Marko 7

1Va vugana kuye Vafarisayo, navalala ku vang'odi, ava twula Yerusalemi, 2ni va lola avalala ku vegidzwi veve va lagira namakono mamisu, ga veye aga tisaveywi. 3(Kigira Vafarisayo, na Vayuda vosi, ni va tisava ligali makono si va lagira mba, va gumira miima gyavakulundu; 4kandi lwa va twula mu kitu, ni va tisinga si va lagira mba. Kandi vi veho vindu vindi vinyingi vya va bugirira kugumira, kwogidza visanda, netsinyingu, nevifuria.) 5Vafarisayo navang'odi va mu teva, Kigira ki avegidzwi vovo va sula kugumira miima gyavakulundu, navutswa va lagira ubukima namakono mamisu? 6Ya tivula na a va volera, Isaya ya profeta bulahi ku mwinye avagadi, kuli aga ng'odwa

Avandu yava va nzidzominya neminwa gyavo,

Navutswa myoyo gyavo gyi veye hale ninze.

7Navutswa lisigama lyavo li veye lya vutswa,

Vegidza miima gyavandu kuva megidzo gavo.

8Mu leka malago ga Nyasaye ni mu gumira miima gyavandu. 9Kandi ya va volera, Ligali mu sula malago ga Nyasaye, mu duke kugumira miima gyenyu. 10Kigira Musa ya vola, Widzominye dada wowo na mama wowo; kandi, U nyega ise kinga mama, likudza, a kudze: 11navutswa mwinye mu vola, Mundu u li volera ise kinga mama, Vyosi vya mbeye navyo kukonya ive ni Korbani, livola lyago ni vya gimwa Nyasaye; 12mwinye si mu mleka kandi kuko lera ise kinga mama kindu; 13miima gyenyu gya mwegidza gyi kola amakuva ga Nyasaye ga ve vutswa: kandi vindu vindi vinyingi ku yivi mu kolanga. 14Ya langa kiduma kandi, na a va volera, Mu mbulire vosi, mu manye: 15si ki li kindu ki veye kyova ku mundu ki ingira mu mundu ki nyala kumukola mudamano; navutswa vindu vi twula mumwoyo, yivi nivyo vi nyala kumukola mudamano. 16Mundu na a va nogutu gokuhulira, a hulire. 17Lwa ya mala kwingira munyumba kutwula mu vandu, avegidzwi veve va mu teva lugano yilu. 18Na a va volera, Mwinye kandi mu vula kuhulira ndi? Si mu manya mba vindu vyosi vi veye kyova ni vingira mu mundu si vi nyala mba kumukola mudamano; 19kigira si vingira mu mwoyo mba, navutswa vi tsitsa mmunda, kandi vi la twula? Ya vola yaga, a kole vyokulia vyosi vi ve vilahi. 20Kandi ya vola. Vi twula mu mundu vi nyala kumukola mudamano. 21Kigira vi twula mugati, mu mwoyo gwavandu, tsiganagani tsindamano, nokutsia mbakana, nokwiba, nokuluminda, nokuheya, 22nokukayirwa vyavene, nekirage, nobugadi, nobuhuuvali, nemoni indamano, nokunyega, nokwigingira, nokusiruhala. 23Vindu yivi vyosi vidamano vi twula mugati ni vi kola mundu a ve mudamano.

24Kandi ya twula ho na a tsia mu kivala kya Turo ne Sidone. Lwa yingira mu inyumba ni yenya avandu vosi va vule kumanya; navutswa si ya nyala kuviswa mba. 25Nonoho mukali mulala, mkana wewe ya li nomwoyo mudamano, ya hulira a veye mu, ni yadza na a gwa ha virenge vivye. 26Mukali zana ya li Mugreki, Siriafoinike ihiri yeye, ya mu saala a twulidze lidemone mu mkana wewe. 27Navutswa ya mu volera, Avana va tange kwiguta: kigira si bu li bulahi kuvugula ubukima bwavana bu sikisirwe tsimbwa. 28Ya tivula na a mu volera, Yee, Mwami; navutswa tsimbwa tsi litsa amadonye isi mwemeza. 29Ya mu volera, Kigira livola yili, u tsie yengo; lidemone li mali kutwula ku mkana wowo. 30Na ya tsia inyumba yeye, na a nyola mkana na a goni ku kitali, nelidemone li mali kutwula.

31Kandi ya twula mu kivala kya Turo, na a vita Sidone, na a duka ku inyanza ya Galilaya, na a vita hagati hekivala kya Dekapoli. 32Va mu letera mundu wa hana amatu wa yovoya vutswa; va mu saala a vike mkono kuye. 33Ya mu twulidza mu vandu na a mu hila ha luvega galaha, na a vika videte vivye mu matu gege na a tudza amate na a dira ku luiimi lulwe; 34ya henza igulu na a twula imiyika, na a mu volera, Efata, livola lyago li veye, Igulika. 35Nonoho amatu gege gigulika na mugoye gwolulimi gwa bohololwa, na a vola bulahi. 36Ya veganehidza va ta volera mundu: navutswa kuli wa ya veganehidza va kira kulandidza amakuva. 37Va genya munonono kuvita ni va vola, U koli vindu vyosi bulahi; u koli kali ava hana amatu va hulire, nava yovoya va vole.

Currently Selected:

Marko 7: MBE

Highlight

Copy