LITANGA 34

Dina Yonogonywa

1Lidiku lilala Dina, mukaana wa Yakobo na Lea yazia kogeniha avakali valala va Kanaani. 2Lwa Shekemu muyaayi wa Hamori muhivi waali munene wi kivala, yamulola yamugumira ma namwonogonyia. 3Navuzwa mwoyo gwa Shekemu gwayaanza Dina mukaana wa Yakobo kunangwa yamoloma kuye nu mwoyo gwokogooha ligali. 4Yavolera baba weve, “Inzi nyenya ombe mukaana oyo ave mukali wange.”

5Yakobo yahulira ndi mukaana weve umali kwonogonywa, kunangwa siyakola kindu mba kuduuka lwa vayaayi veve virana, kutura mumilimi ni mitugu. 6Hamori baba wa Shekemu yatura ichova kuzia komoloma na Yakobo, 7lwa vayaayi veve vazaa kutura mumilimi. Lwa vahulira, vaali niligenya kandi nu vutima kigira Shekemu yaali naakori kindu kuli yiki kandi yaali nanyegi avandu va Isiraeli nukwonogonyia mukaana wa Yakobo. 8Hamori yamuvolera, “Muyaayi wange Shekemu aveeye muvulina nu mukaana woovo; mwaza leka amuleete. 9Leka kolombe livugilizana ndi lihilana live ho hagati ha vandu viitu na vovo. 10Maku ivi ulamenya ni kunyi mukivala chiitu. Ivi ulamenya havundu hoosi ahawenya, nokokola vukala kandi nukuva ni miandu.”

11Maku Shekemu yavolera baba wa Dina na vavoozo veve, “Mungole zimbavasi yizi na inzi ndamuha choosi chamwenyaa. 12Mumbolere vihaanwa via mwenya, kandi mulombe vukwi vwu mwiha kuva igulu kuli mwenya. Inzi ndamuha choosi cha mwenya niiva munyi mulaleka inzi ndete Dina mukaana winyu.”

13Avayaayi va Yakobo vaativulira Shekemu na baba weve Hamori mu liiva liuvugadi kigira Shekemu yaali naviiki Dina mbozo wavo muzisoni. 14Vamuvolera, “Kunyi si kunyala koleka mbozo wiitu azie ku musaza ukikiri kokevwa mba. Yago ganyala kuva gizisoni ku kunyi. 15Kunyi kunyala kuvugilira niiva unyala kuva kuli kunyi nokokeva avasaza vinyu vosi. 16Maku kunyi kulavugilira koletana nimunyi. Kulamenya ni munyi kandi kulava avandu valala ni munyi. 17Navuzwa niiva ivi ulavula kuvugilira kokevwa, kunyi kulavugula mukaana wiitu ma kutuli havundu hano.”

18Makuva gaavo gayaanziza Hamori numuyaayi weve Shekemu. 19Muyaayi musoleri waali wu luyali munyumba ya baba weve, yakola vwangu kokora ga vaali nivavooye, kigira yaayanza mukaana wa Yakobo.

20Hamori nu muyaayi weve Shekemu vazia havundu hukwaaganira mukilivwa chi lidaala linene kandi nivavolera vasaza vache vi lidaala: 21“Vasaza yava vaveeye valina viitu; leki vamenye mu kivala chiitu ni kunyi kandi vakole likilanyia mu. Kivala keveeye kenene ligali kuvo kandi. Leki kolete vakana vaavo kandi navo valeete vakana viitu. 22Navuzwa vasaza yava valavugilira komenya ni kunyi kandi vave kuli kunyi niiva kulavugilira kokeva vasaza viitu vosi kuli yavo vakevwa. 23Mitugu jaavo josi nivindu vindi viosi via vaveeye navio vilava vietu. Kunangwa muleke kuvugiliri ndi vanyara komenya harara ni kunyi.” 24Avandu vosi vazia havundu hu kwaganira mu kirivwa mu lidaala lihene vavugilira aga Hamori na Shekemu vavoola, kandi vasaza vosi vakevwa.

Avavozo va Dina Vavaanza Kisaalia

25Ku lidiku likora kavaga lwa avandu vaali nivakikiri nuvuzunu, avayaayi vaviri va Yakobo, Simioni na Levi, avavozo va Dina, vaavugura vivavi viavo ma ni vazia mu lidaala linene nivegoyiza, ma niviita avasaza vosi. 26Vita Hamori nu muyaayi weve Shekemu nikivavi, kandi nivavugura Dina munyumba ya Shekemu ma ni vazia. 27Inyima lwa vaali nivakaviita, avayaayi va Yakobo vandi, valanya lidaala mu livanza kisaalia kigira mukaana wavo waviikwa muzisoni. 28Vaavugura viayo, mitugu, zibunda kandi vuli kindu choosi mu lidaala kandi mumilimi. 29Vaavugura vuli kindu chuvuguli, vagumira vakali vosi navana kandi nivaginga vuli kindu kutura mu zinyumba.

30Yakobo yavolera Simioni na Levi, “Munyi mumali kumbika mukivi. Kalunu avandu va Kanaani, avandu va Peri kandi vuli mundu mu lidaala linene alanduunyira. Inzi si mbeeye na vasaza vanyingi mba. Niiva vanyara kuuza harara nukunyingilira, inyumba yitu yoosi ilakadivizwi.”

31Navuzwa vaativura, “Sikunyala koleka mukaana wiitu akolelwe kuli liraya mba?”

Currently Selected:

LITANGA 34: LOGOOLI

Highlight

Copy