Litanga 41

1Kunangwa inyima wemihjga gyiviri gya vita, Farao ya lota: na henza, ya singira ku luginga lwomugera. 2Na henza, tsing'ombe tsya senuka kutwula mu mugera, tsya li tsindahi na tsinkomeru; natsyo tsya tsia kwaya lilago. 3Na henza, tsing'ombe tsindi tsitano na tsiviri tsya li inyima watsyo kutwula mu mugera, tsindamano na tsing'ahu, na tsya singira himbi na tsing'ombe tsindi ku luginga lwomugera. 4Ma tsing'ombe tsindamano na tsing'ahu tsya lia tsindahi na tsinkomeru. Ma Farao ya vuka. 5Kandi ya gona na a lota hali kaviri: na henza, vyangala vitano na viviri vya twula ku kikuvati kilala, vizula na vilahi. 6Na henza, vyangala vitano na viviri vya mera inyima wavyo, vinyerere vye mbuudza ya ivugwe ya niyalidza. 7Na vinyerere yivi vya mira vyangala vitano na viviri vizula na vilahi. Na Farao ya vuka, na henza, lya li liloto. 8Kunangwa mugamba mwoyo gwigwe gwa henda; naye tuma, na a langa avakumu vosi va Egepeti, na avageeri vosi: na Farao ya va volera liloto lilye; navutswa si ha li nomulala wa nyala kuvuulira Farao maloto gege.

9Hene yaho munene wa avanwehidzi ya volera Farao, na a vola Inze nzidzulitsa mahyolo gange lero; 10ive, Farao wa vihirirwa na avatumekiri vovo, na wa mbika kulindwa mu inyumba yomunene wa valindi, inze halala na munene wa avadeki: 11na kwinye kwa lota maloto ubudiku bulala, inze na uyu, kwa lota mundu sa mulala kuli livuulira lya liloto lilye. 12Na ya li ho halala na kwinye muyai, Muhebraina, mutumekiri womunene wa avalindi; na kwa mu volera, naye ya ku vuulira maloto getu; ku mundu sa mulala kuli liloto lilye lya li ya ku vuulira. 13Kunangwa, kuli ya ku vuulira, ga manya ni ga va ndiyo; inze ya nziranya mu bugono bwange, na uyu ya mu sunga.

14Hene yaho Farao ya tuma na a langa Yosefa, navo va mu leta bwangu kutwula mu inyumba ya hasi: naye yevega, nokugirunkanya tsingubo tsitsye, nokwingira imbiri wa Farao. 15Na Farao ya volera Yosefa, Ndoti maloto, na si ha veye na u nyala kumbuuiira: na inze mbuliye makuva gogo, lwa u hulira maloto u nyala kugavuula. 16Na Yosefa ya tivulira Farao, na a vola, Si ga veye mu inze: Nyasaye a la ha Farao litivula lyemirembe. 17Na Farao ya volera Yosefa, Mu maloto gange, nda li ni singiye ku luginga lwomugera: 18na henza, tsing'ombe tsitano na tsiviri tsya senuka kutwula mu mugera, tsikomeru na tsindahi; natsyo tsyaya mu lilago: 19kandi, henza, tsing'ombe tsindi tsitano na tsiviri, tsya senuka inyima watsyo, tsindamano na tsimbi ligali, na tsing'ahu, tsya nkikiri kulola lifwana lyatsyo mu kivala kyosi kya Egepeti mu budamano bwatsyo: 20na tsing'ombe tsing'ahu na tsindamano tsya lia tsing'mbe tsyoku tanga tsitano natsiviri tsinkomeru: 21na lwa tsya mala kutsilia, si tsya manyekana tsya tsi lia; navutswa tsya li tsindamano, kuli wa tsya li matsyambiri. Ma nda vuka. 22Kandi nda lota mu maloto gange, na henza, vyangala vitano na viviri vya twula ku kikuvati kilala, vizula na vilahi: 23na henza, vyangala vitano na viviri vya twula inyima watsyo, vya niyala, na vinyerere, na vyembuudza yevugwe yominya: 24na vyangala vinyerere vya mira vyangala vitano na viviri vilahi: ma nda volera avakumu navutswa si ha li nomulala wa nyaia kumbuulira. 25Na Yosefa ya volera Farao, Liloto lya Farao li veye lilala: Nyasaye u voleye Farao aga yenya kukola. 26Tsing'ombe tsindahi tsitano na tsiviri tsi veye mihiga gyitano na gyiviri; kandi vyangala vilahi vitano na viviri vi veye mihiga gyitano na gyiviri: liloto ni lilala. 27Kandi tsing'ombe tsitano na tsiviri tsing'ahu na tsindamano tsya senuka inyima watsyo ni mihiga gyitano na gyiviri, na kandi vyangala vitano na viviri vinyerere na vyembuudza yevugwe ya niyalidza; vi la va mihiga gyitano na gyiviri gyenzala. 28Yiki ni kindu kya mbolera Farao: Nyasaye a mannyanga Farao aga yenya kukola. 29Henza, mihiga gyitano na gyiviri gyidzanga gyevyokulia vinyingi mu kivala kyosi kya Egepeti: 30kandi inyima wagyo gyi ladza mihiga gyitano na gyiviri gyenzala; na ubuhinda bwosi bu livirirwa mu kivala kyosi kya Egepeti; na inzala zana i la dividza kivala; 31kandi ubuhinda bu la vula kumanyekana mu kivala kigira inzala i londanga; kigira i la va yekihalatu. 32Kandi ku maloto ga Farao ya lotidzwa hali kaviri, ga veye kigira inkuva yiyi Nyasaye u gi singeridzi, na Nyasaye a la gi leta bwangu. 33Kunangwa Farao yenye mundu mugeeri na welimanya, nokumuvika ku kivala kya Egepeti. 34Farao a kole inkuva yiyi, kandi a vike avalindi ku kivala va vugule kidieli kilala mu vitano kyekivala kya Egepeti mu mihiga gyitano na gyiviri gyobuhinda. 35Na va vungidze vyokulia vyosi vyemihiga gyitano na gyiviri milahi gyi ladza nokuvika ubuswage bu duke kuve vyokulia mu madala mu mukono gwa Farao, navo va bu linde. 36Na vyokulia yivi vi la va akiba yekivala mu mihiga gyitano na gyiviri gyenzala i la va mu kivala kya Egepeti; kivala ki vule kudiva kigira inzala yiyi.

