LITANGA 35

Nyasaye Yagasiza Yakobo ha Bezeli

1Nyasaye yavolera Yakobo, “Zia Bezeli na omenye uwene yeyo. Unyumbakiri uwene yeyo uvwali. Nyasaye waloleka ku ivi lwa waali ni wiruka kutura ku amwavo woovo Esau.”

2Kunangwa Yakobo yavolera vandu vinyumba yeeye harara na vandi voosi vaali naye, “Muleke avanyasaye avageni avamuveeye navo; mwitakase munyi aveene ma mwiviki zinguvu zi ndahi. 3Maku kulatula hano na kulazia komenya Bezeli, uwananyumbakiri Nyasaye uvwali; Nyasaye wangonya ing'inga ya ndaali mu vudinyu, kandi havundu hoosi handazizaa yaala harara na inzi.” 4Kunangwa vahaana ku Yakobo vanyasaye avageni vaavo vosi va vaali navo, kandi zimingiri zia vaali nazio mu matu gaavo. Yaaviyavira isi wu musaala munene ha Shekemu.

5Lwa Yakobo yaatanga logendo harara na vayaayi veve, avandu va madaala gaali ahimbi, vaali nuvuti ovonene ligali, na si vavalondelera mba. 6Yakobo harara na vandu veve, vaduuka ha Luzi, ahamanyikani kalunu kuli Bezeli, mukivala cha Kanaani. 7Hene yaho, Yakobo yumbakira Nyasaye uvwali, ma nalanga havundu hene yaaha “Eli Bezeli#35:7 Eli Bezeli: Yili ni lieta lio Luheburaina, liveeye kovora, “Nyasaye wa Bezeli.”” kigira Nyasaye yaloleka kuye lwa yaali ni yiruka kutura ku amwavo weve Esau. 8Mukungaa wa Rabeka ulangangwa Debora yakuza, ma nayavirwa isi wu musaala munene isavaalu wa Bezeli. Kunangwa havundu hene yaho halangwa lieta, “Alonibakuzi#35:8 Alonibakuzi: Yili ni lieta lio Luheburaina, liveeye kovora, “Musaala munene gwu kusiomeramu.”.”

9Lwa Yakobo yirana kutura Mesopotamia, Nyasaye yaloleka kuye kandi ma na mugaasiza. 10Nyasaye yamuvolera, “Lieta liilio ni Yakobo, navuzwa kutura kalunu ivi lieta liilio lilava Isiraeli.” Kunangwa Nyasaye yamugulika Isiraeli. 11Nyasaye yavolera Yakobo, “Inzi mbeeye Nyasaye Wuvunyali; ove nu lwivulu lunyingi. Zihiiri zilanyooleka kutura ku ivi, kandi avami valanyooleka kutura ku ivi. 12Ndahaana ku ivi kivala cha ndahaana ku Aburahamu na Isaka, kandi ndahaana ku visukululwi vivio iviizaa inyima woovo.” 13Maku Nyasaye yaavukana na Yakobo kutura havundu ha yamoloma kuye. 14Ahene yaho, aha Nyasaye yaali na molomi na Yakobo, Yakobo yavika ho munara gwa magina gove kuli chukwizuliziraku. Yasundula ku iwaini na maguta ga muzeituni kandi nagutakasa. 15Yalanga havundu hene yaaha Bezeli.

Likuza lia Raheli

16Yakobo harara na vandu vi nyumba yeeye vazia kutura Bezeli. Lwa vaali ahimbi kuduuka Efurazi, ing'inga yaduuka Raheli kwivura mwana. Yaali nu vudinyu mu lilumwa liu mwana. 17Lwa yaali mu lilumwa liu vuzunu vonene ligali, mukungaa weve yamuvolera, “Raheli, utatia mba; kigira ulivula mwana wundi muyaayi.” 18Navuzwa ing'inga yilikuza lilie liali ni liduuki. Lwa yaali nakuzaa, yagulika mwana weve “Benoni#35:18 Benoni: Yili ni lieta lio Luheburaina; liveeye kovora, “Muyaayi wo vovereri.””, navuzwa baba weve yamugulika “Benjamini#35:18 Benjamini: Yili ni lieta lio Luheburaina; liveeye kovora, “Muyaayi wi ingavi.”.”

19Kunangwa, Raheli yakuza; na yayavirwa ahimbi kunzira izizaa Efurazi, havundu hamanyikani kalunu kuli Bezelehemu. 20Yakobo yavika ligina liu kwizulizila ku havundu yaho. Ligina yili limanyia kilindwa cha Raheli kuduuka lero. 21Yakobo yisunda hambiri, ma niyumbaka lihema lilie kolovega lundi lwu munara gwa Ederi.

Avayaayi va Yakobo

(1 Zin. 2:1-2)

22Lwa Yakobo yaali na menyi mukivala yiki, Rubeni yaali harara na Biliha, mulala ku vakali vatumikiri vababa weve. Lwa Yakobo yahulira makuva yaga, yavihilirwa ligali.

Yakobo yaali na vayaayi 12: 23Avayaayi va Lea vaali; Rubeni, muyaayi wa Yakobo wu kutanga, Simioni, Levi, Yuda, Isakari, na Zabuloni. 24Avayaayi va Raheli vaali; Josefu na Benjamini. 25Avayaayi va Biliha mutugwa wa Raheli vaali Dani na Nafutali. 26Avayaayi va Ziliba mutugwa wa Lea vaali; Gadi na Asheri. Avayaayi yava vosi vivulwa mukivala cha Mesopotamia.

Likuza lia Isaka

27Yakobo yazia ku baba weve Isaka ha Mamure, ahimbi Heburoni, uwa Aburahamu na Isaka vamenya. 28Isaka yamenya kuduuka mihiga 180, 29na yakuza naveeye musakulu ligali. Avayaayi veve Esau na Yakobo vaavugura muviri gwigwe nivaguyavira.

Currently Selected:

LITANGA 35: LOGOOLI

Highlight

Copy