngano mwakasangaye kigira nziza ku Baba; kigira aveeye munene ligali kuvita inzi. 29Inzi mali kumuvolera yaga kalunu imbiri wagakiri kwekoleka, kunangwa lwa gekoleka munyi muduuki kusuuvira. 30Sinyala komoloma ni munyi kandi ing'inga indambi mba, kigira Mwamihi wikivala yiki yaazaa.” Siaveeye nuvunyari ku inzi mba. 31Navuzwa avumukivala vaduukana kumanya ndi ndayaanza Baba, na nicho kigira ngolaa vuli kindu kuli Baba andagaa ngole.

“Singiri, gendi kuzie!”

Yeso aveeye muzabibu gwiligali

Currently Selected:

YOHANA 14: LOGOOLI

Highlight

Copy