YOHANA 13
13
1Liali lidiku lilala lisavo lie Lipasaka nilikikiri kuduuka, Yeso yamanya ndi ing'inga yeeye yokutula mu kivala yiki nu kuzia ku Baba weve iduuki. Yaali ni yayanza avandu veve kazozo, avaveeye mu kivala; yee, yavamanyia ndi yavayanza kuduuka ku keheri.
2Yeso harara na aviigi veve, vaali komesa nivalizaa chukulia cha mugolova. Setani yaali namali kuviika mu mwoyo gwa Yuda muyaayi wa Simoni Esikarioti zing'anagani ziu kuzaama Yeso. 3Yeso yamanya ndi, Baba weve umali kuviika vindu viosi hasi hi zinguru zizie, kandi yamanya ndi yatura ku Nyasaye kandi yirana ku Nyasaye 4kunangwa, yatura komesa yi viukulia, naviika halovega likoti lilie, navugura itahoro ni yevoha mu kekenge. 5Maku yaazuka amazi mubenzeni natanga kusaaviza virenge via aviigi veve kandi kuveeya ni itahoro ya yaali niyevohi. 6Lwa yaduuka ku Simoni Petero, Petero yamuvolera, “Mwami, ivi wenyaa unzisavize virenge viange?”
7Yeso yamutivulira, “Icha inzi ngolaa kalunu ivi siukimanyi mba, navuzwa ulalakimanye lwinyima.”
8Petero yamuvolera, “Ivi siunyala kunzisaaviza virenge viange kali hakuzu mba!”
Yeso yamutivulira, “Nindakusaaviza virenge, sioveeye ni lihambana nainzi mba.”
9Simoni Petero yamutivulira, “Mwami, utasaaviza virenge vieng'ine mba, navuzwa na makono gange nu mutwi kandi.”
10Yeso yamuvolera, “Oyo umali kwisinga siaduukanaa kwisaava nitali virenge, kigira umali kuva munifu muviri gwosi. Munyi vosi muveeye avanifu, navuzwa mulala siaveeye munifu mba.” 11Kigira Yeso yamanya nivwaha ulimuzaama, nicho ichagira navoora, “Munyi simuveeye avanifu vosi mba.”
12Lwa yamala kuvasaaviza virenge viavo, yiviika kandi makoti geege niyirana havundu hehe komesa navateeva, “Mumanyirizi icha ndakakola ku munyi?” 13Munyi munangaa “Mwigizi” kandi “Mwami”, munyi muvooraa vulahi kigira mbeeye ndio. 14Kunangwa, inzi oveeye Mwami kandi Mwigizi winyu, mali kusaaviza munyi virenge. Munyi kandi gamuduukira musaavizane virenge. 15Kigira inzi mali kumuha kimanyiru, na munyi kandi mukore kuli mukoleeye. 16Muvooleraa agiligali, mutugwa siaveeye munene ligali kuvita mwami uwamutuga mba. Anoho mutumwa siaveeye munene kuvita uwamutuma. 17Kalunu munyi mumanya vindu yivi, muveeye nuvugasu nimuvikola.
18“Yaga simbolanga ku munyi vosi mba. Inzi ndaamanya yavo avandatovola. Navuzwa gaduukanaa gadukizwi kuli Amang'oda Matakatifu gavoora, ‘Oyo waalia harara nainzi ugirung'ani kuva musigu wange.’ 19Inzi muvooleraa yaga kalunu, imbiri wagakiri kwekoleka. Lwa galiekoleka mulakasuuviri inzi niyie waali ho. 20Muvooleraa agiligali, ku vosi, uvugilira oyo wa inzi nduma, avugiliraa inzi, naye uvugilira inzi avugiliraa oyo uwanduma.”
Yeso aporofetaa lizaamwa lilie
(Mat. 26:20-25; Mar. 14:17-21; Luk. 22:21-23)
21Lwa Yeso yamala kovora yaga, yaahenda mwoyo navoora, havulavu, “Muvooleraa agiligali, mulala ku munyi alaanzaama!”
22Aviigi veve vahenzana nivavula kumanya kali hakuzu nivwaha wa Yeso avoora mba. 23Mulala ku aviigi, uwa Yeso yaali ni yayanza ligali, yaali naasedemi ku kiritu cha Yeso. 24Kunangwa, Simoni Petero yasima Yohana, navoora, “Muteeve, nivwaha wavoola?”
25Mwigizwi oyo yisunda ahimbi ku Yeso, namuteeva, “Mwami, nivwaha?”
26Yeso yativura, “Oyo wanaambe ketonge chu mugadi cha ndongelizi mu bakuli yu munyu, niyie.” Kunangwa, yavugula ketonge chu mugadi, nadongeliza mu bakuli, naha Yuda, Mwana wa Simoni Esikarioti. 27Lwa Yuda yaali niyakamara kuvugura ketonge yicho, Setani yamugeriza. Yeso yamuvolera, “Ichawenyaa kokora, kola vwangu!” 28Navuzwa sihaali ho nu mulala ku avaari komesa, uwamanya kivuni chagira Yeso navoora ndio mba. 29Kigira Yuda yaali muviiki wa mabese, avalala kuvo vaganagana Yeso ya muvooleraa azie kugura vindu vienyeka mu lisavo, anoho ahaane kindu choosi ku avadaka.
30Lwa Yuda yaali niyakavugula kedonye chu mugadi, yatura ichova vwangu. Ma vwali vudiku.
Lilago lihia
31Lwa Yuda yaali niyakatula ichova, Yeso yavoola, “Kalunu uvukumi vwu Mwana wa Adamu vuvuuliki, kandi Nyasaye akuminyiywi muye. 32Niiva uvukumi vwa Nyasaye vuvuulikiyi mu Mwana, kandi ndio Nyasaye naye alalolekiza uvukumi vwu Mwana muye mwene, na alamukuminya vwangu.
33“Avana vakekeeke vange, ngikiri ni munyi ku ing'inga engekeeke vuzwa, itigaaye. Mulakanyenye, navuzwa kuli ndavolera avanene va Avayuda, kalunu inzi muvooleraa kandi, ‘Uwanziza munyi simunyala kuzia yo mba!’ 34Kandi kalunu muheezaa lilago lihia: muyaanzane aveene naveene. Kuli wa inzi ndamuyaanza, munyi kandi muyaanzane ndio. 35Niiva muyaanzana aveene naveene, avandu vosi valamanya ndi munyi muveeye aviigi vange.”
Yeso Yaporofeta ndi Petero alamwambakana
(Mat. 26:31-35; Mar. 14:27-31; Luk. 22:31-34)
36Simoni Petero yamuteeva, “Mwami, uzizaa hayi?” Yeso yamutivulira, “Wanzizaa siunyala kononda kalunu mba, navuzwa ulanonda lwinyima.”
37Petero yamuvolera, “Mwami, kigira ki sinyala kokolonda kalunu? Inzi nzetegeki kukuza naivi!”
38Yeso yamutivulira, “Hene ligali ulahaana livamwoyo liilio kigira inzi? Ngovolera agiligali, idaywa nikikiri kulagula, ulanyambakana haali kavaga.”
Yeso aveeye inzira yukuzia ku Baba
Currently Selected:
YOHANA 13: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
