LITANGA 33
33
Yakobo Yavugana na Esau
1Yakobo yalora Esau niyaza navasaza 400, kunangwa yaagavuranya avana hagati ha Lea, Raheli na vatumikiri veve vakali vaviri. 2Yavika imbiri vakali veve vatumikiri navana vaavo kutanga, maku Lea navana veve, kandi mulimaliriza yavika inyima Raheli na Josefu. 3Oyo mwene yazia imbiri kandi nasigama hasi haali saba lwa yisunda ahimbi ku amwavo weve. 4Navuzwa Esau yanyagula kuzia kumwaganira, namukumbela kandi naamuvusa. Vosi vaalira. 5Lwa Esau yahenza muzimbega ziosi ma nalora avakali na vana, yateva, “Ni vandiki avaveeye navo yava?”
Yakobo yativura, “Yava nivo avana va Nyasaye amali kuhaana ku mutumikiri woovo mu zimbavasi zizie.” 6Maku vakali vatumikiri vaza harara na vana vaavo ma nivasigama hasi; 7maku Lea harara na vana veve vaza, kandi inyima Josefu na Raheli vaza kandi nivasigama.
8Esau yateeva Yakobo, “Nu muganda gwa mbugani nagwo kutanga gwaali guliha” Yakobo yativura, “Mwami wange, inzi ndaatuma muganda yigwo kunangwa ivi uduuki kumbugilira.”
9Navuzwa Esau yavoola, “Amwavo wange inzi mbeeye navio vinyingi; viika via oveeye navio.”
10Yakobo yavoola, “Awa! Mwaza vugilira vihaanwa yivi kuli kelolero cho kombera zimbavasi. Lwa ivi waambugilira ma nendoraa mumoni mumwo, ndaali kuli ololi mumoni mwa Nyasaye. 11Mwaza vugilira kihanwa cha inzi mali kokoletera. Nyasaye yaali ni zimbavasi ku inzi ni yamba vuli kindu choosi cha ndeenya.” Yakobo yaazizagilira kumugonya kuduuki navugilira.
12Esau yavoola, “Leka kwetegeke kuzia. Inzi manya nzie imbiri woovo.”
13Yakobo yativura, “Mwami wange ivi umanya ndi avana vaveeye vadedekere, kandi kuduuka ng'anagane viayo via magondi, zimburi harara nivimeme viazio. Niiva vilahirwa vwangu kulidiku lilala vuzwa, mitugu josi jilakuza. 14Mwaza mwami wange zie imbiri wange mwami, kandi inzi ndakolonda galaha kuli nyara ni mitugu harara na vana kuduuka lwa inzi ngonyoola mu Edomu.”
15Esau yativura, “Leka ndeke valala ku vatumikiri vange nivi.”
Yakobo yativura, “Ivi utakola ndio mba. Inzi mbeeye nuvuyanzi kigira inzi manyirizi ndi ivi umali kombera zimbavasi.” 16Kunangwa lidiku yilio Esau yaatanga logendo lwukwirana Edomu. 17Navuzwa Yakobo yazia Sukozi#33:17 Sukozi: Mu Luheburaina liveeye kovora mabooma., uwa yiyumbakira inyumba na hukuvika mitugu jije. Nicho chagira havundu yaho nihalangwa Sukozi.
Yakobo Aduukaa ha Shekemu
18Lwa Yakobo yirana kutura Mesopotamia, yaduuka mu mirembe mu lidaala linene lia Shekemu mukivala cha Kanaani. Yumbaka lihema mu mulimi himbi nilidaala linene. 19Yaagula kedonye chu mulimi yigwo kutura ku visukululwi va Hamori baba wa Shekemu vidonye vie ifeza 100. 20Yumbaka hene yaho vwali ma naalanga havundu hene yaho Eli, Nyasaye wa Isiraeli.
Currently Selected:
LITANGA 33: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
