YOHANA 15

1“Inzi mbeeye muzabibu gwiligali, na Baba wange niyie musimiki. 2Vuli lusia oloveeye ku inzi ulutamaa makuyu alalotema, kandi vuli lusia lwamaa makuyu, alaluhalulira kunangwa ludase kwama amakuyu manyingi ligali. 3Munyi mumali kokolwa avanifu kigira makuva gandamuvorera. 4Mumenye mu inzi ninzi menye mu munyi. Ulusia silunyala kwama amakuyu ulwene nilutaveeye ku musaala gwu Muzabibu mba; Kandi ndio na munyi si munyala kwama amakuyu nimutamenyi mu inzi mba.

5“Inzi mbeeye Muzabibu, na munyi muveeye zisia. Mundu ku vosi omenya mu inzi, nainzi niimba muye, yamaa amakuyu manyingi, kigira vugira inzi simunyala kukola kindu kali hakuzu mba. 6Mundu uvula komenya mu inzi, alateevwa ichova kuli lusia lusuvwa ichova ma lwuma. Avandu vavungiza zisia kuli yizio ma vazita mu muliru ziduuki kuhia. 7Nimumenya mu inzi na amigizu gange nigamenya mu munyi, musaale choosi cha mwenya na munyi mulahevwa. 8Vukumi vwa Baba wange vumanyiangwa ku liama makuyu lienyu, kandi munzira yiyi mugwizaa aviigi vange. 9Inzi ndayaanza munyi kuli Baba ayaanza inzi. Mumenye mu vuyanzi vwange. 10Nimugumira amalago gange mulamenya mu vuyanzi vwange, kuli inzi mali kugumira amalago ga Baba wwivwe nokomenya mu vuyanzi vwange.

11“Mali kumuvolera yaga kunangwa uvusangari vwange vuduuki kuva mu munyi, kandi uvusangari vwinyu vuduuki kwizura du. 12Yili nilio lilago liange: muyaanzane kuli inzi mali kumuyaanza. 13Uvuyanzi vonene kuvita vwosi vwu mundu anyala kuva navwo ni yivu, mundu ahaane livamwoyo lilie kigira avalina veve. 14Munyi muveeye avalina vange nimukora vindu via mulagaa. 15Kutura kalunu sinyala kumulanga avatumwa kandi mba, kigira mutumwa siamanyi ichu mwami weve akolaa mba. Navuzwa inzi mali kumulanga avalina, kigira mali kumuvolera goosi aga ndahulira kutura ku Baba wange. 16Munyi simwandovola mba; navuzwa inzi ndamutovora kandi nimutuma muzie kwama makuyu manyingi kandi makuyu ginyu gahindiri; kunangwa Baba aduuki kumuha choosi cha muteeva mu lieta liange. 17Kunangwa, lilago liange lia mulagaa ni yili: muyaanzane aveene na aveene.

Avumukivala valamudunyira

18“ Niiva avumukivala vamudunyira, mwizurizi ndi vadunyiraa inzi kutanga nivakiri kumudunyira. 19Niiva mwakaveeye avandu vumukivala, ngano avumukivala vakayaanzi munyi, kuli avandu vaavo vene. Navuzwa kigira munyi si muveeye avumukivala, navuzwa ndamutovora munyi kutura mu avumukivala, kunangwa yiki nicho kivuni kigira avumukivala ni vamudunyira. 20Mwizurizi likuva lia ndamuvolera: ‘Mutumwa siaveeye munene ligali kuvita mwami weve mba.’ Niiva vadambiza inzi, valadambiza munyi kandi; niiva vahulira likuva liange, valahulira lienyu kandi. 21Navuzwa yaga goosi valamukolera kigira ku lieta liange, kigira sivamanyi oyo uwanduma mba. 22Ndaavura kuuza komoloma navo, ngano sivakora vwoni mba; navuzwa kuli gaveeye kalunu, sivaveeye niliverererwa ku vwoni vwavo mba. 23Oyo udunyiraa inzi, adunyiraa Baba wange kandi. 24Niiva sindaakola vindu viu mundu wundi akikiri kokora ku hagati haavo, ngano sivakakoli vwoni mba; navuzwa kalunu vamali kolola kandi kunduyira harara na Baba wange. 25Navuzwa yaga gaveeye kuduukiza likuva liang'odwa mu Lilaga liavo: ‘Vandunyiraa vuzwa vugira kivuni.’

26“Lwa Mukonyi aliiza uwandituma ku munyi kutura ku Baba, naye ni Roho wagiligali uturaa ku Baba, alakave mulolekizi wange. 27Na munyi, kandi, mulakave valolekizi vange kigira inzi, kigira mwali harara nainzi kutura mulitanga.

Currently Selected:

YOHANA 15: LOGOOLI

Highlight

Copy