Litanga 38

1Kunangwa inyinga yeyo, Yuda ya sulunguta kutwula ku avamwavo veve, na a tsia ku mundu mulala wa Adulam, welieta lilye lya li Hirah. 2Na Yuda ya lola yo mukana wa Mukanani welieta lilye lya li Shua; naye ya vugula mukana uyu, na a va halala naye. 3Naye ya vereka, ni yivula muyai; naye ya mu gulika Eru. 4Na vereka kandi ni yivula muyai; na a mu gulika Onan. 5Na yivula kandi muyai, na a mu gulika lieta lilye Shela: na Yuda ya li ha Kezibu, lwa ya mwivula. 6Na Yuda ya vugulira Eru munene wewe, mukali wa langwa Tamaru. 7Na Eru, munene wa Yuda, ya li mudamano imbiri wa Yahova; na Yahova ya mwiita. 8Na Yuda ya volera Onan, Wingire ku mukali wa amwavo wowo, u mu kolere kuli ga dukanga amwavo womusatsa wewe, u singeridzire amwavo wowo kisukululwi. 9Na Onan ya manya kisukululwi zana si ki la volwa kuva kikye; kunangwa, lwa ya li halala nomukali wa amwavo wewe ya gotidzira hasi gase a la letera amwavo wewe kisukuiulwi. 10Na inkuva yiyi ya ya kola ya li indamano imbiri wa Yahova: naye ya mwiita kandi. 11Hene yaho Yuda ya volera Tamaru navizala wewe, U menye mukunzakali mu inyumba ya dada wowo, kuduka lwa Shela mwana wange a li viruka; kigira ya vola, Gase a la kudza kuli avamwavo veve. Kunangwa Tamaru ya tsia kumenya mu inyumba ya dada wewe.

12Inyima wa yaga mukana wa Shua, mukali wa Yuda, ya kudza; na Yuda ya leminywa mwoyo, na a tsia ku avandu veve ava kalaga ubwoya bwamagondi mu Timna, uyu na mulina wewe Hira Muadulam. 13Tamaru ya volerwa, Henza, navizala wowo yanegiranga kutsia Timna kukalaga magondi gege ubwoya. 14Naye ya navula tsingubo tsitsye tsyobukunzakali, nokwivika ingubo yoku mutwe, nokwiyuhira ingubo ni yikala mu kiribwa kya Enaim, li veye ku inzira yokutsia Timna; kigira ya lola Shela ya viruka, naye si ya sererwa kuva mukali wewe. 15Yuda lwa ya mu lola, ya ganagana a veye malaya; kigira ya kunika mumoni mwimwe. 16Naye ta tsia ni yeveta kuye, na a mu volera, Mwadza, leka mbe halala nive: kigira si ya manya a veye navizala wewe. Naye ya vola, U la mpa kindu ki, u duke kuva halala ninze? 17Naye ya vola, Nda ku letera kimeme kyembuli yekyayo. Naye ya teva, U la mpa kihambiriru, kuduka u li letera? 18Naye ya vola, Nda ku ha kihambiriru ki? Naye ya vola, Mpe imimgiri yoyo yomuhuri, kandi musipi, kandi impimbo i veye mu mkono gugwo. Naye ya mu ha vindu, na a va halala naye na a mu kola inda. 19Na mukali uyu ya vuka, na a tsia, na a navula ingubo yeye yomumoni, nokuvika tsingubo tsitsye tsyobukunzakali. 20Na Yuda ya hiliro kimeme mu mukono gwomulina wewe Muadulam, a duke kunyola kihambiriru mu mukono gwomukali zana: navutswa si ya mu nyola mba. 21Hene yaho ya teva avasatsa va ha zana homukali uyu, na a vola, A veye haliha uyu malaya wa li mu Enaim ku inzira? Navo va vola, Si ha veye nomukali wa malaya hano. 22Naye yirana ku Yuda, na a vola, Si ndoli uyu mba; kandi avasatsa va ha zana va vola, Si ha li nowamalaya hano. 23Na Yuda ya vola, Yenyolire yiki, gase ku la legenywa: henza, nda hila kimeme yiki, nive si u mu nyoye.

24Inyima wemyeli gyivaka, Yuda ya volerwa, Tamaru navizala wowo u koli malaya, kandi, henza, a veye inda yobuheyi. Na Yuda ya vola, U mu lete hano, a sambwe. 25Lwa ya letwa kyova, ya tuma ku navizala wewe, na a vola, Musatsa uyu wevindu yivi vi veye vivye, niye wa nkola inda: na ya vola, Mwadza, u manye vindu yivi vi veye vya bwaha, imingiri yomuhuri, na musipi, na impimbo. 26Na Yuda yeyama kuvyo, na a vola, Mukali uyu a veye nobulungi kuvita inze; kigira si nda mu ha Shela mwana wange mba. Naye si a li halala naye kandi.

27Kunangwa, inyinga yelilumwa lilye, ya li na avana vamalongo mmunda mwimwe. 28Kunangwa, lwa ya li ni yevulanga, mwana mulala ya twula mukono; na mwivulidzi ya vugula luvusi lwakanyu, na ya lu boha ku mukono gwigwe na a vola, Uyu ya tanga kwivulwa. 29Na ga duka, lwa yiranya mkono, henza, amwavo wewe ya tanga kwivulwa: naye ya vola, Kigira ki ive welombeye ubwiyangu bwokutwula? Kigira yaga ya gulikwa Pereze. 30Inyima wewe amwavo wewe yivulwa, uyu u veye noluvusi lwakanyu ku mukono gwigwe, na ya gulikwa Zera.

Currently Selected:

Litanga 38: MBE

Highlight

Copy