37Na inkuva yiyi ya li indahi imbiri wa Farao, na imbiri wavatumekiri veve vosi. 38Na Farao ya volera avatumekiri veve, Ku nyala kunyola mulala u fwana mundu uyu, wa Roho wa Nyasaye a veye muye? 39Kunangwa Farao ya volera Yosefa, Kigira Nyasaye ya ku mannya inkuva yiyi yosi, si ha veye nowobugeeri na welimanya kuli ive: 40ive u la va ku inyumba yange, kandi kuli likuva lilyo avandu vange vosi va la lagwa ndiyo: na mu intebe yohwami yeng'ine inze nda va munene kuvita ive. 41Na Farao ya volera Yosefa, Henza, nku viki ku kivala kyosi kya Egepeti. 42Na Farao ya twulidza imingiri yomuhuri ku mukono gwigwe, na a gi vika Yosefa ku mukono gwigwe, kandi ya mu vika tsingubo tsyekatani tsindahi, nokumuvika munyolo gwethahabu mwigoti mwimwe; 43na a mu nyinya mu ligari lya kaviri lya ya li nalyo; na vimira imbiri wewe ni va hanzuka Mu sigame: na ya mu vika ku kivala kyosi kya Egepeti. 44Na Farao ya volera Yosefa, Inze mbeye Farao, kandi si ha veye nomundu mu kivala yiki kyosi kya Egepeti u nyala kuginga mukono kinga kirenge bugira ive. 45Na Farao ya gulika Yosefa lieta lilye, Zefenath-panea: kandi ya mu kwehidza mukana Asenathu, mwana wa Potifera musalisi wa On. Na Yosefa ya twuia, na a tsia ku kivala kyosi kya Egepeti.

46Kandi Yosefa ya li nemihiga makumi gavaka lwa ya singira imbiri wa Farao mwami wa Egepeti. Na Yosefa ya twula imbiri wa Farao, na a kia mu kivala kyosi kya Egepeti. 47Na mu mihiga gyitano na gyiviri gyenziguta lirova lyama vinyingi. 48Naye ya vungidza vyosi vyemihiga gyitano na gyiviri gya li mu Egepeti, na a vika vyokulia zana mu madala: vyokulia vyemilimi gya kumbiridza lidala, ya vi vika mu lidala lyene. 49Na Yosefa ya vika ubuswage kuli muyeke gwenyanza, bunyingi ligali, kuduka ya luha ya leka kuvalidza; kigira si bwa li nelivalidzwa. 50Kandi Yosefa yivulirwa avana vaviri avayai, muhiga gwenzala ni gu kikiri kuduka, ava Asenathu mukana wa n Potifera musalisi wa On, ya mwivulira. 51Na Yosefa ya gulika munene Manase; ya vola, Kigira Nyasaye mpeye kwivirira kivi kyange kyosi, na kyenyumba yosi ya dada wange. 52Na lieta lya wakaviri ya gulika Efiraim: ya vola, Kigira Nyasaye u mpeye lwevulu mu kivala kyobusaliri bwange. 53Na mihiga gyitano na gyiviri gyenziguta, gya li mu kivala kya Egepeti, gya vita. 54Na mihiga gyitano na gyiviri gyenzala gya tanga kuduka, kuli wa Yosefa ya vola: ha li nenzala mu vivala vyosi; navutswa mu kivala kya Egepeti vyokulia vya li yo. 55Na lwa itodzo ya duka mu kivala kya Egepeti kyosi, avandu va lilira Farao a va he vyokulia. Na Farao ya volera Avaegepeti vosi, Tsii ku Yosefa; aga a mu volera, mu kole. 56Na inzala ya li ku lirova lyosi: na Yosefa ya homolola magungi gosi, na a gulidza Avaegepeti, na inzala ya li yekihalatu mu kivala kya Egepeti. 57Na avevivala vyosi va duka Egepeti ku Yosefa kugula ubuswage; kigira inzala ya li yekihalatu mu lirova lyosi.

Currently Selected:

Litanga 41: MBE

Highlight

Copy