MATAYO 9

Yesu yahonia omundu owakwa Likara

(Mk. 2:1-12; Lk. 5:17-26)

1Yesu yaniina muliaro, niyambukha niyoola mwitaala liabwe. 2Ne lola abandu bamuler'ra omundu owakwa likara, nakoniibwe khusirili sisie. Olwa Yesu yalola obwa bali nobusubili obukali yabool'la owakwa likara, “Mwana wanje lema omwoyo. Tsimbi tsitsio tsilekheywe.”

3Ne abalala khubebaali ba Malako mbaboola mumioyo chiabwe, “Omundu uyu anyekanga Nyasaye.” 4Ne Yesu yamanya amapaalo kabwe, nababool'la, “Nisina esichil'le nimukanakana amang'ana amabi mumioyo chienywe? 5Okhuba eliangu ne elili hena, okhuboola ‘Tsimbi tsitsio tsilekheywe,’ nohomba okhuboola, ‘Sinjila ochende?’ 6Nebutswa nase ndamumanyia mbu Omwana wo Mundu ali nobunyali musibala okhulekhela tsimbi.” Kho nabool'la owakwa likara “Sinjila, wetukhe esirili sisio, otsie ingo uwo.” 7Kho omundu tsana nasinjila ma natsia ingo uwe. 8Olwabandu balola akatsana yako baria, nibetsoomia Nyasaye, ohetsanga abandu obunyali singa yibwo.

Yesu yalanga Matayo okhumulonda

(Mk. 2:13-17; Lk. 5:27-32)

9Yesu yarula musibala yisio ne olwa yali nabiranga mwo, yalola omusololi wobusuru olangwanga Matayo niyekhaye ahasolol'langa obusuru. Yesu namubool'la “Nonda.” Naye nasinjila namulonda.

10Olwa Yesu yali niyekhaye munyumba ya Matayo khubiokhulia, abasololi bobusuru abenji nende aboni bandi nibetsa nibekhala halala nende Yesu nabechi baabe khubiokhulia.#Lk. 15:1-2 11Abafarisayi abalala balola yaka, nibareba abechi baabe, “Busina Omwibaali wenywe aliitsanga halala nabasololi bobusuru nende aboni bandi?” 12Yesu yahulila akababoola ma nabakalusia, “Abandu abalamu sibarunanga omulesi tawe, nebutswa yabo abali abalwaye. 13Tsie mweke esisina sieling'ana yili mbu: ‘Nzenya tsimbabasi, sinzenya emisango chietsisolo tawe.’ Sindaitsa okhulanga abandu abalunji tawe, nebutswa aboni.”#Mat. 12:7; Hosea 6:6

Lireebo khukokhuhonga okhulia

(Mk. 2:18-22; Lk. 5:33-39)

14Kho abechi ba Yohana betsa khuye, nibamureeba, “Busina ifwe nende Abafarisayi khuhonganga okhulia nebutswa abechi baabo sibahonganga khwo okhulia tawe?” 15Yesu nababool'la, “Mukalanga mbu abalangilwe mus'selelo banyala okhubelela olwomusaatsa mwene es'selelo asili n'nabo? Sikakhanyalikha tawe. Nebutswa amatukhu kakhetse olwomusaatsa mwene es'selelo alihiinibwa khubo, ne nilwo olwa balihonga okhulia.

16“Abulaho omundu onabilanga esilaka esiyia khungubo ikhulu; okhuba esilabi esinabilwe khungubo ikhulu, silameta okhuchirandula. 17Kata omundu wosi yakhatsukha khwo amalwa amatoro mumitata chiamaselo emikhulu? Okhuba emitata chiakharandukha, ma amalwa nikasundukha hasi. Ngarali amalwa amatoro katsukhwanga mumitata emiyia ne biosi bimenya bulahi.”

