LITANGA 37

Josefu Harara na Vamwavo Veve

1Yakobo yaazizagilira komenya mukivala cha Kanaani, uwa baba weve Isaka yaali na menyi. 2Yaga na makuva ginyumba ya Yakobo:

Josefu, muyaayi musoleri wi mihiga 17 yalinda chayo chi mitugu harara na vamwavo veve, avayaayi va Biliha na Ziliba navakari vababa weve avaviika. Yavolera baba weve makuva madamanu aga vamwavo veve vaakora.

3Yakobo yayanza Josefu kuvita vayaayi veve vandi, kigira yamwivula naveeye musakulu. Yaamulombera inguvu ya makono matambi. 4Lwa avamwavo veve valora ndi baba wavo yayanza Josefu kuvavita, vaamudunyira ligali kali si vamoloma naye nu mwoyo gwu vuyanzi mba.

5Lidiku lilala Josefu yalota, na lwa yavolera avamwavo veve, vaamudunyira ligali. 6Yavoola, “Leki muvoolere ku maloto gange. 7Kunyi kwaali vosi mu mulimi nikovohaa visaganda vie ingano, kisaganda change chasingira vulungi. Vienyu viakumbiriza change kandi nivikisigamira.”

8Avamwavo veve vateva, “Ivi uganagana ulava mwami ma ukwamihi?” Kunangwa vaamudunyira ligali kigira maloto geege kandi agayavoola kuvo.

9Maku Josefu yaali na maloto gandi kandi navolera avamwavo veve, “Inzi ndaali na maloto gandi, na ndaalora liuva, mweli kandi zing'ereng'ani 11 niziisigamira.”

10Yavolera baba weve maloto, na baba weve yamugondokera: “Yaga namaloto lugano ki? Ivi uganagana ndi inzi, mama woovo na vamwavo vovo nakukusigamiri?” 11Avamwavo va Josefu vamulolera embodoka, navuzwa baba weve yaazizagilira kuganangana ku makuva yaga.

Josefu Yaguliziywi ma nahiliywa Egebeti

12Ing'inga indala lwa avamwavo Josefu vaali nivaziiyi Shekemu#37:12 Shekemu: lidaala linene liveeye zikilomita 65 ivaale wa Jerusalemi. kwayiza mitugu ja baba wavo, 13Yakobo yavolera Josefu, “Inzi nyenya ivi uzie Shekemu uwa avamwavo vovo vaayizi mitugu.”

Josefu yativura, “Yee ndazia.”

14Baba weve yamuvolera, “Zia olore niiva avamwavo vovo vaveeye mu mirembe kandi niiva mitugu jiveeye vulahi; maku wirane ombolere.” Kunangwa yaamutuma kutura mu livona lia Heburoni.

Josefu yaduuka ha Shekemu 15ma naavoyavoya mumilimi lwu umundu yamulola ma namuteeva, “Ivi ohenza kindiki?”

16Yativura, “Inzi mbenza avamwavo vange avayizaa mitugu. Unyala kombolera uwa vaveeye?”

17Umundu oyo yavoola, “Yavo vamali kuzia. Inzi mbuliyi nivavoora ndi vaziza Dozani.” Kunangwa Josefu yalondelera avamwavo veve ma navanyora ha Dozani.

18Lwa vamulolera ihale nakikiri kuduuka ha vaali, valohiza zing'anagani muvwivisu kumwita. 19Vavolerana aveene ku vene, “Nguyio umuloti yaza. 20Kalunu hambi, leki kumwiti kandi kusiuvi muviri gwigwe muliliina lilala ku malina yaga. Kunyi nakovoole ndi inyama induru yakumulia. Maku nakolole icha maloto geege nagakole.”

21Rubeni yahulira nivalohizaa kumwita, nayageliza kumuhonyia. Yavoola, “Leki kuvuli kutulizaho livamwoyo lilie.” 22Rubeni yavoola, “Mutatahizi masahi mba, navuzwa mumusiuvi mu liliina yili mwigendanyama, navuzwa mutamusalirizi mba.” Yavoola yaga nalohiza kohonyia Josefu kutura kuvo na kumwiranyia ku baba weve. 23Lwa Josefu yaduuka ku avamwavo veve, vamutuliza inguvu yeeye ya makono matambi. 24Maku vaamuvugura ni vamusiuva mulilina.

25Lwa vaali nivalizaa, nonoho valora muganda gwa vandu va Ishimaeli nivageenda kutura Gileadi. Zing'amia ziavo ziali nizigingi kimuli na manemane. 26Kunangwa Yuda yavolera vamwavo veve, “Nivukalaki kunyi kwita amwavo wiitu nukuvisa likuza lilie? 27Leki kumugulizi ku avandu va Ishimaeli yava; maku kuvuli kumusaliriza. Kali ndio aveeye amwavo wiitu wa masahi giitu.” Avamwavo veve vavugilira. 28Lwa vakiranyi kutura mukivala cha Midiani vaza ho, avamwavo Josefu vaamung'usa kutura mulilina ma nivamuguliza ku avandu va Midia ku zifeza vidonye 20. Vamanya nivamuhila Egebeti.

29Lwa Rubeni yirana halilina ma nanyoora ndi Josefu si yaliho mba, yatandura zinguvu zizie muvovereri. 30Yirana ku avamwavo veve kandi navoora, “Muyaayi si aveeye mu mba! Inzi nangolendi!”

31Maku vita imburi ma nivavaka kunguvu ya Josefu amasahi. 32Vaavugura inguvu nivahilira baba wavo kandi nivavoora, “Kunyi konyooye inguvu yiyi. Ni yu muyaayi woovo?”

33Yagimanyiliza ma navoora, “Ni inguvu yumuyaayi wange! Inyama yu muvulimu yakumulia. Nagiligali Josefu yakutandulwa muvidonye.” 34Maku Yakobo yatandura zinguvu zizie mu vovereri, niyivika zinguvu zia magunia ma nasioma muyaayi weve ku madiku manyingi. 35Vayaayi vosi na vakana veve vaza kumuleminya mwoyo, navuzwa yasura koleminywa mwoyo. Yavoola, “Inzi ndakazie hasi mukivala chavakuzu ningisioma muyaayi wange.” Kunangwa yaazizagilira kusioma muyaayi weve Josefu.

36Ku ing'inga yene yeyo mu Egebeti, avandu va Midiani vaali nivagulizi Josefu ku Potifa munene mulala wu mwami wa Egebeti, uwaali munene wa vasikari vinyumba yu vwami.

Currently Selected:

LITANGA 37: LOGOOLI

Highlight

Copy