LITANGA 38
38
Yuda na Tamara
1Ku ing'inga yeyo Yuda yaleka avamwavo nazia komenya nu umundu walangwa Hira, kutura mu lidaala lia Adulamu. 2Wene yeyo, Yuda yavugana nu mukaana mu Kanaani wa baba weve yalangwa Shua. Yamuleta, 3ma namwivulira mwana muyaayi wagulikwa Eri. 4Yavereka ma niyivura mwana wundi muyaayi namugulika Onani. 5Yivula kandi mwana muyaayi ma namugulika Shela. Yuda yaali naveeye ha Akizibu lwu muyaayi uyu yiivulwa.
6Yuda yanyolera Eri muyaayi weve wukutanga mukali walangwa Tamara. 7Kunangwa Yahova yita Eri kigira miima jije jaali midamanu kandi si yayanzizwa najo mba. 8Maku Yuda yavolera Onani amwavo Eri, “Zia ove harara numukunzakali wa amwavo woovo. Utwekizi lienya liilio kuye kuli amwavo musaza weve, kunangwa amwavo woovo ave nivisukululwi.” 9Navuzwa Onani yamanya ndi avana sivalava aveeve mba. Kunangwa lwa yaali harara numukunzakali wa amwavo weve, yakola uvusaza vwivwe vuzie hasi kunangwa mukunzakali uyu avuli kwivura mwana. 10Aga yakola si gayaanziza Yahova mba, kunangwa Yahova yamwita kandi. 11Maku Yuda yavolera navizara weve Tamara, “Uzie yengo ku baba woovo kuduuka lwu muyaayi wange shela ahindiraa.” Yavoola yaga kigira yaali nuvuti ndi Shela alakiitwi kuli avamwavo. Kunangwa Tamara yirana yengo.
12Inyima wi ing'inga indambi mukali wa Yuda mukaana wa Shua yakuza. Lwa Yuda yaali niyakasosa kutura muvovereri, yazia Timina kolola avandu vavega magondi uvwoya. Mulina weve Hira kutura Adulamu yazia naye. 13Umundu yavolera Tamara navizara baba woovo azizaa Timina kukala magondi geege uvwoya. 14Kunangwa yaagirung'anya zinguvu ziuvukunzakali zia yaali niyiviiki, ma nakunika mumoni mwimwe ni kitambaya, kandi niyikara hasi muvwingiliru vwa Enaimu, lidaala liveeye kunzira izizaa Timina. Yaali namanyi vulahi ndi muyaayi wa Yuda winyima Shela numuhindira, navuzwa si vamuha ave musaza weve mba.
15Lwa Yuda yamulola yaganagana ni liraya kigira yaali nakuniki mumoni mwimwe. 16Vugira kumanyiriza ndi oyo ni navizara weve, yisunda kuye ahimbi kunzira ma navoora “Hamba kalunu leka mbe harara na ivi.”
Yamuteeva, “Ivi ulamba kindiki?”
17Yativura, “Inzi ndakuha kememe chi imburi kutura mu mitugu jange.”
Yavoola, “Gaveeye malahi, niiva ivi ulamba kindu ngumiri kuli kulaga kuduuka lwa ondetera imburi.”
18Yateva, “Inzi nyara kukuha kindiki cha ngumira?” Yativura, “Imingiri numuhuri kandi nimbimbu eveeye mu mukono gugwo.” Yamanya nahaana vindu viene yivi. Maku yaali harara naye ma naavereka. 19Tamara yirana yengo, natuliza kitambaya mumoni, ma niyivika zinguvu zizie ziuvukunzakali.
20Yuda yatuma mulina weve Hira kumuhilira imburi ma avuguli kutura ku mukali ivindu via yaali namuheye, navuzwa Hira si yamunyola mba. 21Yateeva avandu vaali ha Enaimu, “Liraya lialange yaaha kunzira liveeye haliha?”
Vaativura, “Liraya likikiri kuvaku hano mba.”
22Hira yirana ma na avooreraa Yuda, “Inzi simunyoye mba, kandi avandu va Enaimu vavooye ndi liraya likikiri kuvaku heneyaho mba.”
23Yuda yavoola, “Leka ave ni vindu yivio. Kunyi si kwenya vandu vakosekelizi mba. Inzi ndaageriza kumutunga, navuzwa ivi siumunyooye mba.”
24Ahimbi inyima wi mieli jivaga mundu yavolera Yuda, “Navizara woovo Tamara yakolangi vulaya, na kalunu yavereka.”
Yuda yalaga, “Mumuhili ichova ma mumusambe kuduuka akuzi.”
25Lwa vaali nivamuhila ichova, yatumana mang'ana vavoolere navizara weve: “Umundu mwene vindu yivi niyie wamba inda. Ohenze ku ma olole niviavwaha: imingiri nu muhuri kandi nimbimbu.”
26Maku Yuda yavimanyiliza ma navoora, “Avooye ga giligali. Genyekana inzi mbugiliri muyaayi wange Shela amuleete.” Yuda si yagona naye kandi mba.
27Lwa ing'inga yaduuka yu kwivura mwana, gaamanyikana ndi alanyoola malongo. 28Lwa yaali naveeye mulilumwa liu mwana, mulala kuvo yaatuliza mukono; umukunga yagumila ma navoha ku luvusi lwakanyu. Yavoola, “Uyu yiivuliywi kutanga.” 29Navuzwa yiranyia mukono gwigwe munda, na amwavo weve niyiivulwa kutanga. Kunangwa mukungaa yavoola, “Kunangwa ni ndi onyooye inzira yukuvitira mu!” Kunangwa yagulikwa Perezi. 30Maku amwavo weve yiivulwa nuluvusi lwakanyu ku mukono, ma nagulikwa Zera.
Currently Selected:
LITANGA 38: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
