Litanga 24

1Kunangwa Abrahamu ya li musakulu, nowemihiga minyingi: kandi Yahova ya mu gasidza mu vindu vyosi. 2Na Abrahamu ya volera mutumekiri, mulindi wenyumba yeye, nowameha ku vyosi vya ya li navyo, Mwadza, u vike mukono gwugwo ku litango lyange: 3na inze nda kwisuhidza ku Yahova, Nyasaye womigulu na Nyasaye welirova, u ta vugulira mwana wange mukali ku vakana Vakanani, ava mmenya hagati havo: 4navutswa u la tsia ku kivala kyange, noku aviko vange, na u la vugulira yo Isaka mwana wange, mukali. 5Na mutumekiri ya mu volera, Mbula mukana a la sula kubugirira kunonda, yadze mu kivala yiki: ga ndukira kwirannya mwana wowo kandi mu kivala kya wa twula mu? 6Na Abrahamu ya mu volera, Henza bulahi, u tirannya mwana wange yo mba. 7Yahova, Nyasaye womigulu, wa ntwulidza mu inyumba ya dada wange, nomu kivala kya ndivulwa mu, wa mbolera, na ya nzisuhira, kuvola, Nda ha kivala yiki ku kisukululwi kikyo; uyu a la tuma ingelosi wewe imbiri wowo, na ive u la vugulira yo mwana wange mukali. 8Kandi ni i va mukana si a bugirira kukulonda, hene yaho u la bohololwa ku lyesuha lyange yili; navutswa u tirannya yo mwana wange kandi. 9Na mutumekiri ya vika mkono gwigwe ku litango lya Abrahamu mwami wewe, na yisuha mu inkuva yiyi.

10Kunangwa mutumekiri ya vugula tsing'amia likumi, ku tsing'amia tsyomwami wewe, na a tsia, kigira vindu vilahi vyosi vyomwami wewe vya li mmukono gwigwe: na ya twula, na a tsia Mesopotamia, ku lidala lya Nahoro. 11Na ya sigaminya tsing'amia kyova welidala himbi nekidaho inyinga ya mgolova, inyinga ya vakali va tsitsanga kudaha amadzi. 12Na ya vola, O Yahova, Nyasaye womwami wange Abrahamu Nku saala, u mbe inkavi indahi lero na u vererere mwami wange Abrahamu. 13Henza nsingira himbi na kidaho kya amadzi na avana avakana va vandu velidala yili vadza kudaha amadzi: 14ga duke kuva, mukana wa mbolera, Mwadza, u tuule isiongo yoyo, nduke kunwa amadzi; naye a la vola, U nwe, kandi nda nwehidza tsing'amia tsitsyo: uyu a ve niye wa u tovoleye mutumekiri wowo Isaka; ku yaga nda manya u verereye mwami wange. 15Kunangwa, lwa ya li na a ki vola yaga, henza, Rebeka ya twula mu lidala, uyu yivulirwa Bethueli mwana wa Milika, mukali wa Nahoro, amwavo wa Abrahamu, naye ya li na isiongo ku livega lilye. 16Kandi mukana uyu ligondo lilye lya li lilahi, mukana mugyima, kandi musatsa a kikiri kummanya: naye ya sulunguta kuduka ku kisenukiru kya amadzi, na yizulitsa isiongo yeye, na yanagira kandi. 17Na mutumekiri ya nyagula kuvugana naye, na a vola, Mwadza, u mbe amadzi gesiongo yoyo makekeke, nwe. 18Naye ya vola, U nwe, mwami wange: naye ya kola bwangu na a tuula isiongo ku mkono gwigwe, na a mu ha amadzi kunwa. 19Na lwa ya mala kumuha kyokunwa, ya vola, Nda dahira tsing'amia tsitsyo kandi, kuduka tsi nweye, 20naye ya kola bwangu, na a sundula isiongo yeye ku mulinga gwemitugu gyi nwera ku, na a tsia tsimbiru kandi mu kidaho kudaha na ya dahira tsing'amia tsitsye tsyosi. 21Na mundu uyu ya mu henza ligali, na a kiring'ana, a duke kumanya Yahova u gasidzi lugendo lwilwe naho si ga li ndiyo. 22Kunangwa, lwa tsing'amia tsya mala kunwa, mundu ya vugula imingiri yethahabu, ubuliduhu bwayo bwa li kidonye kyesekeli, na visambo viviri vyoku makono gege, gyobuliduhu bwavyo bwa duka tsishekeli likumi tsyethahabu; 23naye ya mu teva, U veye mwana wa bwaha? Mwadza, u mbolere. Ha veye nobwiyangu mu inyumba ya dada wowo bwa ku nyala kumenya mu? 24Naye ya mu volera, Mbeye mukana wa Bethueli mwana wa Milika, yivulira Nahoro. 25Kandi ya mu volera, Ku veye nobunyasi nevyokulia vi duki, nobwiyangu bwokumenya mu. 26Na mundu yina minya mutwe gwigwe na a sigamira Yahova. 27Na ya vola, A gasidzwe Yahova, Nyasaye womwami wange Abrahamu, wa vula kuleka tsimbabasi tsitsye na geligali gege ku mwami wange: kandi inze, Yahova u nzimiriye ku inzira i duka ku inyumba yamwavo wa mwami wange.

