KUTURA 3
3
Nyasaye Yalanga Musa
1Lidiku lilala Musa yaali ni yaya amagondi ni zimburi zia navizara weve Jezero, musaalisi wa Midiani yimilira chayo zana kuvitira imadioli wi ichangalangwi, kandi naduuka ku kiguru cha Sinai, ekeveeye kiguru kitakatifu cha Nya Nyasaye. 2Uwene yeyo, engelosi wa Yahova yaloleka ku Musa kuli lomemo lwu muliru nilutulaa hagati hi kisaka. Musa yahenza naalora kisaka yikio chaduuka umuliru, navuzwa sichahiizaa mba. 3Musa yavoola, “Yiki ni kindu chokogenyia ligali. Kigira ki kisaka yiki sikihizaa mba? Ndisunda himbi ndore.”
4Lwa Yahova yalora ndi Musa yisunda ahimbi alole, yamulanga kutura hagati hikisaka navoora, “Musa, Musa!”
Naye yahugira “Mbeeye hano.”
5Nyasaye yamuvolera, “Utisuunda ahimbi ligali mba. Tuliza vilato vivio mu virenge, kigira ha usingiyi hano haveeye ahatakatifu. 6Inzi mbeeye Nyasaye wa avaguuga vinyu, Nyasaye wa Aburahamu, Isaka na Yakobo.” Kunangwa Musa yafuma mumoni mwimwe, kigira yatia kohenza Nyasaye.
7Maku Yahova yavoola, “Ligali mali kolola uvusaaliri vwa vandu vange vaveeye navwo mu kivala cha Egebeti, kandi mali kuhulira lilira liavo liukwenya kosolwa kutura ku vadambizi vaavo. 8Kunangwa Inzi mali kuuza kuvasoora kutura ku vandu va Egebeti, nukuvaleeta mu kivala chu vwiyangu, kitugi kandi kenoru cha vandu va Kanaani, Hiti, Amori, Perizi, Hivi, na Jebusi. 9Mali kuhulira lirira lia avandu vange va Isiraeli, kandi mali kolola kuli vandu va Egebeti vavadambizaa nukuvakubiza kivi. 10Kalunu ngutumaa ku Mwami wa Egebeti kunangwa uduuki kwimilira avandu vange kutura mu kivala chiche.”
11Navuzwa Musa yavolera Nyasaye, “Inzi mbeeye vwaha, nduuki kuzia ku Mwami, maandulizi avandu va Isiraeli mu Egebeti?”
12Nyasaye yamuvolera, “Inzi ndava harara nivi, na lwa utuliza avandu yava mu Egebeti mulakasigamiri ku kiguru yiki. Yicho kilava kimanyiru ndi inzi mali kukutuma.”
13Maku Musa yavolera Nyasaye, “Lwa nduuka ku avandu va Isiraeli nukuvavoolera, ‘Nyasaye wa avaguuga vinyu undumi ku munyi,’ valandeva ndi, ‘Lieta lilie nivwaha?’ Kunangwa nambavoolere ndi?”
14Nyasaye yavolera Musa, “Inzi Mbeeye Oveeye Ho. Yavoola, Vola yaga ku avandu va Isiraeli ‘Mbeeye Ho undumi ku munyi.’ 15Volera vandu va Isiraeli ndi inzi Yahova, Nyasaye wa vaguuga vinyu, Nyasaye wa Aburahamu, Isaka, na Yakobo undumi kuvo. Yili ni lieta liange mihiga ni mihiga; kandi nilio lidukanaa makura na makura gaaza goosi ganange. 16Uzie uvuganyie harara aviimiliri va Isiraeli vosi uvavoolere ndi, Inzi Yahova, Nyasaye wa vaguuga vinyu, Nyasaye wa Aburahamu, Isaka, na Yakobo, ololeki ku ivi. Uvavoolere ndi, Ligali umali kuuza kuvo kandi mali kolola ga vandu va Egebeti vamukolera. 17Mali kotovola ndi ndamuleeta kutura mu kivala cha Egebeti wavadambizirwa, nukuvahila mu kivala keveeye kitugi kandi kenoru, kivala cha vandu va Kanaani, Hiti, Hivi, Vajebusi, Amori, na Perizi.
18“Avandu vange valahulira agu vavoola. Nahene yaho ulazia na aviimiliri va Isiraeli ku Mwami wa Egebeti na omuvoolele, ‘Yahova, Nyasaye wa Avaheburaina, uvuuliki umwene kukunyi. Kalunu mwaza, kuvugiliri kuzie mwigendanyama ku madiku gavaga kuhaana visiuviliru ku Yahova, Nyasaye wiitu.’ 19Inzi manyi vulahi ndi mwami wa Egebeti sialamuleka muzie natanigiywi kumulakula mba. 20Navuzwa ndatumikira zinguru ziange na ndahaana amageri ku vandu va Egebeti kulwukuvakolera vindu viukutihiza uwene yeyo. Inyima wa yaga, Mwami alamulakuula muzie.
21“Inzi ndakora vandu va Egebeti vahane uluyali ku munyi ulwa muva nimutulaa mu kivala zana simulazia makono meere mba. 22Vuli mukali wa Isiraeli, alazia ku mutende weve mu Egebeti nu ku mukali woosi Umwegebeti omenyi munyumba yeeye amusave zinguvu kandi viju vie izahabu ni ifeza. Avandu va Isiraeli valaviika vindu yivi ku avayaayi na vakana vaavo na valazia nuvutugi vwa vandu va Egebeti.”
Currently Selected:
KUTURA 3: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
