YOHANA 16

1“Inzi mali ku muvooleraa yaga goosi kunangwa muvuli kwikigatira mulisuuvira lienyu. 2Avandu valamukunga kutura mu masinagogi gaavo; kandi ing'inga ilakaduuki lwu mundu woosi umwitaa munyi alaganagana ndi mulikola yaga atumikiraa Nyasaye. 3Valamukolera yaga kigira vakikiri kumanya. 4Navuzwa inzi mali kumuvolera yaga, kunangwa lwi ing'inga iduuka yayavo kukola vindu yivi, munyi mulakizulizi aga ndamuvolera. Si ndamuvolera vindu yivi kutura mu litanga, kigira ndaali ningikiri harara nimunyi.

Miyinzi ja Roho Mutakatifu

5“Navuzwa kalunu nzizanga ku uyu uwanduma nitali siali ho numulala ku munyi ondeva uwanziza mba. 6Kandi kalunu kigira mali kumuvolera yaga, mioyo jinyu jizuyi ovovereri duu. 7Navuzwa inzi muvoleranga agiligali: Ni vulahi ku munyi ndi inzi nzie, kigira niimbura kuzia Mukonyi sialaaza ku munyi mba. Navuzwa niimba ninzia, ndamutuma yaaze ku munyi. 8Naye lwa aliiza, alalungikiza avumukivala agaveeye gu vwoni, nagaveeye amalungi, kandi agilikalaga lia Nyasaye. 9Vandu vaganagana vudamanu kigira vwoni, kigira vavura kusuuvira inzi. 10Vaveeye avadamanu kolondekana nu vulungi, kigira nziza ku Baba na munyi simulandola kandi mba. 11Vaveeye avadamanu ku likalaga, kigira Nyasaye umali kukalagira umwamihi wa avumukivala yiki.

12“Ngikiri na makuva manyingi ligali gu kumuvolera, navuzwa simunyala kugagumira kalunu mba. 13Navuzwa, lwa Roho aliiza, ulivolaa agiligali kigira Nyasaye, alakamwimiliri mu agiligali goosi; sialakamoloma ku vunyali vwivwe mwene, navuzwa alakamuvoolere goosi aga yahulira, kandi alakalandizi havulavu ivindu viliekoleka. 14Alakakuminyi inzi, kigira alavugula yaga agambooraa, ma alamwilwaaziri. 15Viosi via Baba aveeye navio viveeye iviange; yiki nicho chagira nimbora, Roho Mutakatifu alavugula aga ndimuha na amulandiziri.

Vovereri vulagirung'ana kugwa vusangali

16“Hatigaye hakekeke munyi si mulandola kandi mba, kandi hatigaye hakekeke munyi mulandola.” 17Valala ku aviigi veve vateevana aveene, “Yaga gaveeye kovora ki lwa akovoleraa ndi: ‘Hatigaye hakekeke na munyi simulandola; kandi, Hatigaye hakekeke munyi mulandola?’ Kandi avoora: ‘Kigira inzi nziza wa Baba!’ ” 18Kunangwa vaali nivatevanaa, “Aveeye na kivuni ki lwavoola ‘Hatigaye hakekeke?’ Kunyi sikumanyi icha avoora mba.”

19Yeso yamanya ndi venya kumuteeva. Kunangwa yavavolera, “Mutevana ku yago agamboye: ‘Hatigaye hakekeke munyi simulandola; na hatigaye hakekeke lwi nyima kandi mulandola?’ 20Agiligali muvooleraa, munyi mulalira nu kusioma, navuzwa avumukivala valasangala; mulaverera, navuzwa ovovereri vwinyu vulagirung'ana kuva uvusangari. 21Ing'inga yu mukali alumwa aveeye novovereri kigira ing'inga yuvusaliri iduuki; navuzwa niyakamara kwivura umwana, siyizuliza kandi uvusaliri yivwo mba kigira vuyanzi vwu mwana wivuliiywi mu kivala. 22Munyi kandi muveeye novovereri kalunu; navuzwa ndakavalole kandi, na munyi mulizula vusangali mu mioyo jinyu, nu vusangali vwinyu vwene yivwo sihaveeyeho numundu ulivutuliza ku munyi mba.

23“Mu lidiku liene yilio si muliteeva kindu choosi kutura ku inzi kali hakuzu mba. Agiligali muvooleraa, nimuteeva kindu choosi ku Baba ku lieta liange, alamuha. 24Kuduuka kalunu mukiri koteeva kindu choosi mu lieta liange. Musaale na munyi mulahevwa, kunangwa uvusangari vwinyu vuduuki kuduukizwa ligali.

Yeso Yalaguuta lirova

25“Inzi mali kumuvolera mu zing'ano. Navuzwa ing'inga yiza lwa ndivuura komoloma kandi ni munyi muzing'ano, navuzwa ndavavolera havulavu aga Baba. 26Lwi lidiku yilio liliduuka, mulakateeve Baba mu lieta liange, kandi simbolaa ndi ndasaara Baba kigira Munyi, 27kigira Baba mwene ayaanza munyi. Ayaanza munyi kigira muyanzaa inzi kandi mumali kusuuvira ndi, inzi ndaatula ku Nyasaye 28inzi ndaatula ku Baba, kandi mali kuuza mu kivala; kandi kalunu ndekaa kivala kandi nziza ku Baba.”

29Kunangwa, aviigi veve vamuvolera, “Ah, kalunu ovola havulavu ligali vugira kutumikira zing'ano. 30Kalunu kunyi kumanyi ndi ivi umanya vindu viosi kandi avula ho okoteeva amateeva. Kulwayago, kusuuviranga ndi waatura ku Nyasaye.”

31Yeso yavativulira, “Musuuviyi kalunu? 32Ing'inga yiza, kandi imali kuduuka, lwa munyi mwosi mulisalanywa sa mulala yengo weve, nainzi ndakatigale nzieng'ine. Navuzwa inzi simbeeye nzieng'ine mba, kigira Baba aveeye harara ninzi 33Mali kovora yaga kunangwa munyi muduuki kuva ni mirembe ku lihambanywa ninzi. Mu kivala mulanyola lidambizwa; navuzwa muleme mwoyo! Inzi mali kuguuta kivala!”

Yeso Yasaalira aviigi veve

Currently Selected:

YOHANA 16: LOGOOLI

Highlight

Copy