28Na mukana uyu ya nyagula, na a volera avenyumba ya mama wewe kuli makuva yaga. 29Na Rebeka ya li na mbotso, wa langwa Labani: na Labani ya nyagula kutsia ku mundu, ha kidaho. 30Na ga li lwa ya lola imingiri, na visambo vyoku makono ga mbotso wewe, na lwa ya hulira makuva ga Rebeka mbotso wewe, na a vola, Mundu ya mbolera yaga na yaga; ya duka ku mundu; na henza, ya li na a singiye himbi na tsing'amia tsitsye ha kidaho. 31Naye ya vola, Wingire, ive wa Yahova ya gasidza; kigira ki u singira kyova? Kigira nombi inyumba, nobwiyangu bwetsing'amia. 32Na mundu yingira mu inyumba, na a boholola tsing'amia misigo; na ya ha tsing'amia bunyasi nevyokulia, na amadzi gokwisavidza virenge vivye, na virenge vya vandu va li halala naye. 33Na va i mu lombera vyokulia a lie; navutswa ya vola Si nyala kulia lwa nkikiri kumuvoiera inkuva ya mbeye nayo. Naye ya tivula, U vole. 34Na ya vola, Inze mbeye mutumekiri wa Abrahamu. 35Na Yahova u gasidzi mwami wange ligali, naye u duki kuva munene ligali: kandi u mu heye imitugu gyamagondi na tsing'ombe, na ifetha, na thahabu, na vatugwa vayai, na vatugwa vakana, na tsing'amia, na tsisukiri. 36Kandi Sara mukali womwami wange yivulira mwami wange mwana muyai lwa ya duka kuva mukeere: na mwami wange u mu heye vyosi vya a veye navyo. 37Kandi mwami wange ya nzisuhidza, na a vola, U ta vugulira mwana wange mukali ku vakana va Vakanani, ava mmenya mu kivala kyavo; 38navutswa u la tsia mu imyumba ya dada wange, noku aviko vange, u vugulire mwana wange mukali. 39Na inze nda volera mwami wange, Mbula mkana a la sula kubugirira kunonda. 40Naye ya mbolera, Yahova wa ng'enda imbiri wewe, a la tuma ingelosi wewe a tsie halala nive, a gasidzire ulugendo lulwo; na ive u la vugulira mwana wange mukali mu viko vange, nomu inyumba ya dada wange: 41hene yaho u la bohololwa ku lyesuha lyange, lwa u duka mu viko vange; navo ni va vula kukuha mukana, ive u la bohololwa ku lyesuha lyange. 42Na inze nda duka lero ndi ha kidaho, ni mbola, O Yahova, Nyasaye womwami wange Abrahamu, nu u va nu u ngasidzeye ulugendo lwange lwa ntsitsanga: 43henza, nsingira himbi nekisenukiru kyamadzi; na ga duke kuva, mukana u twula mu lidala kudaha, wa mbolera, Nku goonya, mbe ku madzi gesiongo yoyo makekeke, nwe; 44naye a la ntivulira, U nwe, kandi nda dahira tsing'amia tsitsyo: wa zana a ve niye wa Yahova a tovoleye mwana womwami wange. 45Kandi lwa nda li ni ki vola mu mwoyo gwange, henza, Rebeka yadza nesiongo kwivega lilye; na ya sulunguta kuduka ha kisenukiru kyamadzi, na a daha: na inze nda mu volera, Mwadza, u mbe ku madzi, nwe. 46Naye ya kola bwangu, na a tuula isiongo yeye, kutwula ku livega lilye nokuvola, U nwe, kandi nda nwehidza tsing'amia tsitsyo: ma nda nwa, na ya nwehidza tsing'amia kandi. 47Na nda mu teva, ni mbola, U veye mwana wa bwaha? Naye ya mbolera, Mbeye mwana wa Bethueli, mwana wa Nahoro, wa Milika ya mwivulira: ma nda vika inono ku amolo gege, na visambo ku makono gege. 48Na ndinaminya mutwe gwange, nokusigamira Yahova, na nsantidza Yahova, Nyasaye womwami wange Abrahamu, wa nyimirira ku inzira inungi kuvugula mukana wamwavo wa mwami wange kuva mukali womwana wewe. 49Kunangwa ni mu va mu la kolera mwami wange ubulahi nageligali, mu mbolere: naho ni ga ta li ndiyo, mu mbolere; nzegirunkanye ku mukono mulungi kinga ku mukono mmosi.

