Litanga 25

1Lwenyima Abrahamu ya leta mukali wundi, na lieta lilye lya langwa Ketura. 2Naye ya mwivulira Zimrani, na Jokshani, na Medan na Midiani, na Ishibaku, na Shua. 3Na Jokshani yivula Sheba, na Dedan. Na avana va Dedan va li Ashurim, na Letushim, na Leumim. 4Na avana va Midiani: Efa, na Eferi, na Hanoku, na Abida, na Eldaha. Yava va li avana va Ketura. 5Na Abrahamu ya ha Isaka vyosi vya ya li navyo. 6Navutswa avana va vasuria Abrahamu ya va ha vihaanwa; na a vavukanya ku Isaka mwana wewe, lwa a kiri mwoyo, va tsie ku luvega lwevugwe ku duka mu kivala kyevugwe. 7Yaga na madiku gemihiga gyobuhindiri bwa Abrahamu ya hindira, mihiga mia na makumi gatano na gaviri na gyitano. 8Na Abrahamu, mwoyo gwa twula kuye, na a kudza mu lihindira lilahi, musakulu, wizula mihiga, na a vungidzwa ku aviko veve. 9Na Isaka na Ishmaeli avana veve va mu ta mu luhangaywa lwa Makipela, mu mulimi gwa Efroni, mwana wa Zoharu Muhiti, gu veye ku luvega lwa Mamre; 10mulimi gwa Abrahamu ya gula ku avana va Hethu: Abrahamu ya tebwa yo, kandi Sara mukali wewe. 11Kunangwa inyima welikudza lya Abrahamu, Nyasaye ya gasidza Isaka mwana wewe: na Isaka ya menva ha Beerlahairoi.

12Yivi ni visukululwi vya Ishmaeli, mwana wa Abrabamu, wa Hagari Muegepeti, mukana mutugwa wa Sara, yivulira Abrahamu: 13na yaga nameta ga vana va lshmaeli, kuli ameta gavo, kandi kuli visukululwi vyavo: munene wa Ishmaeli va Nebaiothu; na Kedari, na Adibeeli, na Mibisam, 14na Mishima, na Duma, na Masa, 15na Hadadi, na Tema, na Jeturu, na Nafishi, na Kedema: 16yava na vana va Ishmaeli, na yaga nameta gavo, kuli madala gavo, na kuli mahema gavo avami likumi na vaviri kuli tsihiri tsyavo. 17Yigyi ni mihiga gyobuhindiri bwa Ishmaeli, gya li mihiga mia namakumi gavaka na gyitano na gyiviri: na mwoyo gwa twula kuye, na a kudza, na a vungidzwa ku aviko veve. 18Navo va menya kutwula Havila kuduka Shur, ki veye ku luvega lwa Egepeti, lwa u tsia Asuria: na ya menya imbiri wa vamwavo veve vosi.

19Na yivi ni visukululwi vya Isaka, mwana wa Abrahamu: Abrahamu yivula Isaka: 20na Isaka ya li nemihiga makumi gane lwa ya leta Rebeka, mukana wa Bethueli Musiria wa Padan-aram, mbotso wa Labani Musiria, kuva mukali wewe. 21Na Isaka ya saalira mukali wewe ku Yahova, kigira ya li mugumba: na ya mu hulira, na Rebeka mukali wewe ya vereka. 22Na avana va kola kivihiri mmunda mwimwe; naye ya vola, Ni ga va ni ga veye ndi, mbindira kigira ki? Naye ya tsia kuteva Yahova. 23Na Yahova ya mu volera,

Tsihiri tsiviri tsi veye mmunda mwumwo,

Na avandu tsing'ano tsiviri va la vukana kutwula mmunda mwumwo:

Na avandu lugano lulala va la va netsingulu kuvita lugano lundi;

Na munene a la tumekiri muke.

24Kandi lwa madiku gege gokwivula ga duka, henza, malongo ga li mmunda mwimwe. 25Na wokutanga ya twula mwakanyu, kuli ingubo ya maswa; na va mu gulika lieta Esau. 26Na inyima amwavo wewe ya twula, na mukono gwigwe gwa gumira liki lya Esau; naye ya gulikwa lieta lilye Yakobo: na Isaka y a li weminiga makumi gatano na lilala lwa mukali ya vivula.

27Kandi avayai va viruka: na Esau ya li muhimi wobugeeri, mundu womigendanyama; na Yakobo ya li muhokva, wa menya mu mahema. 28Kunangwa Isaka mwene ya yanza Esau, kigira ya lia tsinyama tsitsye tsyomigendanyama: na Rebeka ya yanza Yakobo. 29Kandi Yakobo ya deka muduya: na Esau yadza kutwula migendanyama, naye ya li na a luhi ligali: 30na Esau ya volera Yakobo, Mwadza, u mbe vyokulia u mbe muduya zana mwakanyu: kigira nduhi ligali: kigira yaga lieta lilye lya langwa Edom. 31Na Yakobo ya vola, Tanga lero ndi u ngulidze ubunene bubwo bwelivulwa. 32Na Esau ya vola, Henza, nkudzanga, na ubunene bwelivulwa bwange bu la nkonya ki? 33Na Yakobo ya vola, U nzisuhire lero ndi; naye ya mwisuhira: naye ya gulidza Yakobo ubunenebwibwebwelivulwa. 34Kunangwa Yakobo ya ha Esau ubukima na muduya gwetsimpindi; naye ya lagira na a nwa, na a vuka, na a tsia: na ndiyo Esau ya lega ubunene bwibwe bwelivulwa.

Currently Selected:

Litanga 25: MBE

Highlight

Copy