Marko 8

1Mu madiku yago, lwa kya li ho kiduma kinene, ni va vula kuva nevyokulia, Yesu ya langa avegidzwi veve na a va volera, 2Mbererera kiduma, kigira kalunu va menyi ninze madiku gavaka, na va ta li nevyokulia mba: 3kandi ni mba volera va tsia yengo wavo ni va ta lie, va la va nehuyuki ku inzira: kandi avalala va twula hale. 4Avegidzwi veve va mu tivulira, Mundu a la nyala kunyola ha li ha vyokulia mu kyangalangwi yigutidze avandu yava? 5Ya va teva, Mu veye nemilango gyanga? Va vola, Gyitanu na gyiviri. 6Na a ha avandu munwa vikale hasi ku marova: na a vugula milango gyitanu na gyiviri, na a santidza na a megannya, na a ha avegidzwi veve, va vike imbiri wavo; ni va gyi vika imbiri wekiduma. 7Kandi va li netsisudzi tsigehi tsinkekeke: lwa ya mala kutsigasidza ya va volera kuvika yitsi kandi imbiri wavo. 8Va lagira, ni viguta: ni va vungidza vihinda vitanu na viviri vi zuye amadonye ga tigala. 9Va li himbi tsielfu tsine: na a va sendukidza. 10Nonoho yingira mu liato halala navegidzwi veve, na a duka mu kivala kya Dalamanuta.

11Na Vafarisayo va twula ni va tanga kumuteva, venya kulola kyokulolekidzira kya twula migulu, ni va mu geridza. 12Na a twula imiyika ligali mu roho gwigwe, na a vola, Kigira ki likula yili lyenya kulola kyokulolekidzira? Ligali mmu volera, likula yili si li li hebwa kyokulolekidzira mba. 13Na a va leka, ni yingira kandi mu liato na a tsia engereka.

14Vivirira kuvugula ubukima; va li nomulango mulala gweng'ine mu liato. 15Na a va gerihidza na a vola, Henza, mu gelihe bulahi mamera ga Vafarisayo namamera ga Herodi. 16Ni va hangalidzana, ni va vole rana, Kivune si ku veye nobukima mba. 17Yesu ya manya, na a va volera, Kigira ki mu hangalidzana, kigira mu vula kuva nobukima? Si mu manya, si mu hulira mba? Mu mali kudinnya mwoyo gwenyu? 18Mu veye netsimoni, mu vula kulola? Mu veye namatu, mu vula kuhulira? Kandi si mwidzulitsa mba? 19Lwa nda megannya milango gyi tanu mu va li tsielfu tsitanu, mwa vungidza amadonye vihinda vyanga? Ni va mu volera, Likumi na viviri. 20Lwa nda meganya gyitanu na gyiviri mu va li tsielfu tsine, mwa vungidza amadonye vihinda vyanga? Ni va mu volera, Vitanu na viviri. 21Na a va volera, Mu kikiri ku manya?

22Ku, va duka Betsaida. Ni va mu letera mundu mboku, ni va mu saala a mu dire. 23Na a gumira mboku mkono, na a mu twulidza mu lidala; lwa ya ka tudza amate mu tsimoni, na a vika kuye makono, ya mu teva, U lola kindu? 24Naye na a henza na a vola, Ndola avandu; kigira mba lola va fwana misala gyi genda. 25Ku, kandi ya vika ma kono ku tsimoni tsitsye; naye yumika, na a honnywa, na a lola bulahi, vindu vyosi. 26Na a mu volera, tsia yengo, na a vola, U tingira mu lidala.

27Yesu ya twula, navegidzwi veve, kutsia mu madala ga Kaisaria Filipi: lwa ya li ku inzira ya teva avegidzwi veve, na a va volera, Avandu va vola inze ni bwaha? 28Va tivula ni va vola, Yohana Mbatidzi; navandi va vola, Elija; navandi va vola, mulala ku vaprofeti. 29Ma ya va teva, Navutswa mwinye mu vola inze ni bwaha? Petro ya tivula na a mu volera, Ive ni Kristo. 30Na a veganehi dza va ta volera mundu, kali mulala. 31Na a tanga kuvegidza vindu vinyingi, na a vola, Mwana wa Adamu, ga mu dukira kukupidzwa kivi kinene, kandi avakulundu, na vasalisi vanene, navang'odi va la mu lega nokumwiita, kandi inyima yama diku gavaka a la simuguka kandi. 32Livola yili ya vola habulavu. Petro ya mu vugula na a tanga kumugaya. 33Na a girunkana, na a lola avegidzwi veve, na a gondokera Petro, na a mu volera, Yirane inyima wange, Setani; kigira ive si u ganagana vindu vya Nyasaye, navutswa vindu vyavandu. 34Ya langa avandu navegidzwi veve, na a va volera, Mundu na a va ni yenya kunonda, yegaye, a ginge musalaba gwigwe a nonde. 35Ku vosi yenya kuhonnya liva mwoyo lilye a la li gotidza; kandi uyu u gotidza liva mwoyo lilye kigira inze nevangeli, a la li honnya. 36Mundu na a va na a nyola vyomu lirova vyosi na a gotidza liva mwoyo lilye, vi mu konya ki? 37Mundu a la gulidza ki liva mwoyo lilye? 38Ku vosi u vera inze tsisoni namakuva gange mu likula lyobuheyi yili nelyobwoni; Mwana wa Adamu a la mu vera tsisoni, lwa a li duka nobu kumi bwa Ise wewe netsingelosi.

Currently Selected:

Marko 8: MBE

Highlight

Copy