50Kunangwa Labani na Bethueli va tivula ni va vola, Inkuva yiyi twulanga ku Yahova: na kwinye si kunyala kukuvolera makuva madamano kinga malahi. 51Henza, Rebeka mwene a veye imbiri wowo, u mbugule, u tsie, a ve mukali womwana womwami wowo, kuli Yalhova ya vola. 52Kunangwa lwa mutumekiri wa Abrahamu ya hulira makuva gavo, yinaminya mutwe gwigwe hasi imhiri wa Yahova. 53Na mutumel iri ya twulidza viju vyefetha, na viju vyethahabu, na tsingubo, na a ha Rebeka: kandi ya ha mbotso wewe, na mama wewe, vindu vyobuguli budinyu. 54Navo va lia ni va nwa, uyu na vandu va li halala naye, ni va gona ubudiku buno; na va vuka mugamba, na ya vola, Mu ntwulidze ntsie ku mwami wange. 55Na mbotso wewe, na mama wewe va vola, Mukana a menye nekwinye madiku ga duka, mbula likumi; na inyima a la tsia. 56Naye ya va volera, Mu ta ngaya, kigira Yahova u gasidzi ulugenda lwange; mu ntwulidze ntsie ku mwami wange. 57Navo va mbolera, Ku la langa mukana, ku mu teve ku munwa gwigwe. 58Navo va langa Rebeka, ni va mu teva, U la tsia nomundu uyu? Naye ya vola, Nda tsia. 59Kunangwa va tuma Rebeka, mbotso wavo, nomleli wewe, na mutumekiri wa Abrahamu, navandu veve. 60Na va gasidza Rebeka, ni va mboiera, Mbotso wetu, ive u ve mama wa tsielfu hali tsielfu makumi, kandi kisukululwi kikyo ki gumire kiribwa kya yavo ava va dunyiranga. 61Na Rebeka ya twula navakana veve, na va nina ku tsing'amia, na va londa mundu uyu: na mutumekiri ya hila Rebeka na a tsia. 62Kandi Isaka ya twulira ku inzira ya Beerlahairoi; kigira ya li na a menya mu kivala kya Kusini. 63Na Isaka ya tsia kuganaganira mu mulimi inyinga ya mgolova: na a ginga tsimoni tsitsye, na a lola, na henza, tsing'amia tsitsanga. 64Kandi Rebeka ya ginga tsimoni tsitsye, na lwa ya lola Isaka, yika ku ing'amia yeye. 65Na ya teva mutumekiri, Ni bwaha mundu uyu u gendanga mmulimi kuvugana nekwinye? Na mutumekiri ya vola Uyu nomwami wange: naye ya vugula ingubo yeye yokukunika ni yekunika mutwe. 66Na mutumekiri ya volera Isaka vindu vyosi vya ya li kukola. 67Na Isaka ya leta Rebeka na a mu vika mu lihema lya mama wewe Sara na a mu vugula, na Rebeka ya gwa mukali wewe; naye ya mu yanza: na Isaka ya leminywa mwoyo inyima welikudza lya mama wewe.

Currently Selected:

Litanga 24: MBE

Highlight

Copy