LITANGA 36

Visukululwi via Esau

(1 Zin. 1:34-37)

1Yivi ni visukululwi via Esau, uwalangwaa Edomu. 2Esau yaleeta avakali veve kutura Kanaani. Amita ga vakali yava gaali: Ada mukaana wa Eloni umuhiti; Oholibama mukaana wa Ana muyaayi wa Zibeoni umuviti, 3na Basemazi mukaana wa Ishimaeli, uwaali mbozo Nebayozi. 4Ada yivula Elifazi; Basemazi yivula Reueli; 5na Oholibama yivula Jeushi, Jalamu na Kora. Avayaayi yava vosi vaali avana va Esau avayiivulira mukivala cha Kanaani.

6Maku Esau yavugula avakali veve, avayaayi veve, avakaana veve, kandi avandu vosi vi inyumba yeeye harara ni mitugu jije josi kandi nu vutugi vwivwe vwosi vwa yanyoora mukivala cha Kanaani. Yazia mukivala kindi ihale kutura ku amwavo weve Yakobo. 7Yazia kigira mukivala cha yamenya mu na mwavo weve Yakobo, chaali kekekeeke ligali ku mitugu jaavo. Vaali ni mitugu minyingi ligali, na si vaali vanyara komenya harara mba. 8Kunangwa Esau yamenya mu kiguru chi kivala cha Edomu.

9Yivi ni visukululwi via Esau, umuguuga wa vandu va Edomu, mu kiguru chi kivala cha Seiri. 10Ada mukali wa Esau yaali nu muyaayi mulala walangwa Elifazi, na mukali wundi Basemazi yaali nu muyaayi mulala walangwa Reueli. 11Elifazi yaali na vayaayi 5: Temani, Omari, Zefo, Gatamu na Kenazi. 12Elifazi yaali kandi nu mukali muviika, kandi yamwivulira muyaayi mulala uwalangwa Amaleki. 13Reueli muyaayi wa Basemazi yaali na vayaayi 4: Nahazi, Zera, Shama na Miza.

14Oholibama mukali wa Esau mukaana wa Ana, muyaayi wa Zibeoni yaali na vayaayi 3: Jeushi, Jalamu, na Kora.

15Yizi ni zihiiri ziatula mu vandu vi inyumba ya Esau. Elifazi muyaayi wu kutanga wa Esau yaali muuguuga wi zihiiri yizi: Temani, Omari, Zefo, Kenazi, 16Kora, Gatamu na Amaleki. Yava vosi vaali visukululwi via Ada, mukali wa Esau.

17Reueli muyaayi wa Esau yaali muuguuga wi zihiiri yizi: Nahazi, Zera, Shama na Miza. Yava vosi vaali visukululwi via Basemazi mukali wa Esau.

18Yizi ni zihiiri kutura ku Oholibama mukaana wa Ana, mukali wa Esau: Jeushi, Jalamu na Kora. 19Zihiiri yizi ziosi ziatula ku Esau.

Visukululwi via Seiri

(1 Zin. 1:38-42)

20Yava na vayaayi va Seiri Muhori, avandu vamenya mu kivala cha Edomu: Ihiiri ya Lotani, ihiiri ya Shobali, ihiiri ya Zibeoni, ihiiri ya Ana, 21Dishoni, Ezeri, na Dishani.

22Lotoni yaali na vayaayi 2: Hori na Hemani. Timina yaali mbozo Lotoni.

23Shobali yaali na vayaayi 5: Alivani, Manahazi, Ebali, Shefo na Onamu.

24Zibeoni yaali na vayaayi 2: Aya, na Ana. Uyu ni Ana uwanyola visinukiru via mazi amahiu mwigendanyama lwa yaali niyayizaa zibarasi zia baba weve Zibeoni.

25Ana yaali na vana 2: Dishoni na Oholibama. 26Dishoni yaali na vayaayi 4: Hemudani, Eshibani, Izirani na Kerani.

27Ezeri yaali na vana 3: Poilihani, Zavani na Akani. 28Dishani yaali na vayaayi 2: Uzi na Arani.

29Yizi ni zihiiri zia Hori, avamenyaa mukivala cha Edomu: Ihiiri ya Lotani, Ihiiri ya Shobali, Ihiiri ya Zibeoni, Ihiiri ya Ana, 30Ihiiri ya Dishoni, ihiiri ya Ezeri kandi ihiiri ya Dishani.

Avami va Edomu

(1 Zin. 1:43-54)

31Yava na vami avamiiha mukivala cha Edomu imbiri wu mwami wundi woosi yaali nakikiri kwamiiha avandu va Isiraeli: 32Bela mwana wa Beori kutura mu lidaala lia Dinihaba. 33Lwa Bela yakuza, Jobabu mwana wa Zera kutura mu lidaala lia Bozira yamiha mu vogono vwivwe. 34Lwa Jobabu yakuza, Hushamu kutura mukivala cha Temani yamiha mu vogono vwivwe. 35Lwa Hisahamu yakuza, Hadadi mwana wa Bedadi, kutura mu lidaala lia Avizi uwaguuta avandu va Midia mukivala cha Moabu, yamiha mu vogono vwivwe. 36Lwa Hadadi yakuza, Shamula kutura Masireka yamiha mu vogono vwivwe. 37Lwa Samula yakuza, Shauli kutura Rehobozi ahimbi ku mugera gwa Efurate yamiha mu vogono vwivwe. 38Lwa Shauli yakuza, Balihanani mwana wa Akibori yamiha mu vogono vwivwe. 39Lwa Balihanani umuyaayi wa Akibori yakuza, Hadari kutura Pau, musaza wa Mehetabeli, mukaana wa Matiredi mwisukulu wa Mezahabu, yamiha mu vogono vwivwe.

40Yaga na mita gi zihiiri zia avandu vinyumba ya Esau, avamenyaa mukivala cha Edomu: Timina, Aliva, Jafeza, 41Oholibama, Ela, Pinoni, 42Kenazi, Temani, Mibizari, 43Magidieli na Iramu. Havundu ha vuli ihiiri yamenya, halangwa lieta kolondekana ni ihiiri yaavo.

Currently Selected:

LITANGA 36: LOGOOLI

Highlight

Copy