KUTURA 2

Livulwa lia Musa

1Kunangwa mu ing'inga yeyo mundu kutura mu ihiiri ya Levi yaleeta mukali kutura mu Ihiiri yeeye. 2Mukali oyo yavereka niyivura umwana muyaayi. Lwa yalora ndi mwana uyu aveeye wi ligondo lilahi, yamuvisa ku lwi mieli jivaga. 3Navuzwa lwa yaali sianyala ku muvisa kandi mba, yamunavira kihinda cha mafunzu navaka ku iramu kunangwa amazi gavuli kwingira mu, ma naviika mu umwana, nakiviika mu lifunzu halujinga lwu mugera. 4Mbozo mwana oyo yasingira ihale, alole ni kindiki kinyala kwekoleka kuye.

5Mukaana wu Mwami yasulunguta kuzia ku mugera kwisinga, na vakana vatumikiri veve vagendagenda kundulu kwu mugera. Ahene yaho mukaana wu mwami oyo yalora kihinda mumafunzu amatambi ma natuma mukaana mutumikiri weve kuzia ku kivugula. 6Mukaana wu Mwami yakikunula yalora mwana muyaayi. Mwana yaali nalira, naye yamuvererera, yavoola, “Uyu ni mulala ku avana va Avaheburaina.”

7Maku mbozo weve yamuteeva, “Nyara kuzia kulanga mukali mu Heburaina akunyunyili nokokolelera mwana oyo?”

8Mukaana wu Mwami yamutivulira, “Mwaza zia umuleete.” Kunangwa mukaana yazia naleta mama wu mwana uyu. 9Mukaana wu Mwami yavolera mukali oyo ndi, “Vugula mwana uyu uzie kunyunyira, na ndakutunga.” Kunangwa mukali yavugula mwana nazia kumulinda. 10Inyima wu mwana yaali niyakaviruka, mukali oyo yamuleta. Yamwiranyia ku mukaana wu Mwami. Yamuvugula kuva kuli umwana weve mwene. Na yavoola, “Ndamugulika Musa#2:10 Musa: Lieta yili mu Luheburaina livoora “Kung'usa kutura mu mazi.”, kigira ndaamutuliza mu mazi.”

Musa yirukira Midiani

11Lwa Musa yaali niyakaviruka, yatura nazia kogendelera avandu veve, Avaheburaina. Yalora kuli vadambizwa nokokolizwa miyinzi midinyu. Kali Musa yalora Umwegebeti niyiita Umuheburaina, uwaali mulala ku avandu vi hiiri ya Musa. 12Musa yahenza yiyi na yiyi kandi lwa yavula kolola mundu naamulora, yakuya niyiita Umwegebeti, naamuvisa mumuyeke. 13Lidiku liakaviri, lwa yirana yalora avasaza vaviri ava Heburaina nivakubanaa. Yavolera waali mutindi, “Kigira ki ukuya Umuheburaina wacho?”

14Mundu zana yativura, “Nivwaha wakokola kuva mwamihi nu mukalagi ku kunyi? Wenyaa kunzita kuli wita Umwegebeti?” Na Musa yatia navoora, “Ng'ani makuva yaga gamanyikani ligali.” 15Lwu Mwami yahulira makuva yaga, yenya kwita Musa. Navuzwa Musa yiruka kutura imbiri wu Mwami nazia komenya mu kivala cha Midiani, na lidiku lilala yazia kwikala ha kidaho.

16Musaalisi wa Midiani, Jezero, yaali na avakaana saba vaza kudaha amazi nivizuliza miliinga ja vanwehiziraaku mitugu ja baba wavo. 17Navuzwa avayi vaza ni vakunga avakaana va Jezero. Maku Musa yazia kuvasoora naavakonya kudahira mitugu jaavo amazi. 18Lwa virana yengo, baba wavo Jezero, yavateva, “Kigira ki mwilani vwangu kalunu?”

19Navo vaativura, “Umwegebeti akosoye kutura ku vayi kali naakudahila amazi kandi naanwehiza mitugu jietu.”

20Jezero yateeva avakaana veve, “Aveeye hayi? Kigira ki nimuleka mundu uyu ichova? Mulangi yaaze kulia chukulia harara nikunyi.”

21Kunangwa Musa yavugilira komenya yo, na Jezero yaaha Musa mukaana weve Zibora kuva mukali weve, 22uwamwivulira mwana muyaayi. Musa yevoolera mwene ndi, “Ndamugulika Gerishomu, kigira mbeeye mugeni mu kivala kinu.”

23Inyima wimihiga yijo josi, mwami wa Egebeti yakuza, navuzwa vandu va Isiraeli vaali nivakekenya ligali kigira uvusaaliri vwavo mu vutugwa, nivenya vokonyi. Lilira liavo liadukira Nyasaye; 24uwahulira likenya liavo ma niyizuliza lilagana lilie lia yalomba na Aburahamu, Isaka na Yakobo. 25Nyasaye yalora linyang'ana lia vandu va Isiraeli mu vutugwa kandi yavahendera mwoyo.

Currently Selected:

KUTURA 2: LOGOOLI

Highlight

Copy