MATAYO 7

Okhukhalachila abandi

(Lk. 6:37-38,41-42)

1“Murakhalachila abandi esiina, kho Nyasaye alekhe okhumukhalachila esiina, 2okhuba Nyasaye yakhamukhalachile esiina singa obwa nenywe mukhalachilanga abandi. Ne amalako kamurumikhilanga khubandi niko aka Nyasaye yakharumikhile khwinywe.#Mk. 4:24 3Ne busina ohenganga akhaswaswi akhali mumoni yomwana wenywe, nebutswa norahendela khwo omukul'lo okuli mumoni mumwo omwene? 4Kata wakhabool'la mbwena omwana wenywe lekha khuhinie akhaswaswi akhali mumoni yiyo ne lola omukul'lo nikuli mumoniyo omwene? 5Omukalama ibe, ranga ohinie omukul'lo okuli mumoni yiyo mbelio, khe nawe wakhalola bulahi okhuhinia akhaswaswi akhali mumoni yomwana wenywe.

6“Murahelesia tsimbwa esili esitsienukhu tawe, tsilasukhana butswa ma tsimulume. Murafuuba tsinyuma tsienywe mutsimbitsi tawe, tsilatsisena butswa nebilenje biatsio.

Sabe, rune, khong'onde

(Lk. 11:9-13)

7“Sabe mulahebwa, rune mulanyoola; khong'onde mulekulilwa. 8Okhuba siomundu osabanga ahebwanga, ne orunanga anyoolanga, naye okhong'ondanga yekulilwanga. 9Ni mundu sina khwinywe owomwanawe yakhamusaba obusuma wamuha lichina? 10Nohomba niyakhamusaba isutse wamuha inzokha? 11Inywe, abali ababi mwamanya okhuha abaana benywe ebihanwa ebilahi. Kho Papa wenywe oli mwikulu sialasilaana muno okhumuhelesia ebindu ebilahi yabo abamusabanga!

12“Khol'le abandi akamwenyanga nabo bamukhol'le: Yaka niko aka amalako ka Musa nende amalako kabaroobi kebaalanga.#Lk. 6:31

Esilibwa esinyelele

(Lk. 13:24)

13“Mwinjile okhubir'ra musilibwa esinyelele okhuba esilibwa esiokhwinjila mukhutiba nesibambukhu khandi injila etsitsanga mu Kehena neimbambukhu, ne abenji bachendanga khuyo. 14Nebutswa esilibwa esitsitsanga mubulamu nesitititi ne injila eyinjilanga mubulamu neindinyu ne abachinyoolanga nibati.

Omusaala nende ebiamo biakwo

(Lk. 6:43-44)

15“Muchetsihe khubaroobi bobubehi, abetsanga khwinywe nibafwana singa amakondi nebutswa musi bali singa ebibwe ebilulu. 16Mulibamanyila khubikholwa biabwe. Amahwa sikamanga khwo emisabibu tawe khandi ebisisia sibiamangakhwo amakhuyu tawe. 17Omusaala omulahi kwamanga ebiamo ebilahi, nebutswa omusaala omubi kwamanga ebiamo ebibi. 18Omusaala omulahi sikunyala okhwama ebiamo ebibi, nohomba omusaala omubi sikunyala okhwama ebiamo ebilahi tawe. 19Ne omusaala kwosi okuraama ebiamo ebilahi kuremakungwa nikufuubwa mumul'lo.#Mat. 3:10; Lk. 3:9 20Kho mulimanya abaroobi bobubehi khulwe ebikholwa biabwe.#Mat. 12:33

Sindamumanyakhwo inywe tawe

(Lk. 13:25-27)

21“Sibali bosi abananganga Omwami, Omwami, abakhenjile mu Bwami bwomwikulu tawe; nibarali yabo abakholanga obulalilo bwa Papa wanje oli mwikulu bonyene. 22Olwe litukhu liesiina liakhoole abenji balimboolela, ‘Omwami, ifwe khwakamba amang'ana ka Nyasaye muliira lilio, ne muliira lilio, khwahinia ebisieno ebinji nikhukhola akamangalimwa.’ 23Nilwo olwa ndibabool'la habulafu, ‘Sindamumanyakhwo kata hati tawe. Rule khwise inywe abakholi bobubi.’#Etsisa. 6:8

Omwombokhi omuchesi nende omuhingwa

(Lk. 6:47-49)

24“Khe siomundu ohulilanga amang'ana kanje yaka nakakhola, alafwananibwa nomundu omuchesi, owombokha inyumba yiye khulwanda. 25Ifula yakwa, ma emichela nichitsula ne imbumbuyeka nehunguutsa khunyumba yiyo. Nebutswa siyakwa tawe, sichila yombokhwa khulwanda.

26“Ne siomundu ohulilanga amang'ana kanje kano narakakhola tawe, alafwananibwa nomundu omusilu owombokha inyumba yiye khumuyekhe. 27Ifula yakwa, ma emichela nichitsula, imbumbuyeka nehunguutsa khunyumba yiyo, nekwa. Ne okhukwa khwayo khwali okhukali muno.”

28Olwa Yesu yali namal'le okhuboola amang'ana yako abemikanda bachenya khubwibaali bubwe.#Mk. 1:22; Lk. 4:32 29Siyali singa abebaali ba Malako; nebutswa yebaala nobunyali.

Currently Selected:

MATAYO 7: EBAIBO

Highlight

Copy