Litanga 39

1Na Yosefa ya sulungutidzwa kutsia Egepeti; na Potifara, munyampara wa Farao, munene wavalindi, Muegepeti, ya mu gula mu makono ga Avaishmaeli, ava mu sulungutidza yo. 2Kandi Yahova ya li halala na Yosefa, naye ya li wobugasu; na ya li mu inyumba yomwami wewe Muegepeti. 3Na mwami wewe ya lola Yahova a veye halala naye, na Yahova ya gasidza vyosi vya li mu makono gege. 4Na Yosefa ya nyola tsimbabasi imbiri wewe, na ya mu tumekira: kandi ya mu kola a ve mulindi wenyumba yeye noku vyosi vya ya li navyo ya vika mu mukono gwigwe. 5Kunangwa kutwula inyinga ya ya mu kola mulindi wenyumba yeye, kandi wevindu vyosi vya ya li navyo, Yahova ya gasidza inyumba ya Muegepeti kigira Yosefa; na ubugasu bwa Yahova bwa li ku vyosi vya ya li navyo, mu inyumba nomu mulimi. 6Kandi ya leka vyosi vya ya li navyo mu mukono gwa Yosefa; na mwene si ya manya kindu kali kilala ku vya ya li navyo, navutswa vyokulia vya ya lia. Na Yosefa ya li mundu mulahi weligondo lilahi.

7Kunangwa inyima wevindu yivi, mukali wa mwami wewe, yomika Yosefa; na a mu volera, U gone ninze. 8Navutswa ya sula, na a volera mukali wa mwami wewe, Henza, mwami wange si a manya kya mbeye nakyo mu inyumba, kandi ya vika vyosi vya a veye navyo mu mukono gwange: 9si ha veye nomunene mu inyumba yiyi kuvita inze; kandi si ya ngaya ku kindu kali kilala, navutswa ku ive, kigira ive u veye mukali wewe: kunangwa nyala ndi kukola ubudamano yibu bunene, nokwona ku Nyasaye? 10Kunangwa, ya hongera kuvolera Yosefa, naye ya vula kubugirira kugona naye, kinga ku va halala naye. 11Kunangwa inyinga yeyo, yingira mu inyumba kukola miyinzi gyigye, na si ha li na wundi ku vasatsa venyumba mu inyumba yimu. 12Mukali uyu ya mu gumira ingubo yeye, na a vola, U gone ninze: na ya mu lekera ingubo yeye mu mukono gwigwe, ni yiruka na a tsia kyova. 13Kunangwa, mukali lwa ya lola u mu lekeye ingubo yeye mu mukono gwigwe, nokutsia kyova, 14ya langa avasatsa avenyumba yeye, na a va volera, na a vola, Henza, ya ku letera Muhebraina kukukolera kihenyahenye; yingira ku inze a duke kugona ninze, na nda kupa tsikwili nomwoyo munene: 15kunangwa, lwa ya hulira ni nginga mwoyo gwange, nokukupa tsikwili, ya ndekera ingubo yeye ni yiruka, na a tsia kyova. 16Naye ya vika ingubo yeye himbi naye, kuduka lwa mwami wewe yirana ingo. 17Naye ya mu volera kuli makuva yaga, na a vola, Mutumekiri Muhebraina wa wa ku letera, ya duka ku inze kunkolera kihenyahenye: 18kunangwa, lwa ng'ingi mwoyo gwange, nokukupa tsikwili, ya ndekera ingubo yeye ni yiruka kutsia kyova.

19Kunangwa, mwami wewe lwa ya hulira makuva gomukali wewe, ga ya mu volera, na a vola, Mutumekiri wowo ya nkolera makuva kuli yaga; ya vihirirwa ligali. 20Na mwami wa Yosefa ya mu vugula, na a mu vika mbuhambe, ha avahambe vomwami va bohangwa: naye ya li hombuhambe. 21Navutswa Yahova ya li halala na Yosefa, na a mu vera tsimbabasi imbiri womulindi wenyumba yavahambe. 22Na mulindi wenyumba yavahambe ya vika avahambe vosi ava li mu inyumba yavahambe, mu mukono gwa Yosefa; na makuva gosi ga va kola yo, uyu ya li mukoli wago. 23Mulindi wenyumba yavahambe si ya henza kindu kali kilala, kya li mu mukono gwigwe, kigira Yahova ya li halala naye; na vyosi vya ya kola, Yahova ya vi kola vi ve nobugasu.

Currently Selected:

Litanga 39: MBE

Highlight

Copy