Marko 4

1Kandi ya tanga kwegidza ku luginga lwenyanza. Ni ki vunga ha ya li kiduma kinene ndi, ni yingira mu liato ni yikala munyanza; nekiduma kyosi kya li ho ku luginga lwenyanza. 2Na a vegidza vindu vinyingi mutsing'ano, na a va volera mu lyegidza lilye: 3Mu hulire Henza, mumidzi ya twula na a tsia kumidza. 4Ku, lwa ya li na a midza, bulala bwa gwa ku inzira, na manyonyi ni gadza, ni ga bu vodza. 5Nobundi bu gwa ku magina ha bwa nyola marova makekeke, nonoho bwa mera, kigira marova ga li makekeke; 6navutswa liuva lwa lya mala kutwula bwa niala; kigira ii bwa li nemiri, ni bwuma. 7Nobundi bu gwa mmafwa, namafwa ga viruka, ni ga bu kunika nibu vula kwama. 8Nobundi bu gwa mmarova malahi ni bwama, ni bu viruka ni bu dasa lyama; bulala bwa leta makumi gavaka, nobundi makumi gatanu nelilala, nobundi mia. 9Na a va volera, u veye namatu gokuhulira, n hulire.

10Lwa ya li na a va yeng'ine, yavo va li naye na va li likumi na vaviri va mu teva lugano yilwo. 11Na a va volera, Mwinye mu hebeywi kumanya amakuva ga viswa gobwami bwa Nyasaye: navutswa vosi va veye kyova va volerangwa mutsing'ano: 12lihenza va henza va vula kulola; lihulira va hulira va vula kumanya; gase va leganira va samefwe ubwoni bwavo. 13Na a va volera, Si mu manya lugano yilu? Mu la manya ndi tsing'ano tsyosi? 14Mumidzi a midza likuva. 15Yava avoku inzira haluvega heli kuva li midzwa nava, lwa va mali kuhulira, hene yaho Setani yadza na a twulidza likuva li midzeywi muvo. 16Kandi yava ava midzwa mmagina nava, lwa va mali kuhulira likuva, nonoho va li gumira nobuyanzi, 17avene si va veye nemiri, ma vidinyiridza hakekeke; ma lwa va lola kivi nobudambidzwi kigira likuva, nonoho vikigitala. 18Avandi ava midzwa mmafwa; nava, va hulira likuva, 19na madidikano gekivala, nobugadi bwobutugi, nelikayerwa lyevindu vindi, ma vingira ni vi kunika likuva li luhe li duke kuvula kwama. 20Navo va midzwa mmarova malahi nava, ava hulira likuva ni va li gumira ni vama, avalala amakumi gavaka, avandi makumi gatanu nelilala, avandi mia.

21Na a va volera, I letwa itaya i kunikwa nekihinda, kinga i vikwe isi wekitali, si i letwa i vikwe higula hemeza? 22Si ha veye nekindu kya viswa ki li vula kuvuulika; si ha veye nekindu kya vikwa hamwamu ki li vula kulangaminywa. 23Mu ndu na a va namatu gokuhulira, a hulire. 24Na a va volera, Mu henze bulahi aga mu huliranga inengo ya mu geranga mu, kandi mwinye mu la gererwa mu: namwinye mu la medwa. 25Mundu u veye nevindu a la hebwa: nu u ta li navyo, a la nyagwa kali vya a ve navyo.

26Na a vola, ubwami bwa Nyasaye bu veye ndiyo, kuli mundu a midza bugutsa a tage mmarova 27na a gona na a vuka ubudiku nombasu, nibwo bugutsa bu mera bu viruka, a vula kumanya kuli wa bu viruka. 28Lirova lyene lyeng'ine li leta vyokulia; litu li tanga kutwula, kandi butsitsi, ku, kandi ingano inkomelu mulidete. 29Navutswa lwa ingano ilava, nonoho a leta mbano, kigira bugesi bu duki.

30Na a vola. Ku fwananya na ki ubwami bwa Nyasaye? Nolugano ki lwa ku fwananya nalwo? 31Bu fwanana nolugutsa lwelisatsi, inyinga ya lu tagangwa mmarova, yilu lu veye lukekeke ku bugutsa bwosi bu vedza mulirova; 32navutswa lwa bu tagangwa bu mera bu vita tsingutsa tsyosi, bu twulidza tsisya tsinene manyonyl gegulu ga luha ga duka kugunza hasi mkiriri kyagwo.

33Ya kupa tsing'ano tsinyingi kuli yitsi na a va volera likuva lilye kuli va nyala kulihulira; 34navutswa bugira lugano si a va volera mbakandi lwa va li veng'ine ya vuulira avegidzwi veve tsyosi.

35Ku lidiku yilyo lwa gwa li mgolova, ya va volera, Kwambuke ku tsie ku lwangereka lundi. 36Ni va leka kiduma, ni va mu hila kuli wa ya li muliato. Kandi amato gandi ga li halala naye. 37Kihudzutsi kyembuudza kya vuka, viguvuli ni vi duya liato, ni li duka kwizula madzi. 38Mwene ya li na a ve mu liato hanyima, na a gona tsindolo ku muto: ni va mbukidza, ni va mbolera, Mwegidzi, si ki veye kindu ku ive, kwinye ku divanga? 39Na a vuka na a gaya imbuudza, na a volera inyanza, Kiring'ana, u leng'ere. Nembuudza ya hera, ni gu va muleng'era munene. 40Na a va volera, Kigira ki mu tidza ndi? Mu kikiri kuva nelisuuvira? 41Ma va tia munonono, ni va volerana, Ibwaha uyu, kali imbuu dza nenyanza i mu hulira?

Currently Selected:

Marko 4: MBE

Highlight

Copy