Litanga 42

1Kunangwa Yakobo ya lola ubuswage bu veye mu kivala kya Egepeti, na Yakobo ya volera avana veve, Kigira ki mu henzana butswa avene na avene? 2Naye yavola, Henza, mbulira ubuswage bu veye mu Egepeti: mu sulungute yo, mu ku gulire yo; ku ve mwoyo, ku vule kukudza. 3Na avamwavo va Yosefa likumi va sulunguta Egepeti kugula ubuswage. 4Navutswa Benjamini, amwavo wa Yosefa, Yakobo ya vula kumuhila halala namwavo veve; kigira ya vola, Gase kindu kivi ki la mu gwira 5Na avana va Israeli va duka mu vandi ava tsia yo kugula: kigira inzala ya li mu kivala kya Kanani. 6Na Yosefa ya li mwami ku kivala; niye wa gulidza avandu vosi avekivala. Na avamwavo, va Yosefa va duka, na va mwinamira kudukidza mumoni mwavo hasi. 7Na Yosefa ya lola avamwavo veve, na a va manya, navutswa yekola mwene wundi mundu kuvo, na a volerana navo nobululu; na ya va teva, Mwinye mu twuli haliha? Navo va vola, Ku twuli mu kivala kya Kanani kugula vyokulia. 8Na Yosefa ya manya avamwavo veve, navutswa si va mu manya mba. 9Yosefa yidzulitsa maloto ga ya lota ku makuva gavo, na a va volera, Mu veye avaluti: mu duki kuluta kyahonyo kyekivala. 10Navo va mu volera, Auwa mwami wange, navutswa kwinye avatumekiri vovo ku duki kugula vyokulia. 11Kwinye kwosi ku veye avana vomundu mulala; ku veye avasuuvirifu, avatumekiri vovo si ku veye avaluti mba. 12Naye ya va volera, Auwa, navutswa mu duki kuluta kyahonyo kyekivala. 13Navo va vola, Kwinye avatumekiri vovo ku veye avamwavo likumi na vaviri avana vomundu mulala mu kivala kya Kanani; na henza, mukogoti a veye halala na dada wetu lero, na mulala si a veye ho mba. 14Na Yosefa ya va volera, Ga veye kuli mmu voleye, ni mboia, Mu veve avaluti: 15ku yaga mu la manyeridzwa: ku livamwoyo lya Farao, si mu la twula hano mba, mukogoti wenyu na a va na a vula kuduka hano. 16Mu tume mulala ku mwinye, a tsie kuleta amwavo wenyu, na mwinye mu la bofwa, amakuva genyu ga manyeridzwe, ni mu va ni mu veye ava vola ageligali naho mba: kinga, ku livamwoyo lya Farao, ligali mu veye avaluti. 17Naye ya va boha halala madiku gavaka.

18Ku lidiku lya kavaka Yosefa ya va volera, Mu kole ndina na mu ve mwoyo; kigira inze ntia Nyasaye: 19Ni mu va ni mu veye avandu aveligali, mulala ku avamwavo venyu a bofwe mu inyumba yavahambe yenyu; navutswa mwinye mu tsie kuhilira avenzala vetsinyumba tsyenyu, ubuswage: 20na mu ndetere amwavo wenyu mukogoti; na ndina amakuva genyu ga la manyeridzwa, na mwinye mu la vula kukudza. Navo va kola ndiyo. 21Navo va volerana avane na avene, Ligali ku veye ne kivi ku amwavo wetu, kigira kwa lola ubusaliri bwomwoyo gwigwe, lwa ya ku goonya, ni ku vula kumuhulra; kigira yaga ubusaliri yibu bu duki ku kwinye. 22Na Rubeni ya va tivulira, na a vola, Si nda mu volera, ni mbola Mu ta kola kindu ku mwana; na mwinye si mwa bugirira kumbulira? Kunangwa kandi amasahi gege ga vanzangwa 23Navo si va manya Yosefa ya va hulira; kigira mugirunkanyi ya li hagati havo. 24Na yegirunkanya mugongo, na a lira; ma yirana kuvo na a va volera makuva, na a vugula Simeoni kuvo, na a mu boha imbiri wavo. 25Ma Yosefa ya haana munwa kwizulitsa tsimuya tsyavo ubuswage, kandi sa mulala yiranyirwe if etha yeye mmuya yeye, kandi va hebwe vyokulia vyoku inzira: na va kolerwa ndiyo.

26Navo va vika tsimuya tsyobuswage ku tsisukiri tsyavo, ni va tsia. 27Na mulala kuvo lwa ya kunula imuya yeye ha va gona kulihidza isukiri yeye, ya lola ifetha yeye; na henza, ya li mmunwa gwemuya yeye. 28Na ya volera avamwavo veve Nzeranyeywi ifetha yange; na henza, i veye mu imuya yange: na mwoyo gwavo gwa kudza, navo va henzana nokudegera, ni va vola, Ni kinduki yiki kya Nyasaye a ku koleye? 29Na va duka ku Yakobo dada wavo mu kivala kya Kanani, na va mu volera makuva yaga gosi aga va gwira; ni va vola, 30Mundu uyu, mwami wekivala, ya volerana nekwinye nobululu, na a ku lola ku veye avaluti ava lutanga kivala. 31Na kwa mu volera, Kwinye ku veye avasuuvirifu; si ku veye avaluti mba: 32ku veye avamwavo likumi na vaviri, avana va dada wetu; mulala si a veye ho, na mukogoti a veye halala na dada wetu mu kivala kya Kanani. 33Na mundu uyu munene wekivala, ya ku volera, Nda manya mu veye avasuuvirifu ku ikuva yiyi: mu leke amwavo wenyu mulala ku inze, ma mu hiie ubuswage bwokukonya inzala yetsinyumba tsyenyu, mu tsie; 34ni mu ndetere amwavo wenyu mukogoti: hene yaho nda manya si mu veye avaluti, navutswa mu veye avasuuvirifu: kandi nda mu ha amwavo wenyu, na mwinye mu la kiranya mu kivala.

35Kunangwa lwa vitulula ubuswage bwavo, henza, sa mulala liboho lyefetha yeye lya li mu imuya yeye: yava na dada wavo lwa va lola maboho gefetha gavo, va tia. 36Na Yakobo dada wavo ya va volera Mu mbereridzi ku avana vange Yosefa si a veye ho, na Simeoni si a veye ho, na mu la hila Benjamini: yaga gosi ga veye ku inze. 37Na Rubeni ya volera dada wewe, na a vola, Wiite avana vange vaviri, ni mba ni mbula kumuleta ku ive: u mu vike mu mukono gwange, na inze nda mu leta ku ive kandi. 38Naye ya vola, Mwana wange si a la sulunguta na mwinye mba; kigira anwavo wewe u kudzi, naye u tigaye muderwa: ni i va kivi ki gwa ku uyu ku inzira ya mu tsia ku, kunangwa mwinye mu likidza tsimbudze tsyange kuduka mu kilindwa mu buvereri.

Currently Selected:

Litanga 42: MBE

Highlight

Copy