Marko 3

1Ni yingira kandi mu lisomero; ya li mu mundu wa ng'era mukono. 2Ni va mu henza na a va na a mu honnya mu lisabato, va mbuule. 3Ku, ya volera mundu wa li nomukono gwa ng'era, Singira hagati. 4Kandi ya va volera, Nobulahi kukola bulahi mu lisabato naho kukola ubudamano? Kuhonnya liva mwoyo naho kwiita? Navutswa va kiring'ana. 5Lwa ya va henza na a vihirirwa, na a verera kigira budinyu bwemyoyo gyavo, ya volera mundu, Nyira mukono gugwo. Na a nyira mukono ni gu hona ni gu leng'ana nogundi. 6Nonoho Vafarisayo va twula mu, ni va volerana nava nga Herodi kuli wa va duka kumwiita.

7Na Yesu yiyahula navegidzwi veve ni va tsia kuluginga lwenyanza nekiduma kya twula Galilaya kya mu londa, navandi va twula Ebuyuda, 8ne Yerusalemi ne Dumea na engereka wa Yordani; na vandi va twula Turo na Sidone, kiduma kinene, lwa va hulira amakuva ga ya kola, vadza kuye. 9Na a volera avegidzwi veve li honge himbi liato likekeke li mu linde kigira kiduma gase ki la mmina. 10Kigira ya honnya vanyingi; ni va mu mina va duke kumudira, vosi va li ni va veye netsinkudzo. 11Nemyoyo mida mano lwa gya mu lola, gya gwa hasi imbiri wewe ni gyi hanzuka ni gyi vola, Ive nu Mwana wa Nyasaye. 12Na a gyambakannya ligali gyi ta mbuula mba.

13Na a tsia mkigulu na a langa vosi va ya li ni yenya; vadze kuye. 14Na a tovola ava, li likumi na vaviri va ve halala naye, kandi a va hile kwilwadza, 15nokuva netsingulu tsyokutwulidza amademone: 16na a gulika Simoni lieta Petro; 17na Yakobo wa Zebedayo na Yohana amwavo wa Yakobo, ya va gulika lyeta Boanergese li veye kuvola Avana viligita. 18Kandi Andreya na Filipu, na Bartlomeyo, na Matayo, na Tomasi, na Yakobo wa Alfayo na Tadayo na Simoni Mukanani 19na Yuda Iskarioti wa mu zama. Na a tsia munyumba. 20Nekiduma kirana kuvunga kandi, kali si va nyala kulagira mba. 21Navalina veve lwa va hulira va tsia kumgumira: kigira va vola, A lalu kanga. 22Navang'odi va sulunguta ni va twula Yerusalemi, va vola A veye na Beelzebuli; na a twulidza amademone netsingulu tsyo mwami wamademone. 23Na a va langa, na a va volera mutsing'ano, Setani a nyala ndi kukunga Setani? 24Ubwami ni bwavukani bwene, ubwami yibwo si bu nyala kusingira. 25Nenyumba ni yavukani yene inyumba yeyo, si i nyala kusingira mba. 26Setani ni yevukira mwene na a gavanywa si a nyala kusingira mba, navutswa a la hera. 27Si ha veye nomundu a nyala kwingira munyumba vomundu wetsingulu, na a mu nyaga vindu vivye, bugira na a ta boha wetsingulu; ma a la mu nyaga inyumba yeye. 28Ligali mmu volera, Avana va vandu va la samefwa ubwoni bwosi namanyego gavo ga va li nyega: 29navutswa uyu li nyega Roho Mutakatifu si a li nelisamefwa mihiga nemihiga, navutswa a veye nobwoni kuye bu ta hera: 30kigira va li ni va vola, A veye nomwoyo mudamano.

31Vadza vamwavo veve na mama wewe; ni va singira kyova ni va tuma mundu kumulanga. 32Kiduma kya li ni kikaye ni ki mu kumbiridza, ki mu volera, Henza mama wowo nava mwavo vovo va veye kyova va kwenya. 33Na a va tivulira, na a vola, U veye mama wange na vamitu vange ni bwaha? 34Na a henza ava li ni va mkumbiridza, na a vola, Henza mama wange na vamitu vange. 35Ku vosi u li kola ubulaliri bwa Nyasaye, uyu niye amitu wange, na mbotso wange, na mama wange.

Currently Selected:

Marko 3: MBE

Highlight

Copy