Omukhaana womwami nende omukhasi owatila khulusiche lweingubo ya Yesu

(Mk. 5:21-43; Lk. 8:40-56)

18Nyinga Yesu yali nasiboola yaka, omwami mulala mu Bayahudi yetsa khuye namusikamila, namubool'la, “Omukhaana wanje wakhafwa butswa luno, witse omurekhwo omukhono ma alaba mwoyo.”

19Yesu narula namulonda halala nende abechi baabe.

20Ne lola, omukhasi undi owali naratsanga munda emihika likhumi na chibili, namulonda inyuma, natila khulusiche lweingubo yiye. 21Yaboola mumwoyokwe, “Nimba nindiilakhwo butswa khungubo yiye yonyene, ndakhahona.” 22Nebutswa Yesu nasukhana namulola, namubool'la mbu “Lema omwoyo omukhaana wanje. Obusubili bubwo bukhuhonisie.” Habwene na habwene, omukhasi tsana nahona. 23Ma Yesu niyenjila munyumba yomukhulundu. Ne olwa yalola abandu nibakhupanga ebisiliba, nende yabo abali nibakholanga esikhu, 24yababool'la, “Murule esioba mwesi. Omukhaana siafwiye tawe; akonanga butswa tsindoolo,” Nabo nibamutsekhel'la. 25Ne olwa abomukanda bali nibahiinibwe esioba, Yesu yenjila mukari natila omukhono kwomukhaana uyo naye nabuukha. 26Amang'ana yako kalanda musibala yisio siosi.

Yesu yahonia ababofu babili

27Yesu yarula musibala yisio ne olwa yali nabiranga, ababofu babili bamulonda, nibalanjisia nibaboola, “Ibe Omwana wa Daudi, okhubeele tsimbabasi.” 28Nyinga Yesu yenjila munyumba, ababofu yabo betsa aha yali; Yesu nabareeba, “Musubilanga mbu nyala okhumuhonia?” Nibamukalusia, “Yee Omwami.” 29Ma Yesu nabatila khutsimoni tsiabwe, nababool'la, “Kabe khwinywe singa obwa musubiye.” 30Netsimoni tsiabwe tsiekukha. Yesu nabalaka butinyu, naboola “Murabool'la khwo omundu wosi tawe.” 31Nabo nibarula nibalandia amang'ana yako musibala yisio siosi.

Yesu yahonia omundu Omusilu

32Olwa abandu yabo bali nibatsitsanga abandu nalebe balera khu Yesu omundu owakwa omusilu sichila yali nes'sieno. 33Olwes'sieno siahinibwa mumundu omusilu tsana, omundu uyo yachiaka okhul'loma ma abandu bosi nibachenya. Ma nibaboola “Khusili okhulolakhwo akafwana mbu mu Isiraeli tawe.” 34Nebutswa Abafarisayi baboola mbu “Ahinianga ebisieno khulwo obunyali bwomukhongo webisieno.”#Mat. 10:25; 12:24; Mk. 3:22; Lk. 11:15

Yesu abelel'la abandu tsimbabasi

35Yesu yayeyema mumataala amakali nende amatu kosi. Yebaala mutsisinakoki tsiabwe nakamba Amang'ana Amalahi ako Bwami, nahonia abandu abali nobutekhele bwetsimbila tsiosi nende obulwaye.#Mat. 4:23; Mk. 1:39; Lk. 4:44 36Olwa yalola emikanda, omwoyokwe kwetsulamwo netsimbabasi khubo, sichila bali nesihenda mwoyo, mbasalaana singa amakondi akabula omwayi.#Obub. 27:17; 1 Abar. 22:17; 2 Aketsi. 18:16; Esek. 34:5; Mk. 6:34 37Ma nabool'la abechi baabe mbu, “Lichesa nelikhongo, ne abakholi bemilimo nabatututu.#Lk. 10:2 38Kho musaaye Omwami welichesa arume abakholi bemilimo mwichesa lilie.”

Currently Selected:

MATAYO 9: EBAIBO

Highlight

Copy