KUTURA 1
1
Avandu va Egebeti vadambiza vandu va Isiraeli
1Avayaayi va Yakobo avaazia Egebeti harara naye, sa mulala na avinyumba yeeye vaali: 2Rubeni, Simioni, Levi, Yuda, 3Isakari, Zabuloni, Benjamini, 4Dani, Nafutali, Gadi na Asheri. 5Visukululwi via Yakobo viosi vaali 70#1:5 Sabwini: Vitabu vitakatifu via kale kuli vikolwa vivoola sabwini na tano (Vik. 7:14).; Muyaayi weve Josefu yaali naveeye mu Egebeti. 6Inyima Josefu yakuza na avamwavo veve vosi, na vilikula yilio liosi. 7Navuzwa vandu va Isiraeli viivulana nivagwa avanyingi ligali, kandi vizingulu ligali ma niviizura mu kivala cha Egebeti.
8Maku mwami muhia yavikwa mu Egebeti, uwavula kumanya Josefu. 9Yavolera avandu veve, “Heenzi, avandu va Isiraeli vaveeye avanyingi ligali kandi avizingulu kukuvita na vakutihizi kunyi. 10Niiva vulwani vulakwingila, valahambana navasigu viitu vakulwaane ma viiruki kutura mu kivala chiitu. Gakuduukiraa konyoole inzira yukuvigalira vavuli komeedeka.” 11Kunangwa vandu va Egebeti vaviika vimiliri valulu kusaliriza vandu va Isiraeli ni miyinzi midinyu. Avandu va Isiraeli vumbakira Mwami amadara manene ga Pitihomu na Ramesesi gatumiki kuli havundu hi videera vwu mwami. 12Navuzwa kali niiva vandu va Egebeti vameeda kudambiza vandu va Isiraeli, nilwo lwa vandu va Isiraeli vameedeka kuva vanyingi mu kivala. Kunangwa vandu va Egebeti vaatia vandu va Isiraeli ligali. 13Kunangwa vandu va Egebeti vaakora avandu va Isiraeli kuyinzira kuli avatugwa nu vululu ligali. 14Valomba limenya liavo kuva liuvuzuunu muliyinzira miyinzi midinyu, jokolonga madafari govodohi ni miyinzi jie zing'ano ziosi ju mumilimi jaavo vugira kuvavererera.
15Maku mwami wa Egebeti yavolera Shifura na Pua vakonyeleri vukwivuliza vaviri avakonyaa avakali va Avaheburaina ndi, 16“Lwa mukonyaa avakali Vaheburaina, nivanyoora avana, niiva aliivula mwana muyaayi, mumwiti, naveeye mukaana, muleke ave mwoyo.” 17Navuzwa vakonyeleri yavo vaatia Nyasaye, na sivakora kuli mwami wa Egebeti yavalaga vakole mba; navuzwa valeka avana vayaayi nivava mwoyo. 18Kunangwa mwami yalanga vakonyeleri yavo, navavoolera, “Kigira ki mukoraa kuli ndi? Kigira ki mulekaa avana vayaayi nivava mwoyo?”
19Avakonyeleri vukwivuliza yavo vaativura, “Avakali va Avaheburaina sivaveeye kuli avakali va Egebeti mba yavo vivulaa vugira vudinyu kandi imbiri wa kunyi vakonyeleri vu kwivuliza yava kukikiri kuduuka kuvo.” 20Kigira vakonyeleri vaavo vaatia Nyasaye, yavagasiza, kandi na avandu vameedeka nivagwa avizingulu ligali. 21Na gaali, kigira vakonyeleri yava vaatia Nyasaye, yavaha lwivulu. 22Maku Mwami yalaga avandu veve vosi, navavoolera, “Vuli mwana muyaayi Muheburaina wivulwa kuduuka asiuvwi mu mugera gwa Naili, navuzwa muleke avana vakana vave mwoyo.”
Currently Selected:
KUTURA 1: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
