MATAYO 8
8
Yesu yahonia omundu wobuchele
(Mk. 1:40-45; Lk. 5:12-16)
1Olwa Yesu yekha okhurula musikulu, emikanda eminji chiamulonda. 2Ne lola omundu mulala owobuchele yetsa khuye namusikamila, namubool'la, “Omwami niwakhayanza onyala okhusiiya.”
3Yesu nanyiila omukhono kukwe, namutilakhwo ma naboola “Nyanzile, osiiyikhe.” Ne nonoho omundu tsana nasiiywa obuchelebwe. 4Yesu namubool'la, “Lola orabool'la khwo omundu wosi tawe, nebutswa otsie khumwesaalisi, akhuhengelesie ma khulwa okhumanyia abandu mbu umal'le okhusiyikha, ohaane esihanwa esia Musa yalaka.”#Abal. 14:1-32
Yesu yahonia omurumikhili we etswoni
(Lk. 7:1-10)
5Olwa Yesu yenjila mu Kaperinaumu, etswoni ya Baroma yetsa khuye, namuhomba 6namubool'la: “Omwami, omurumikhili wanje ulwal'le. Ukwiye likara ma atsunwa okhusila.”
7Yesu namubool'la “Nanzitse okhumuhonia.”
8Etswoni namukalusia naboola, “Omwami, singwan'ne ibe okhwinjila munyumba yanje. Laka butswa ling'ana lionyene ne omurumikhili wanje alahona. 9Nase ndi omundu oli inyuma wobunyali bwoburuchi, khandi ndi nende abasikari inyuma wanje. Ndakanga mulala, ‘Tsia!’ ne atsia; noundi, ‘Itsa!’ ne yetsa; ne nindaka omusumba wanje, ‘Khola yili!’ nakhola eliatsana.”
10Olwa Yesu yahulila yaka yachenya, nabool'la abandu abali mbamulondanga, “Siahene mubool'langa, sili okhunyoolakhwo omundu wosi mu Isiraeli, oli nobusubili obukali singa yibu tawe. 11Mubool'langa, Abenji balitsa okhurula ebukwe nende emasaba, balekhale halala nende Aburahamu nende Isaka nende Yakobo, khwisabo mu Bwami bwomwikulu.#Lk. 13:29 12Nebutswa abaana abakhakwanile baabe abobwami, balafubwa esioba musiilima esimwamu titit'ti; aha bakhalakaye nibakhwayula ameno kabwe.”#Mat. 22:13; 25:30; Lk. 13:28 13Yesu nabool'la etswoni, “Tsia ingo uwo, ne akosubiye kalakholwa khuibe.” Omurumikhili uwe yahona musaa yene yiyo.
Yesu yahonia abandu abenji
(Mk. 1:29-34; Lk. 4:38-41)
14Yesu yenjila munyumba ya Petero, ne yaho yalola nyakhusalanyene Petero nakon'ne nalwala omurengo. 15Yesu namutila omukhonokwe, ne omurengo kwamulekha; nabuukha, ma nachiaka okhubatenda.
16Olwa kwola mukolooba, abandu bamuler'ra abalwaye abenji abali nebisieno. Yesu yahinia emioyo emibi nende ling'ana nahonia bosi abali nibalwala. 17Yakhola yaka mbu akomuroobi Isaya yali niyaboola kahesikhe mbu “Ye omwene yabukula obutekhele bwefwe, niyetuukha obulwaye bwefwe.”#Isaya 53:4
Abakhoya okhuba abalondi ba Yesu
(Lk. 9:57-62)
18Olwa Yesu yalola omukanda omukali nikumubotokhan'ne, yalaka abechibe mbu batsie oluchelekha lundi olweinyanza. 19Ne Omwibaali wamalako yetsa khuye, namubool'la, “Omwibaali, ndakhulonda hosi hosi ahotsitsanga.” 20Yesu namukalusia, “Ebibwe bili namako kabio, ne amanyonyi kokhwikulu kali nebitsu biako, nebutswa Omwana wo Mundu siali nende ahanyala okhuhuluukhila tawe.”
21Omundu undi khubechi baabe namubool'la, “Omwami mbuchilil'la mbu nzie okhuyabila Papa wanje mbelio.” 22Nebutswa Yesu namukalusia, “Nonda; lekha abafu bayabile abafu babwe abene.”
Yesu yalenjesia imbumbuyeka
(Mk. 4:35-41; Lk. 8:22-25)
23Yesu yenjila muliaro, ne abechi baabe batsia halala n'naye. 24Ne lola, imbumbuyeka ingali yachiaka okhuhungutsa khunyanza, ne eliaro niliba mubutinyu bwokhweyinikha musi. Nebutswa Yesu yali nakonanga. 25Abechi nibatsia khuye nibamubusia, nibamubool'la, “Omwami, okhuhonie; khuli ahembi okhutiba.” 26Yesu nababool'la “Busina muli noburi obwinji? Muli abobusubili obuti.” Ma nabuukha, nakondekhela omuyeka nende ebikubuli bieinyanza; kho khwaliho okhulenjela okhukali. 27Siomundu yachenya. Ma nibaboola, “Ni mundu mbwena uno? Kata omuyeka neinyanza bimuhulilanga!”
Yesu yahonia abandu babili abali nebisieno
(Mk. 5:1-20; Lk. 8:26-39)
28Olwa Yesu yali niyol'le injelekha weinyanza musibala sia Gerasi, yabukaana nende abandu babili abali nibarul'le mubilindwa. Abandu yabo bali nende ebisieno ma khandi abahalaba muno, kata omundu wosi naranyala okhubir'ra khunjila iyo tawe. 29Ne lola bahanzukha mbaboola, “Nefwe khuli na sina n'nawe ibe Omwana wa Nyasaye? Witsile yino okhukhusandia amatukhu nikasili okhwola noho?” 30Ne sialiho esiayo sietsimbitsi nisiayanga ahembi khubo. 31Ebisieno yibio nibimuhomba Yesu mbiboola, “Noba nokhuhinia, okhurume khutsie musiayo sietsimbitsi.” 32Ne Yesu nabibool'la, “Tsie.” Nibirula nibitsia nibinjila mutsimbitsi. Esiayo siosi nisiselengera, nisikwa munyanza, ma nisitibila mwo.
33Abayi besiayo yisio nibelukha, nibatsia mwitaala, nibabool'la abandu amang'ana kosi akali nikekhol'le khubebisieno. 34Kho abandu bosi abomwitaala barula, nibatsia okhwakan'na Yesu; ne olwa bamulola, bamuhomba arule musibala siabwe.
Currently Selected:
MATAYO 8: EBAIBO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
